ESB-Stjórnin, vélarvana og aflalaus með stolinn kvóta

Forsætisráðherra fór ekki á Viðskiptaþing. Er nokkur þörf á því? Þar stjórna sjóræningjar á staurfótum sem hjálpuðu dyggilega til við að setja þjóðina á hausinn. Einn þeirra vel stæðu vill ólmur fá sér evrustoð svo hann fari ekki höllum fæti í verðbréfahöllinni í Kaupmannahöfn. Þeir ríku vilja evru í stað þess á ganga á síðustu aurunum á krónustubbunum. Þarf forsætisráðherrann nokkuð að fara á Viðskiptaþing meðan viðskiptajöfrar gera sér ekki grein fyrir því hvað evran er?  

Steini gamli sjóari, drukkinn í landi, er greinilega ýmsu vanur. Það er orðið aðal viðkvæði hans í hvert skipti sem mótbára skellur á skútunni leku. Hann ætlar sér þó ekki að fara í land þótt að þjófnaðarlög messadrengsins Árna Páls prestssonar hafi verið drekkt í Hæstarétti. Fyrr kaffærði Steini Hæstarétti - já og haldið svo kjafti.

Akfeitur yfir- og utanríkisbátsmaður, sem  rær í því alla daga að auka hag næstfeitustu þjóðar heims (og sjálfs síns), vill nú bjarga hungrandi börnum heims. Góðhjarta er hann undir öllu spikinu, enda ráðherra í ekta norrænu velferðaríki. Þetta getur hann karlinn meðan hann stefnir að því að fá fleiri kínversk veitingahús upp á öræfi og að lifa skriffinnskusníkjulífi í ESB, þar sem litlu, grísku börnin svelta. Það verða hvorki soltnu börnin í Langtiburtistan né þau grísku sem fá íslenskan fiskinn, þegar boðið verður upp Ísland í ESB.

Meðan maður er í skipafréttunum, er gott að gæta að þeim gömlu sem ættu að vera á Hrafnistu, en eru að skellast í sólarlandaferðir með Heimsferðum. Æi já, aftur er rafmangslaust í tjaldinu hjá Imbu í Kabúl. Tímarnir voru betri hér áður fyrr hjá henni og öðrum. Eins og einn vinur hennar sagði „Kosningar fáið þið, en fyrst mun ég drepa ykkur". Ætli það verði örlög Íslendinga, þeirra sem ekki verða flúnir til Noregs eftir auglýsingaherferð RÚV? Margir eru þegar dauðir úr leiðindum vegna núverandi áhafnar Stjórnarskútunnar, og sumir meðlimið áhafnarinnar viðast vera nær dauða en lífi.

Ég frétti af stjórnlausu skipi á reki í gærkvöld. Ætli það hafi verið strandhöggsskipið ESB-Stjórnin, vélarvana og aflalaust með stolinn kvóta og slitna nót?

Athugasemdir

[Ásthildur Cesil Þórðardóttir, 16.2.2012 kl. 13:31]

Góður. Sammála þér með þessa massívu gyllingu á útflutningi til Noregs sem RÚV er að gera að draumalandi íslendinga. Hvað er í gangi, þetta er bæði Sjónvarpinu og rás2.

[Vilhjálmur Örn Vilhjálmsson, 16.2.2012 kl. 14:15]

Vanþekking og heimalningsháttur. Greinilega er miklu dýrara að búa í Noregi, og ef fólk hefur ekki vinnu er þetta gífurlegt basl. Fjölskyldan sem RÚV fylgdi til Noregs var greinilega komin í lélega íbúð, helmingi minni og helmingi dýrari en húsið sem þau leigðu og yfirgáfu á Íslandi. Atvinnumissir hjónanna (voru þau ekki bæði atvinnulaus?=neyddi auðvitað fjölskylduna sem heimsótt var úr landi, en lífið í Noregi verður ekkert betra en á Íslandi.

Það ríkir einhvers konar meinloka á Íslandi um að allt sé betra úti í hinum heimi. Það er hvergi betra að vera nema á Íslandi - fyrir Íslendinga. Þrátt fyrir ónýta ríkisstjórn, eru fáir staðir betri að lifa í en á Íslandi. Íslendingar eru alltaf að miða við lífernið fyrir hrun. Það var ekkert að marka og það kemur ekkert aftur - hvorki með ESB né öðrum gjaldmiðlum en krónunni.

[Ásthildur Cesil Þórðardóttir, 16.2.2012 kl. 14:54]

Frúin var með vinnu. En mikið rétt, það er einfaldlega ekkert betra að lifa annarsstaðar bara öðruvísi. Til dæmis veit ég að fólk sem býr í blogg situr fyrir framan sjónvarpið í úlpu og með vetlinga vegna kulda. Dýrt að kynda og sennilega ekki gott að vera asmaveikur því einhver herbergi eru upphituð með timbri. Veit líka um aðstöðu í Austurríki þar er líka kynnt með timbri allan veturinn til að hita húsin því það er svo dýrt að kaupa gas og olíu.

Þetta er eitthvað sem við þekkjum ekki, og við þurfum ekki að bíða í klukkutíma eftir að komast í bað eftir að hafa þurft að kveikja á timburkyndingu í kjallarnanum. En auðvitað þarf fólk sem búið er að taka sig upp og flytja að bera sig vel.

[Kolbrún Hilmars, 18.2.2012 kl. 16:23]

Svo kunna íslendingar auðvitað ekki að höggva í eldinn og safna eldiviðnum fyrir veturinn. Hvar sem farið er um Evrópu í sumarlok, sjást fjallháir eldiviðarhlaðar í bakgörðunum.

Merkilegt nokk, hér uppi á Íslandi þurfum við að greiða sambærilegan kolefnisskatt og meginlandsbúar þótt við brennum aldrei spreki.

Þetta hljómar auðvitað eins og útúrdúr - en er það ekki í raun. Hver samþykkti íslenska kolefniskvótann í Kaupmannahöfn annar en núverandi umhverfisráðherra?

[Ásthildur Cesil Þórðardóttir, 18.2.2012 kl. 18:52]

Tek undir þetta Kolbrún vegna þess að ég hef séð þetta á mínu flandri um Evrópu alla leið frá Eistlandi niður alla EVrópu allt til Serbíu.  Og allir kynda með timbri meirihluta vetrar, og það liggur reykur yfir bæði þorpum og bæjum frá 4 á daginn langt fram á kvöld allstaðar.