Füle vill Úkraínu í stað Íslands

Iðulega sér maður andstæðingum ESB á Íslandi líkt við öfgamenn. Þeim sem það gera þykir hins vegar alls ekki öfgafullt eða öfugsnúið að hleypa upp þingstörfum, jafnvel þó að fyrrverandi ríkisstjórn hafi komið á aðildarviðræðum við ESB og jafnframt hætt þeim.

Þeir sem ásaka alla, sem slá hinn minnsta varnagla gagnvart ESB-aðild Íslands, æsa nú til torgfunda og byltingar, þótt ljóst megi vera, eftir óteljandi skoðanakannanir, að meirihluti þjóðarinnar vilji ekkert hafa með ESB að gera. Sumir eru greinilega afar seinir til skilnings.

Pawel Bartoszek, sjálfstæðismaður af pólskum ættum, sem látið hefur bera nokkuð á sér í frekar lýðskrumslegum skrifum á visir.is, líkti nýlega andstæðingum ESB á Íslandi við öfgamenn og við verstu andstæðinga ESB í Úkraínu (sjá hér). Honum tókst einnig að blanda Ólympíuleikunum, Pussy Riot, hommahöturum og ÓRG forseta í málið. Ekki er óalgengt að ESB andstæðingum á Íslandi sé líkt við fasista, nasista eða jafnvel hryðjuverkamenn. Svo málefnaleg er nú sú umræða hjá ESB-sinnum.

Systurflokkur íslenskra stuðningsmanna ESB er Svoboda-flokkurinn í Úkraínu. Í þeim flokki vilja menn berja á gyðingum og komast í ESB.

 

 

Þó svo að forsætisráðherra landsins sýni gamla Framsóknartakta frá liðinni öld, er engin ástæða til að ærast. Vitaskuld er sjálfsagt að leyfa þjóðinni að kjósa sig út úr ESB aðildarviðræðum fyrir fullt og allt svo áhangendur Brussells á Íslandi sannfærist um að meirihluti þjóðarinnar, sá sem losaði sig við fyrrverandi ríkisstjórn í síðustu Alþingiskosningum, hafi gert upp hug sinn.

Sá gífuryrðaflaumur hjá þeim sem geta ekki lifað án evru beint í æð, eða þeirra sem dreymir um að börn þeirra verði embættismenn í Brussell og skaffi betlifé til Íslands um ókominn ár í stað auðlegðar okkar í sjónum sem ESB ætlar sér að gleypa, gera sér ekki grein fyrir því að mestu öfgarnar eru oft meðal ofstækisfullra stuðningsmanna ESB og sérlega í löndum sem sækjast eftir því að verða ESB-þjóðir. Tek ég mér það bessaleyfi, eins og sjálfstæðismaðurinn Pawel Bartoszek, að sækja samlíkinguna til einnar af næstu aðildarþjóðunum í ESB, Úkraínu.

Sömuleiðis vita allir, að ég mæli siðferði og lýðræðisást þjóða og manna með því hve mikið gyðingahatrið er meðal þeirra. Þið hljótið öll að vita hvernig sá mælir virkar. Menn sem eru gyðingahatarar eru ekki siðmenntaðir.

Füle stækkunarstjóri stækkar ekki bara ESB með íslenskum krötum og pírötum, heldur einnig með fasistum frá Úkraínu.

Oleh Tyahnybok heillar bandaríska kjána upp úr skónum. Ætli öldungardeildarþingmaðurinn viti hvaða mann Oleh geymir?

Árið 1991 skaust upp á yfirborðið flokkur í Úkraínu sem kallast Svoboda. Það þýðir "Sjálfstæði" á úkraínsku. Þetta er þó ekki neinn "Sjálfstæðisflokkur" eins sá sem á Íslandi er. Flokkur þessi er nú öfgafullur stuðningsflokkur ESB aðildar Úkraínu, og hafa liðsmenn hans verið framarlega í Euromaidan/ Torgbyltingu ESB-sinna. Svoboda fékk mikið fylgi í síðustu kosningum til úkraínska þingsins.

Jafnframt því að Svoboda-limir eru sólgnir í ESB, þá er að finna þeirra á meðal verstu gyðingahatara okkar tíma. Formaður flokksins, íþróttalæknirinn Oleh Tyahnybok, hefur iðulega látið hafa eftir sér hatursfullar yfirlýsingar í garð gyðinga. Er sverta á andstæðinginn eða stuðningsmenn Moskvu-línunnar í úkraínskum stjórnmálum er myndmálið í pólitískri umræðu í Úkraínu litað með svæsnu gyðingahatri.

Líkt og öfgafullir vinstrimenn á Vesturlöndum, íslamistar og nýnasistar nota gyðingahatur í áróðri sínum, nota meðlimir Svoboda og annarra flokka í Úkraínu gyðingahatur til að fremja stuðning sinn við ESB-aðild. Það er fínn passi inn í samkunduna í Brussel, og ESB gerir afar lítið, ef þá nokkuð, til að fordæma þessar frumstæðu kenndir ESB-sinna í Úkraínu.

"Frelsi" og ESB-draumar, sem kynt er undir með gyðingahatri, er vitanlega mjög sjúklegt fyrirbæri. Ég vona að Pawelek hinn pólskættaði ESB-útvörður Sjálfstæðisflokksins geri sér grein fyrir því, að þó Sigmundur Davíð boði ekki til þjóðaratkvæðagreiðslu um ESB-viðræður, þá séu ekki réttmætt að nota öfgafullar samlíkingar milli ESB-andstæðinga og Moskvu-línunnar í stjórnmálum Úkraínu, sér í lagi þegar helstu stuðningsmenn ESB-baráttunnar í Úkraínu hylla Hitler, Göbbels og náið samræði Úkraínumanna við 3. ríkið í Síðari heimsstyrjöld. Slíkar samlíkingar á ungur Framsóknarmaður ekki skilið. Það er einfaldlega of rætið.

Oleh fasistaforingi í Svoboda, sem ólmur vill ganga í ESB, og sem beitir fyrir sér hinu sívinsæla gyðingahatri, var eitt sinn trúr og tryggur Moskvudrengur, alveg eins og Stefan Füle. En ef sjálfstæðismaðurinn Pawel Bartoszek hefði skrifað um það, hefði hann auðvitað líkt Oleh Tyahnybok við þá Íslendinga sem ólmir vilja ganga í ESB . Margir þeirra sýna gyðingahatur sitt í hatri á Ísraelsríki. Í dag er Tyahnybok gjarnara að heilsa eins og Hitler.

Bein stefna inn í ESB

Ef "sjálfstæðismaðurinn" Pawel Bartoszek heldur þessu kjánalega myndmáli sínu áfram, gæti hann átt á hættu að verða sjálfur settur í bás með óbótamönnum Svobodaflokksins, jafnvel þó svo að hann sé ekki gyðingahatari eins og þeir.

En það er einmitt aðferð Pawels: Að væna menn um að vera Pútínsinnar og hatursmenn stúlknanna í Pussy Riot, eða þaðan að verra, bara vegna þess að þeir fara á Ólympíuleika og eru á móti ESB-aðild. Fyrst og síðast verður Pawel þó að gera sér grein fyrir því í þessu einkennilega lýðveldi sem hann hefur sest að í, að Ísland er ekki staðsett á landmærum Rússlands og Póllands og að lýðskrum nær ekki eins háum hæðum meðal Norðurlandaþjóða sem það gerir hjá sumum nágrönnum fyrrverandi heimalands Pawels.

Pawel Bartoszek á ekkert með að vera að ófegra menn með ógeðfelldum samlíkingum við ástand í landi, þar sem öfgamenn til hægri vilja ólmir ganga í ESB og gerast iðnaðarmenn í Danmörku og á Íslandi meðan hinn helmingur þjóðarinnar er ekki alveg eins viss í sinni sök. Það er hins vegar meirihluti Íslendinga. Meirihlutinn á Íslandi vill ekki í ESB. Látum endilega kjósa um það.

Óska ég hér með nýnasistum og gyðingahöturum í Úkraínu til hamingju með komandi aðild í ESB um leið og ég þakka Sigmundi Davíð fyrir að koma svo rögglega í veg fyrir að Íslendingar verði borðfélagar slíkra illfygla í Brussel.

Athugasemdir

[Jón Steinar Ragnarsson, 24.2.2014 kl. 18:06]

Polverjar standa í þeirri trú eftir lágfreyðandi heilaþvott í Brusselmatic þvottavélinni að lífsgæði hafi batnað þar eitthvað og frelsi aukist vegna ESB, en virðast gleyma því að um svipað leyti losnuðu þeir undan oki kommúnismans sem bjo þeim helvíti á jörð.

Þrátt fyrir þessar meintu framfarir er Pólland eitt mesta láglaunaland álfunnar og stór hluti þjóðarinnar á flottamannastatus hist og her til að komast undan nýfengnu frelsinu og gæðunum heima í mannlegri samfélög. Ekki endilega innan ESB. Kannski síst þar, því þar er ekki lengur neina atvinnu að hafa.

Pólverjar eru þakklátt viðmið um lífskjör hjá elítunni í Brussel og hafa sett launakjör evrópulanda á uppboð og gengisfellt þau meira en nokkur evrópsk flóttamannaþjóð.

Fyrir þeim er frelsið að vinna fyrir aðeins meira en skítalaun, landlausir flottamenn sæluríkisins, búandi i 10fm skonsum með 10 öðrum og éta dósamat fjarri ættingjum og vinum. Framlag þeirra m.a. lækkandi launa og verri kjara í nágrannalöndunum er ESB ómetanlegt. Corporativismanum í fimmtíuárarikinu klígjar ekki við því.

[Jón Steinar Ragnarsson, 24.2.2014 kl. 18:26]

Annars er allt þetta upphlaup aðeins til heimabrúks. Ef komið hefði fram ályktun um að setja þetta í þjóðaratkvæði nú, þá hefði Samfylkingarklíkan líka motmælt, vitandi fyrirfram hver niðurstaðan yrði. Á hvorn veginn sem er þá eru þeir búnir að vera. Málefnið eina horfið. Flokkurinn tilgangslaus og málefnalaus.

Og það meinfyndna er að þeir eiga klúðrið algerlega skuldlaust af því að þeir neituðu þjóðinni í tvígang um að kjósa um málið, örátt fyrir að tæp 80% lístu eindregnum vilja til þess.

Svo tala þeir um svik. Ó, ég hlæ og eg hlæ.

[Rafn Haraldur Sigurðsson (IP-tala skráð) 24.2.2014 kl. 18:29]

Ég held að þú sért kjáni.

Þú verður alveg æfur  ef einhver setur út á Gyðingana, en svo kallarðu mann sem er í framvarðasveit Repúblikana kjána en eins og allir vita þá eru Rebublikar í Bandaríkjunum helstu vinir Ísraels manna meðan að Demókratinn Obama  hefur margoft sett þeim stólinn fyrir dyrnar.

John McCain er víðsýnn maður og hefur reynt ýmislegt á sinni löngu ævi. T.d var hann skotinn niður yfir Víetnam árið 1967 og var handtekinn og settur í fangelsi þar sem hann mátti þola pyntingar . Honum var svo sleppt 1973. Maður mætti nú halda að maður með svona reynslu væri bitur og hefnigjarn, en það er nú öðru nær, hann var settur seinna í það að betrumbæta sambandið við Víetnam.  Skoðaðu þetta Hanoi Hilton

Ef vinirnir eru kjánar, hvað eru þá óvinirnir?

[Vilhjálmur Örn Vilhjálmsson, 24.2.2014 kl. 18:51]

Rafn, það geta ekki allið verið fullkomnir. Það þarf greinilega miklu meira en að vera skotinn í Nam til að varast öfgar Evrópu. Ef vinirnir eru eins og hann...eru það þá vinir? McCain sýnir gífurlegt ábyrgðarleysi að umgangast menn eins og Oleh Tyahnybok.

[Vilhjálmur Örn Vilhjálmsson, 24.2.2014 kl. 18:57]

Jón Steinar, ég teiknaði einu sinni skrípó um stærð Samfó. Ég er enn ánægður með verkið:

[Vilhjálmur Örn Vilhjálmsson, 24.2.2014 kl. 19:05]

Brusselmatic þvottavélinni - hvar kaupirðu svona frasa?

[Jón Steinar Ragnarsson, 24.2.2014 kl. 19:47]

Verkið er snilldargott, enda raunsæiskistaverk af hæsta klassa. Maður þekkir þá báða Fornleif og þig. Þarna hafið þið fundið eitthvað sjaldgæfara en grænlenska holdsveikisjúklinga á austfjörðum. Leyfar Sandkastalafylkingarinnar sem margir höfðu haldið vera þjóðsögu. ;)