Sloppy Joe - einn frægasti hundur Íslandssögunnar

 

Rakki einn á Miðnesheiði er líklega einn frægasti hundur á Íslandi á nútíma, fyrir utan Lúkas heitinn á Akureyri, sem var mexíkanskur rottuhundur sem hljóp upp í fjall og lét fólk halda að hann hefði verið kynferðislega misnotaður eða misþyrmt. Að lokum fékk það kvikindi minningargrein í flest blöð á Íslandi, líkt og eitthvað fyrirmenni.

Seppi sá, sem hér verður greint frá hefur aldrei verið fylgt almennilega til grafar. Hann bar fyrst á góma í útvarpsþætti Jónasar Árnasonar haustið 1947. Jónas hafði farið upp á Völl og reyndi þar að gera sér dælt við mórauðan hund sem þar skottaðist um. Hundurinn svaraði í engu kalli Jónasar, en dillaði rófunni og tók til fótanna upp í bragga, þegar bandarískur dáti blístraði hátt og hrópaði: "Sloppy Joe". Jónas ályktaði út frá því að seppi héti Sloppy Joe og sagði svo þessa hundasögu sína í útvarpinu.

Þjóðviljinn tók umsvifalaust upp söguna af þessu úrkynjaða hernámsdýri í leiðara. Þætti Jónasar var hins vegar fálega tekið af útvarpsráði og var honum meinuð þáttargerð þar á stofnun að sinni. Jónasi gramdist þessi málfrelsissvipting og einnig félögum hans, og hefndu þeir sín með því að gera Sloppy Joe að tákni hermangsaflanna á skopmyndum sem birtust í Þjóðviljanum,  m.a. á þeirri sem birtist í blaðinu þann 14. nóvember 1947 (sjá hér). Henni fylgdi texti, vísur sem hægt var að syngja við Gamla Nóa. Sloppy var einnig tíður gestur í Mogga, m.a. í frásögn Ívars Guðmundssonar um Keflavíkurflugvöll í Lesbók þann 4. febrúar 1951. Ívar skrifaði þetta um Sloppy:

"Hundurinn „Sloppy Joe" var ekki eins stórpólitískur og sumir vildu vera láta. Hann hjet bara "Móri", eða „Snati" eins og forfeður hans hafa heitið hund fram af hundi öldum saman, Og hann var það líkur ættingjum sínum, að hann dinglaði rófunni framan í hvern, sem ljet yel að honum, hvort heldur það var kúreki frá Kansas eða öreigi frá Astrakan. Hann gerði meira að segja ekki greinarmun á blaðamanninum, sem hændi hann að sjer með fleðulátum, en afflutti svo greyið í blöðunum á eftir."

Jónas og Þjóðviljaliðar héldu Sloppy talsvert á lofti í nokkur ár og eins brottrekstri Jónasar frá Ríkisútvarpinu. Frásögnin birtist í bók Jónasar, Sprengjan og pyngjan, sem kom út árið 1962. Seinast var Sloppy Joe sigað á landsmenn í jólablaði Þjóðviljanum árið 1987, en þá var þessi saga rifjuð upp aftur. Svo virðist sem hernámshundur þessi hafi einnig ert Moggann talsvert. Um það vitnar m.a. skopmynd í blaðinu þann 14. október 1959, þar sem Jónas Árnason er sýndur í líki Sloppys að góla á Krútsjofs í líki tunglsins.

Af því að ég er svo fjölfróður um matargerð, veit ég að Sloppy Joe er eins konar bixíborgari úr einhverju kjötkyns með miklum lauk og stundum baunum. Upplagt hermannafæði. Því læðist að manni sá grunur að hernámshundurinn margnefndi hafi kannski alls ekki heitið Sloppy Joe, heldur hafi dátinn verið að kalla á þennan ferfætta vin sinn í matinn. En hvað veit maður?

Blessuð sé minning Sloppy Joes, Jónasar Árnasonar og Þjóðviljans. Myndin efst er reyndar ekki af "Sloppy Joe", en hún er tekin á Íslandi á jólum 1947. Hundurinn á myndinni er hins vegar nútímahundur, frá módelsamtökunum Tíkin Dolly, sem tekið hefur að sér að leika Sloppy heitinn fyrir bein.

Athugasemdir

[Rafn Haraldur Sigurðsson (IP-tala skráð) 22.9.2011 kl. 18:07]

Ég hef keypt sloppy joe hjá honu Jóni Geraldi Sullenberger. Hann selur þetta í dósum sem maður blandar saman með hakki  og étur þetta svo í hamborgarabrauði. Þetta er alveg ágætis  gums svona öðru hvoru.

http://en.wikipedia.org/wiki/Sloppy_joe

[Vilhjálmur Örn Vilhjálmsson, 23.9.2011 kl. 05:30]

Rafn, nú hef ég enn ekki komist í Sullenberger Supermarkt, en ég verð auðvitað að fá mér dós af sloppy þegar ég kem næst á klakann. Jón má líka gjarna selja Sloppyið sitt með tilvísun í söguna hér að ofan . Ég þekkti nefnilega afa hans á Hringbrautinni.

Mega hundar borða þetta? Ég hef nú fengið þetta suður á Velli í æsku. Þar kom ég oft með föður mínum, sem var með fast Vegabréf á völlinn http://postdoc.blog.is/blog/postdoc/entry/173135/