Gyðingahatur er 350 ára hefð á Íslandi

 

Páll Magnússon hefur svarað Rabbí Abraham Cooper hjá Simon Wiesenthal Stofnuninni í Los Angeles, sem í síðustu viku benti á að gyðingar litu á Passíusálmana sem andgyðinglegan hatursboðskap og bað um að hætt yrði að lesa sálmana í útvarpi á Íslandi.

Páll Magnússon segir hins vegar, að sálmarnir séu 350 ára menningarhefð á Íslandi og að rabbí Cooper hjá Simon Wiesenthal stofnuninni misskilji þá, án þess að skýra þá yfirborðslegu yfirlýsingu sína nánar.

Enginn maður með viti getur misskilið það sem ort er um gyðinga í þessum sálmum. Þeir innihalda taumlaust gyðingahatur 17. aldar, sem Hallgrímur Pétursson og samtímamenn hans margir voru smitaðir af.  Hallgrímur Pétursson setti sig ekki í spor gyðinga eins og einn íslensku sérfræðingur í sálmunum heldur fram. Hann fordæmir þá og trú þeirra og niðrar þá á alla mögulega máta.

Heiftin og harmagráturinn var svo mikill út af bréfi Simon Wiesenthal Stofnunarinnar, að nasistar og helfararafneitarar komu líka upp úr holunum. Einn þeirra tjáði sig um að hann vildi sjá mig, sem meðvitorðsmann SWC í gagnrýninni, barinn með naglaspýtu með fimm tommu nagla á Lækjatorgi (sjá hér) Það er greinilegt að andargift Passíusálmanna er sterk hjá sumum Íslendingum.

Pólitíkusar og Passíusálmar 

Þetta hatur segir Páll Magnússon að sé 350 ára menningarhefð á Íslandi.  Jú, auðvelt er að sjá það. Áttunda árið í röð lesa íslenskir þingmenn sálmana í Grafavogskirkju (sjá hér). Það er einfaldlega í tísku að lesa sálmana, og voru þeir jafnvel komnir í tísku fyrir íslenska efnahagshrunið, þegar hagsældin stóð sem hæst - og ofmetnaðurinn.

Sálmarnir eru hugsanlega enn meira virði nú fyrir Íslendinga, þegar þeir eru gagnrýndir af útlenskri stofnun sem hefur áður verið vísað frá á Íslandi, þegar hún leitaði eftir meðferð lögregluyfirvalda og dómskerfis í máli stríðsglæpamanns frá Eistlandi sem bjó á Íslandi. Hann fór yfir móðuna miklu, friðaður af þjóð sem hefur 350 ára hefð fyrir menningarlegu gyðingahatri.

Passíusálmarnir eru orðnir að hval. Viðkvæðið virðist vera: Útlendingar úti í heimi skulu ekki dirfast að koma og segja okkur fyrir verkum, eins og þegar þeir segja Íslendingum að hætta að veiða hvali. 

Trúleysingjar og Passíusálmarnir

Myndin af ofan er af yfirlýstum trúleysingja, umhverfisráðherra Íslands, sem á unga aldri var á  Kindergarten í DDR, þegar hann pabbi hennar hennar lærði fræðin á Parteihochschule Karl Marx (Rotes Kloster) am Köllnischen Park in Berlin. Nú er trúin komin til trúlausa fólksins gegnum Passíusálmana. Gæti hugsast að eitthvað í sálmunum höfði sérstaklega til fólks sem hefur haft heiftarlega stefnu gagnvart ríki gyðinga, Ísrael?

Trúleysingjar á Íslandi, sem fylgja merkjum félagsskaparins Vantrúar, hafa reyndar bent á í núverandi gagnrýni á Passíusálmana, að þeir hafi lengi (eða allt síðan 2004) bent á gyðingahatrið í Passíusálmunum (sjá hér). Mikið rétt, og var ég fyrst að uppgötva það nú. Sumir félagar Vantrúar eru hins vegar einnig mjög öflugir í stuðningi  sínum við öfl sem í dag vilja sjá gyðinga feiga. T.d. hefur meðlimur í þessum samtökum setið ráðstefnu Múslímska Bræðralagsins í Kaíró. En trúleysingjar mega eiga það að þeir sjá, að hin 350 ára hefð á Íslandi er siðlaus hatursboðskapur og tímaskekkja.

Hefðin er ekki bara siðlaus, því niðrandi orð um minnihlutahópa og trúarbrögð annarra varða við lög á Íslandi. Íslenskir þingmenn eru að brjóta lög þegar þeir lesa sálma Hallgríms Péturssonar í kirkjum, því sálmarnir fordæma trúarbrögðum annarra.  Mig minnir reyndar að slíkt hatur sé andstætt boðskap Krists, úr því litla sem ég þekki til Kristinnar trúarsetningar. Jesús var að sögn gyðingur. Passíusálmarnir eru fordómar gegn honum og þjóð hans og trú.

Þess vegna er kominn tími til að sleppa haldinu af hinni 350 ára hefð, sem byrjaði með því að fátækur prestur á Íslandi færði dóttur Brynjólfs Biskups Jónssonar sálmana til að ganga í augun á biskupi. Kristnin á Íslandi getur vel lifað án gyðingahaturs 17. aldar.

Gömul hefð

Mér sýnist að enn séu lausir dagar fyrir sálmaflutning þingmanna í Grafarvogskirkju. Hver veit, Þessi lestur gæti bjargað Íslendingum úr öllum efnahagsvandamálum? Kannski sérstaklega þeim, sem ítrekað hafa kennt gyðingum um efnahagshrunið? Sumir íslenskir glæpamenn hrunsins gáfu í skyn að gyðingar á Bretlandseyjum væru að seilast í þrotabú þeirra fyrir slikk. Stuttu eftir hrun árið 2008 sá maður fólk sem líkti Íslandi við gettó og töldu sig vera leidda í útrýmingarbúðir. (Sjá t.d. hér). Það er eitthvað að þjóð sem þarf að gera slíkt - fyrir utan fávisku. 

Ég sá að minn gamli skólafélagi úr Menntaskóla, Árni Þór Sigurðsson las 3. sálminn. Þetta fellur í kramið hjá manni sem lagði til eyðingu Ísraelsríkis hér um árið í Róttæka félaginu í Menntaskólanum við Hamrahlíð, nokkrum árum áður en stundaði nám við Moskvuháskóla. 

Revolucionario og sendiherran Árni Þór Sigurðsson á yngri árum, en það er ekki Jesús sem sést á húfunni

 

Guðmundur Steingrímsson las sálmana sl. sunnudag. Jú, það var afi hans, Hermann Jónasson ráðherra, sem lokaði Íslandi fyrir gyðingum sem flýðu ofsóknir nasista. Ég man ekki betur en að faðir Guðmundar, Steingrímur Hermannsson ráðherra, hafi líka verið afar stoltur af styttu af meðlim úr lífvarðarsveit SS-riddaraliða sem faðir hans fékk frá mektarmanni og morðingja í Þriðja ríkinu. Kannski stefni Guðmundur á ráðherratign með hefð og erfðagóssi, með SS-styttuna í einni hendi og Passíusálmana í hinni?

Passíusálmarnir og gyðingahatur eru vissulega mikil og gömul og skyldleikaræktuð hefð á Íslandi.

Alfred Kempner

Mikil var heift Íslendinga og grimmd, þegar þeir sendu gyðinginn Alfred Kempner frá Leipzig úr landi og vildu borga fyrir flutning hans frá Danmörku til Þýskalands Nasismans. Lesið.

Otto Weg (Ottó Arnaldur Magnússon)

Mikil var heiftin og illmennskan, sem olli því að dr. Ottó Weg, sem einnig kom frá Leipzig árið 1939, fékk aldrei fasta vinnu á Íslandi, þótt hann væri til skamms tíma einn lærðasti jarðfræðingurinn í landinu. Gyðingar voru ekki ráðnir til HÍ, færasti nýrnasérfræðingur Vínarborgar fékk ekki að vinna sem læknir á Íslandi (sjá hér) og aðrir gyðingar fengu ekki að stofna fyrirtæki.

Otto Weg, (síðar Ottó Arnaldur Magnússon), vann í Bretavinnunni á Reykjavíkurflugvelli og hóf síðar einkakennslu sem hann auglýsti í blöðum. Á Íslandi urðu menntunarlausir nasistar að bankastjórum, lögreglustjórum, flugmálastjórum, forstöðumönnum ÁTVR osfr., meðan einn lærðasti maðurinn sem kom til Íslands á fyrri hluta 20. aldar fékk aldrei vinnu.

Otto Weg og bróðir hans, Frans, voru sendir í fangabúðir nasista árið 1938. Frans var myrtur í desember árið 1939 í Buchenwald af mönnum sem fylgdu brjálæðingi sem í bók sinni Mein Kampf skrifaði: "... ég er sannfærður um að ég starfa fyrir hönd skapara okkar. Með því að berjast gegn Gyðingunum. Ég er að vinna verk Drottins." Ottó Weg rétt skrimti á Íslandi, þar sem menn hrópa Lifi byltingin! og Hallelúja! á eftir Passíusálmunum.

Þvílík hefð!

Athugasemdir

[Jón Steinar Ragnarsson, 3.3.2012 kl. 10:54]

Þessi Gyðingaforakt er ekki bara gömul hefð á Íslandi heldur er hún óaðskiljanlegur hluti hins svokallaða Kristindóms, vel dikteruð í trúarbókmenntum hennar og ritningu.

Menn telja sig vera að sveipa sig helgiljóma og sjálfsréttlætingu með að míga utan í þessa viðurstyggð og því hefur þessi forkakt fest rætur.

Þetta hefur ekkert með Íslendinga per se að gera Villi. Þetta er þykistuleikurinn og liggaliggaláið sem hin Kristna Kirkja hefur alið á handa sauðum sínum.

Vitfirringin og kynþáttahatrið er annars ekkert síðra í trúarbókmenntum Gyðinga, sem eru grundvöllur alls þessa. Þeir eru hinir útvöldu og allir aðrir réttdræpir í raun. Þú hefur lesið Mósebækur t.d.

Já, þessi vitfirring er raunar grunnur hinna múslimsku trúarbragða líka og hryllingur þeirra trúarbragða og öfgar eiga sér rætur í trúarritum ykkar. Þeir eru bara að taka það bókstaflega, sem flestir aðrir eru hættir að taka mark á, enda 600 árum á eftir samtímanum. Kristnin var alveg jafn öfgakennd og þetta fyrir 600 árum og ekki síst voru lögmálin ykkar og eru jafnvel eldsneytið í þennan eld.

Þið þurfið ekki að berjast gegn Gyðingahatri sem slíku. Þið þurfið að berjast gegn trúarbrögðum þeim sem eiga rætur í ykkar "hefð". Þvílík hefð það Villi!

[Vilhjálmur Örn Vilhjálmsson, 3.3.2012 kl. 14:12]

En enginn fordæmir Íslendinga í sálmum í Ísraelska útvarpinu, Jón Steinar.

Reiðilestur yfir gyðingum í Kristni og Íslam er tilfellið, þar sem bæði trúarbrögðin eru skrumskældar eftirmyndir af Gyðingdómi, ekkert verri ekkert betri. En eitt máttu  vita, að venjulegir Gyðingar stunda ekki hatursmenningu með rót í gömlum bókum sínum. Sögur af Ísraelsþjóðinni í Tanach eru ekki notaðar til að kenna ákveðnum hópum um eitt eða neitt í dag, því flestir hópar Biblíunnar hurfu af sjónarsviðinu vegna öfga. Gyðingar lifðu af vegna trúar sinnar.

[Jón Steinar Ragnarsson, 3.3.2012 kl. 17:04]

Villi, það er gersamlega út í hött hjá þér að væna alla íslendinga um Gyðingahatur þótt þeir af hégóma, hræsni og einfeldni lesi upp úr margra alda gömlum kveðskap eftir sinnisveikan sjálfsvorkunarpúka með hégómlega athyglisþörf fyrir veraldelgu og geistlegu yfirvaldi. Ósanngirnin í því er himinhrópandi hjá þér og vægast sag kyrdduð móðursýki.

Gyðingdómur er jú trúarleg skilgreining en ekki etnísk og það gerir ykkur að sama öfgafólki og þið vælið mest yfir.  Liggaliggaláið og þykisuleikurinn skilurðu. Þegar það hentar, þá er því beitt. Trúarbrögð ykkar er það sem hefur valdið hörmungunum. Bergmál þessara trúarbragða í öðrum trúarbrögðum hefur ítrekað komið í hausinn á ykkur aftur. Ef þið væruð menn til að líta upp úr þessu og hafna vitfirringunni, eins og margir góðir og gegnir gyðingar gera, þá væri von um betri tíma.

Það hatast enginn við gyðinga hér. Hatur er stórt orð Villi. ÞAð eina sem þú getur dregið upp því til stuðnigs eru gamlar skruddur eftir vitfirrinnga sem fylgdu trúarprinsippi sínu og ritningum eða þá nokkur kjánaprik sem gengu gæsagang í forugri kvosinni fyrir ríflega hálfri öld.  Þessi brígsl þín eru móðgun við alla íslendinga og ef eitthvað gæti vakið upp gamla gyðingaforakt, þá eru það svona skrif.

Þetta angar allt af léttúðlegri og skini skroppinni vænisýki. Ég er sammála þér um hnoð Hallgríms Péturssonar og fáránlegrar dýrkunnar á honum hér. Það er ekki gyðingum til höfuðs gert. Þú ert einum of sjálfhverfur á þig og þína ef þú heldur það. 

Hættu þessu fjandans rugli. Hættu að hæðast að þeim sem vilja veg trúarbragðanna minni og hugleiddu hversu brjálæðislegt rugl þetta er um leið og þú rýnir gegnum trúarbragðaþokuna.  Þú veist að þetta er skáldskapur og þvæla sem leggur fjötra á fólk. Vertu maður til að viðurkenna það. Vertu maður til að leggja þeim lið sem vilja losa heiminn við þennan vírus. Þá verður vegur gyðinga jafnt sem annarra betri hér.  

[Vilhjálmur Eyþórsson, 3.3.2012 kl. 22:00]

Þessi gyðinga- þráhyggja þín getur stundum orðið svolítið þreytandi, einkum vegna þess að þú blandar eins og margir aðrir saman andúð á gyðingum fyrr á tímum, sem byggðist eingöngu á trúarbrögðum þeirra, og fræðum 19. aldar háskólamanna, vísinda- og gáfumanna þess tíma, sem héldu því fram að fólk með þessi tilteknu trúarbrögð væru í einhverjum líffræðilegum, beinlínis vefjafræðilegum skilningi af öðrum „kyþætti“ en annað hvítt fólk, svipað og t.d dverg- svertingjar eða Ástrlíu- frumbyggjar. Nasistar tóku síðan upp þessar kenningar um „germani“ og „aría“, sem eru einfaldlega gervivísindi sem koma engum trúarbrögðum við, en eru undarlega lífseig. Andúð þess mikla snillings séra Hallgríms, byggði ekki á hatri á gyðingum sem slíkum, heldur á trúarkenningum þeirra, en kristnir menn töldu að gyðingar hefðu með því að krossfesta gyðinginn Jesús framið einhvers konar „glæp“. Þeim sást alveg yfir að án krossfestingarinnar hefði enginn kristindómur orðið til og í rauninni ætti að þakka gyðingum fyriri viðvikið.

[Vilhjálmur Örn Vilhjálmsson, 4.3.2012 kl. 06:57]

Bið að heilsa Hallgrími, Vilhjálmur Eyþórsson. En hatur á trúarkenningum sem maður útúðar með hatursglósum um þjóð og trú þeirra er gyðingahatur, reyndar bæði anti-Judaismi og antisemitismi.

Nú, ef ég hef lesið lög á Íslandi rétt, þá er það logbrot, en ég veit að yfirvöld leyfa þetta, því þegar var reynt að frá Saksóknara Ríkisins til að kanna gyðinghatur Bobby Fischers, vildi Saksónari og lögregla ekkert gera. Gyðingahatur Fischers var bæði anti-Judaismi, en fyrst og fremst antisemitismi.

Gyðingahatur og svínslegheit í garð trúarbragða gyðinga eru leyfð á Íslandi og stjórnvöld hafa lagt blessun sína yfir það. Það er ekki nema von að RúV, Þjóðkirkjan og gjaldþrota þjóðin finnist Passíusálmarnir fínir.

[Vilhjálmur Örn Vilhjálmsson, 4.3.2012 kl. 09:35]

Vilhjálmur Eyþórsson, skoðaðu bls. 13 í þessu skjali: http://homepages.uni-tuebingen.de/gerd.simon/island.pdf

.../

[Vilhjálmur Eyþórsson, 4.3.2012 kl. 17:47]

Þú ert enn að velta þér upp úr nasista- steypunni, eins og sjá má í skjalinu. En eins og faðir minn sagði oft (sem hafði lært í Þýskalandi Hitlers): „Sannur Aríi er hávaxinn eins og Göbbels, grannvaxinn eins og Göring og ljóshærður eins og Hitler“.

Þetta goðafræði- aríarugl kemur gyðingum eða gyðingdómi ákkúrat ekkert við.

[Gunnar Heiðarsson, 6.3.2012 kl. 07:37]

Vilhjálmur Örn Vilhjálmsson, ég er Íslendingur og ég hef aldrei hatað neina þjóð! Hvorki Israela, Palestínumenn né nokkra aðra þjóð!!

Ég e kristinnar trúar, en ég hef aldrei hatað aðra trúarhópa, hvorki gyðinga, múslima, né nokkurn annan trúarhóp!!

En ég hef megna ímigust á sumum einstaklingum! Kemur þar ekkert þjóðerni né trú málinu við.

Með þessum skrifum þínum reynir þú að gera lítið úr Íslendingum en gerir þér sjálfum þó mestann skaða. Þú opinberar að þú ert rasisti af verstu gerð og kemur fram þann hátt sem þú sakar aðra!!

Með því ert þú sjálfur að koma þér í hóp þeirra manna sem ég hef ímigust á!!

[Vilhjálmur Örn Vilhjálmsson, 6.3.2012 kl. 08:27]

Ég verð á verði ef einhver kálar mér . Þá ert þú, Gunnar Heiðarsson, vissulega mögulegur kandídat eftir þessi hákristnu og elskulegu skrif þín og einstöku manngæsku í minn garð.

En mér sýnist nú að Íslendingar séu "Guð" þinn og óbeit þín beinist að þeim sem hafi aðrar skoðanir en þú sjálfur. Hata minna, elska meira eins og Gúrúinn sagði! - Ég vona svo sannarlega að þetta sé ekki stór hópur manna sem þú hefur ímugust á. Ímigust, sem þú skrifaðir, er reyndar gott orð, en sjáldséð. Líklega komið af sögninni að míga.

Ég bið þig samt vel að lifa, því ég þekki þig ekki og hata þig ekki heldur. Lifðu heill.

[Gunnar Heiðarsson, 6.3.2012 kl. 17:37]

Hvergi nefni ég að kála neinum Vilhjálmur, sá hugsanaháttur er mér víðs fjarri. Það er þó það fyrsta sem þú nefnir í svari við athugasemd minni, þó ég nefni aldrei eða gef á nokkurn hátt í skyn neitt í líkingu við það. Þetta sýnir kannski best hversu fjarri við erum í hugsun!

Að hata minna og elska meira er göfugt markmð og ættu allir að fylgja því eftir, einnig þú!!

[Vilhjálmur Örn Vilhjálmsson, 6.3.2012 kl. 20:53]

Menn sem lýsa því yfir opinberlega, að persóna sé að komast í hóp þeirra sem þeir hafa megna ímugust á vegna þess að hún hefur skoðun, eru ekki beint elskulegir, Gunnar Heiðarsson. Í þessu felst óbein hótun.

Þú gerir annað um leið, sem er í raun enn aumara, og það er að væna mig um að gera lítið úr Íslendingum, sem er skrýtin ásökun um eins konar landráð.

Samkvæmt lögum er gyðingahatur glæpur, en það að gagnrýna Íslendinga er ekki glæpur. 

Það má kannski ekki gagnrýna Íslendinga? Þetta hefur mig grunað.

[Gunnar Heiðarsson, 7.3.2012 kl. 07:41]

Hvergi getur þú fundið frá mér gagnrýni á gyðingatrú, Vilhjálmur.

Og ég árétta enn að það er langur vegur milli þess að hafa ímugust á einhverjum og þess að vilja honum illt! Þar liggur okkar skoðanamunur.

Ég geri athugasemd við blogg þitt, saklausa athugasemd, að vísu með nokkuð sterkum orðum. Þú tekur það sem morðhótun!! Hverskonar hugsanaháttur er eiginleg í kollinum á þér?!

Ég hef forðast að skipta mér af skrifum um trúmál, þykjir þau vera þess eðlis að ekki sé takandi þátt í slíkri vitleysu. Þó hef ég stundum skoðað þitt blogg, þó þetta sé í fyrsta skipti sem ég rita inn á það.

Þú tekur skrifum mínum greinilega illa og því ætla ég að láta þetta vera mín síðustu skrif hér. Ég ætla að meðhöndla þitt blogg með sama hætti og annara þeirra sem ég hef ímugust á, með því að láta það algerlega vera að skoða það eða skipta mér af því!

Þú þarft ekki að fara með veggjum, eða líta um öxl mín vegna Vilhjálmur, það er ekki minn stíll, enda alinn upp við þau kristilegu gildi að gera engum mein!!