Halldór sem forseta

 

Tillaga um forsetaframbjóðanda

Ég leyfi mér að stinga upp á Halldóri Guðmundssyni sem forsetaframbjóðanda. Þetta er algjör geðþóttaákvörðun hjá mér, tekin að Halldóri óspurðum. Ég veit ekki einu sinni hvort Ólafur Ragnar býður sig fram, en ef svo er, setjum við bara Halldór á ís í fjögur ár.

Ef Ólafur Ragnar ætlar hins vegar að setjast í helgan stein með Mússu sinni uppi í Mosfellsbæ, þá sé ég góðan mann í Halldóri. Vissulega er Halldór rauður undir uggum, en stjórnmálamaður er hann ekki og það væri kannski gott að fá dálitla tilbreytingu.

Mér sýnist að Halldóri sé mikið að þakka það álit sem menn hafa á Íslandi í hinum þýskumælandi heimi, álit sem mun líklega breiðast eitthvað út og gagna landi og þjóð með tíð og tíma. Bókmenntirnar gætu vissulega verið betri. Auglýsingastarf Halldórs gæti nýst vel í embætti forseta Íslands.

Þau litlu kynni sem ég hef haft af Halldóri, benda til þess að hann sé ósnobbaður menningarviti, þægilegur í framkomu, án tiktúru og tilgerðar og einstaklega viðræðugóður. Hann er einlægur og fyndinn, talandi á margar tungur og hefur mikla yfirsýn. Þannig forseta vil ég hafa.

Ég sé ekki marga kosti ef Ólafur hættir, en Halldór fengi atkvæði mitt ef hann íhugaði framboð.

Látið í ykkur heyra!

Athugasemdir

[Helgi Rúnar Jónsson (IP-tala skráð) 14.10.2011 kl. 08:06]

Ég vildi nú bara sjá hana Jóhönnu sem forseta, hún myndi sæma sig vel á Bassastöðum með spúsu sinni.

[Vilhjálmur Örn Vilhjálmsson, 14.10.2011 kl. 08:32]

Helgi Rúnar:  Hver mand sin smag, eins og Danir segja. En með allri virðingu fyrir persónunni Jóhönnu og spúsu hennar, sem er meira forsetaefni en Jóhanna, þá er tími Jóhönnu liðinn sem leiðtoga.

[Sandy, 14.10.2011 kl. 20:50]

Ég ætla nú rétt að vona að Hr Ólafur Ragnar haldi bara áfram a.m.k. þar til þessi valdasjúka ríkisstjórn er farin frá og þjóðin hefur fengið eitthvað betra við stjórnvölin.

[ABC (IP-tala skráð) 14.10.2011 kl. 20:58]

Fari dr. Ólafur Ragnar ekki fram aftur, þá hef ég trú á að þjóðin gæti sameinast um próf.dr. Þorvald Gylfason, sem að öllum öðrum ólöstuðum bar uppi stjórnlagaráðið og störf þess.

[Axel Jóhann Hallgrímsson, 14.10.2011 kl. 23:38]

Hefur engum dottið í hug að stinga upp á Jóni Val Jenssyni sem næsta forseta? Hann er frændi Nonna forseta frá Hrafnseyri, svo ekki vantar ætternið.

[Jón Steinar Ragnarsson, 15.10.2011 kl. 01:33]

Þorvald Gylfason?! Hahahahahahahahahahahahahahahahahahahahahahahahahahahahaha.

ABC...Þú ættir að fara í standuppið.

[Jón Steinar Ragnarsson, 15.10.2011 kl. 01:38]

Ehm...nema að þú sért Þorvaldur Gylfason, sem kæmi mér ekki á óvart...

[Axel Jóhann Hallgrímsson, 15.10.2011 kl. 20:52]

Jón Steinar, hlógu ekki margir þegar nafn Ólafs Ragnars bar fyrst á góma sem hugsanlegur kandidat í forsetaembættið?

Ætli þeir sem hvað ákafast hlógu þá, séu ekki meðal hörðustu stuðningsmanna hans núna?

[Jón Valur Jensson, 20.10.2011 kl. 10:43]

Halldór Guðmundsson er afar hæfur maður, en hefur ekkert roð í núverandi forseta, hvorki í hæfni til þessa sérstaka starfs né í almannafylgi. Jóhanna kemur að sjálfsögðu ekki til greina, menn bjóða ekki gestum sínum upp á disk af súpu sem þegar hefur valdið innanmeinum í stórum stíl, og Þorvaldur Gylfason er afleitur kostur, maður sem staðið hefur fyrir árásum á stjórnarskrárákvæði og er í ömurlegu ESB-lestinni.