Maður er nefndur Eliahu ben David Kahn

 

Hann var Ísraelsmaður sem snemma á 7. áratug síðustu aldar rak á fjörur Íslands og skaut þar rótum. Ég veit ekki hvort hann svarar lengur þessu nafni sínu, en það gerði hann að minnst kosti í byrjun 8. áratugarins þegar ég hringdi dyrabjöllunni á húsi hans í Kópavogi. Þá var ég með ávísun í umslagi til hans, sem var merkt þessu ágæta rammhebreska nafni. Eliahu, eða Elías var afar glaður yfir heimsóknum mínum og augun tindruðu í gegnum þykk gleraugun þegar hann tók á móti umslaginu. Ég var sendur með þennan glaðning til hans þegar ég vann sem sendill hjá Ríkisútvarpinu.

Maður þessi, sem þá vann hjá IBM, var einnig tónskáld, og tónskáldið Eliahu Ben David Kahn og önnur tónskáld á Íslandi fengu árlega um áramót einhvern fjárhagslegan glaðning sem sendur var frá Ríkisútvarpinu. Ég veit ekki af hverju eða fyrir hvað, en þetta hefur örugglega ekki verið mikið. Síðar, þegar ég var orðinn eldrauður borgarskæruliði í Menntaskóla, hitti ég og talaði við Elías í Keflavíkurgöngum, þar sem hann spilaði gjarna listavel á akkordíon og var seigur að tala til ungliða með miklum sannfæringarkrafti.

Í dag heitir Eliahu Kahn Elías Davíðsson og ber íslenskt vegabréf og segist vera Palestínumaður og hafnar alfarið tilvistarrétti Ísraelsríkis eins og þar er skrúfað saman í dag. Ég man eftir honum í Vesturbænum í Reykjavík, þegar ég bjó þar um tíma og því miður gat ég aldrei tengt hann Palestínu eins og hann krefst. Hann var ímynd gyðingsins gangandi í mínum augum, þó hann gengi um í of stórri Hekluúlpu og í kínaskóm.

Líkt og ég trúi því ekki að hann sé gjaldgengur Palestínumaður, trúir hann því ekki á að hryðjuverkin þann 11. september 2001 hafi verið framin af öfgafullum múslímum og predikar það á veraldarvefnum. Elías býr nú í Bonn í Þýskalandi og er, að því er mér sýnist, öfgafyllri í skoðunum en nokkru sinni fyrr.

Elías hefur nýlega (sl. júní) ritað: „I Am A Radical Antisemite And Am Proud Of It". Það verður að viðurkennast að þetta kemur mér alls ekki á óvart, en hér, hér, hér, hér, hér, hér er hægt að sjá hvernig hann skýrir þetta viðhorf sitt til Ísrael. Þessi ógeðfellda yfirlýsing hans hefur á tæplega tveimur mánuðum farið um eins og eldur í sinu um heim hinna réttlátu í hatrinu sem höndlað hafa SANNLEIKANN, og þeir geta varla  haldið vatn.

Þegar Simon Wiesenthal stofnunin í Jerúsalem byrjaði árangurslausar tilraunir sínar til að fá mál Eðvald Hinrikssonar tekið upp á Íslandi, mætti Elías eitt sinn vígreifur sem stuðningsmaður hins meinta stríðsglæpamanns á blaðamannafund Efraim Zuroffs, og blandaði eins og fleiri vinstrisinnaðir öfgamenn á Íslandi viðleitni nasistaveiðarans við deiluna við botn Miðjarðarhafs.

Á Meðfylgjandi fyrirlestrum Elíasar Davíðssonar á YouTube upplýsir hann hvernig hópur ungs fólks á Íslandi, sem Elíasi er mjög tíðrætt um, telur hryðjuverkin í Bandaríkjunum vera tilbúning og samsæri. Fólk, sem að eigin sögn getur séð í gegnum svindlnúmer Kananna, gat, þótt furðulega megi virðast,  ekki séð hvert íslenskur efnahagur stefndi fyrir hrunið, ekki frekar en kerfisfræðingurinn Elías Davíðsson.

Elías er einn af stofnendum félagsins Íslands Palestína, en nýlega ásakaði formaður þess félags mig um að vera spæjara fyrir Mossad. Já, þráhyggja er ljótur andskoti, en allt það sem hér er upplýst umfram ávísanir þær sem ég útdeildi á unga aldri er þó ekkert leyndó. Elías gengur hreint til dyra en eflaust má deila um hvernig hann gengur til skógar, ef hann gengur enn í kínaskóm í vetrarkuldum Þýskalands eins og hann gerði í slabbinu í Vesturbænum. Horfið á Elías, því svo fáir hafa gert það og látið mig vita hvað ykkur finnst.

 

Athugasemdir

[Vilhjálmur Eyþórsson, 11.8.2011 kl. 00:43]

Þetta minnir á, að ún stendur til að Háskólinn flytji til landsins annan rugludall af sömu tegurnd, nefnilega Noam Chomsky. Hann er sagður hafa verið nokkuð góður í  málvísindum áður en hann ærðist, en nú predikar hann sama guðspjall og Elías, m.a. telur Bush hafa borgað AlQaida- mönnunum fyrir að fljúga á turnana. Ég geri ráð fyrir að kosnaður við ferðalag þessa undarlega manns verði greiddur af skattborgurum.

[Halldór Carlsson (IP-tala skráð) 11.8.2011 kl. 05:16]

væri ekki eðlilegt að hafa skýringu Elíasar sjálfs á þessari fyrirsögn - hún er þó bara ein lína, þarna neðst:

- Inasmuch as the term “antisemite” now refers to human rights advocates and radical democrats, I declare myself a radical antisemite.'

[Vilhjálmur Örn Vilhjálmsson, 11.8.2011 kl. 06:55]

Halldór Carlsson, við getum ekki öll verið snillingar eins og þú. En ert þú ekki maðurinn sem kærðir Bush eldri til lögreglunnar í Reykjavík, þegar hann kom til þess að veiða á Íslandi og telur landhreinsunina á Bin Laden vera stórt númmer til að beina sjónum manna frá aðgerðum frjálsra landa í Líbýu. Þú hefur kannski boðið Ghaddafi í lax?

Kannski ertu líka gyðingahatari eins og Elías og Ghaddafi, það gæti verið vegna þess hve lengi þú hefur búið í Vín á þeim árum sem það kom í ljós að meirihluti Austurríkismanna hataði enn gyðinga. Fantíkin og þráhyggjan er víða til.

[Vilhjálmur Örn Vilhjálmsson, 11.8.2011 kl. 07:14]

Nafni, minnstu ekki á Chomsky. Hann er auðvitað á miklu hærra plani en Eliahu heitinn, bróðir Elíasar Palestínumanns, en talar ekki með þessum skrítna katalónska hreim á enskunni, sem Elías hefur komið sér upp. 

Ef Háskóli Íslands býður til landsins manni sem skrifaði formála að bók helfararafneitarans Robert Faurisson þegar árið 1980, og hefur síðan sjálfur lýst því yfir að afneitað útrýmingu ættmenna sinna sé mannréttindi, þá er sá skóli meira sjúkur en hann var fyrir.

Kannski ætti að biðja lögregluna að handtaka Chomsky við komuna til Íslands, þegar hann dorgar furðufiska í viskubrunninum HÍ.

[Halldór Carlsson (IP-tala skráð) 12.8.2011 kl. 07:18]

jú, ég, Elías og 7- 8 mannas aðrir, kærðum Bush eldri fyrir stríðsglæpi þegar hann kom hingað f. nokkrum árum, ma. fyrir viðskiptabannið á Írak sem var alfarið að undirlagi Bush eldri og er talið hafa kostað hálfa milljón írakskra barna lífið, og eins fyrir innrásina í Panama, þar sem nokkur þúsund manns var slátrað á um 4 sólarhringum -

finnst þér það undarlegt?

fleiri hafa kært hann ma. hópur þýskra og spænskra lögfræðinga.

*

annars skrifarðu undarlegan tilfinningagraut - hvernig geturðu tengt ,,landhreinsun á bin Lden" við innrás í Líbýu?

*

en fyrst þú nefnir það, þá trúi ég engu um meintan tilgang með innrásinni í Líbýu, ekki frekar en með Írak og Afganistan (nú og svo fer að koma að Sýrlandi bráðum, er það ekki?)

*

það sem þú segir um Chomsky er hlægilegt, það er amk. merki um alvarlegt rökþrot að benda á að Chomsky hafi skrifað formála í bók einhvers sem þú kallar ,,helfararafneitara" -

trúirðu því að Chomsky afneiti einhverri helför?? - og hvaða helför þá, í Þýskalandi Nasisimans eða Palestínu Nútímans? (hversvegna afneitar þú td. þeirri augljósu HELför án þess að blikna??)

*

hm .. það væri þá undarlegt, að flytja til Vínar vegna gyðingahaturs. - annars bera þessi svör þín helst vott um að þú hafir legið á Timarit.is til að reyna að finna eitthvað misjafnt um mig - verði þér að góðu, þar eru td ágætis pistlar sem ég skrifaði þegar ég var fréttaritari í Vín, og einn þeirra fjallar td. um handtöku Walter Redel, stríðsglæpamanns nasista, og handtöku hans - man ekki eftir að þau skrif séu beint löðrandi í gyðingahatri ..

*

annars þætti mér betra að sjá eitthvað aðeins efnismeira um hinn skelfilega júðahatara, Elías, en ofangreint

[Elías DAVÍÐSSON (IP-tala skráð) 12.8.2011 kl. 13:11]

Ég þakka ykkur fyrir að kynna fyrirlestur minn og senda mér þessar indælu kveðjur.  Þær kalla fram gamlar og góðar minningar.  Hér í Þýskalandi starfa einnig bræður ykkar í anda, sem rembast við að finna höggstað á mér.  Þessir skoðanabræður ykkar hér eru þó nokkuð djarfari: Þeir skipuleggja mótmælafundi fyrir utan staði þar sem ég held fyrirlestra. Ég veit reyndar ekki hvort þeim er borgað fyrir eða hvort þeir eru bara vitlausir fyrir. En svona er lífið hér. Ég vona þó að þið ætlið ekki að herma eftir skoðanabróður ykkar í Noregi, sem hatast við múslima og drap landa sína.  Hafið það sem best.

[Jón Karl (IP-tala skráð) 12.8.2011 kl. 21:39]

Með ólíkindum óheiðarlegar persónuárásir til að sverta málstað einhvers sem styður ekki eina ríki heims sem byggir tilvist sína á rasískum grunni. Þið ættuð virkilega að hugsa ykkar gang, enda farið þið yfir öll velsæmismörk hér. Það er alltaf til marks um veikan málstað að ráðast á persónu einhvers í stað þess að fjalla málefnalega um rökin sem um ræðir.

Þið byrjið svo á að gefa í skyn að Elías sé fégráðugur með litlu sögunni um umslagið. Ég veit ekki hvort þið séuð að gefa eitthvað rasískt í skyn varðandi það að hann sé fæddur sem gyðingur, erfitt að segja. 

Ég er svo heppinn að þekkja þennan heiðursmann persónulega þannig að ég get útskýrt fyrir ykkur þetta sem þú virðist ekki skilja, þ.e. hvernig hægt er að vera bæði Palestínumaður og af gyðingaættum samtímis. Landsvæðið heitir Palestína og þar býr fólk af ýmsu þjóðerni sem hefur ýmis trúarbrögð. Ísraelsríki er eina nútímaríkið sem byggist bæði de facto og de jure einungis á rasískum grunni. Valmöguleikinn við Ísrael er opið ríki sem gerir ekki upp á milli kynþátta; þar sem bæði gyðingar, múslimar og aðrir hafa jöfn réttindi. Slíkt ríki ætti að heita Palestína. Um það snýst orðræðan að hafna Ísrael. þar með er hugmyndinni um rasískt ríki hafnað. Það hefur ekkert með andúð á gyðingum að gera.

En nóg um það. Greinarhöfundur gengur hér svo langt í persónulegum árásum að ég held að hann hafi brotið lög.

[Vilhjálmur Örn Vilhjálmsson, 13.8.2011 kl. 16:01]

Þakka sömuleiðis, Elías. Það er rangt hjá þér að ég sé "samtök" og það er óþarfi að tala um mig í fleirtölu, þó ég vaxi þér greinilega mjög í augum.

Þú gengur líka ósæmilega langt í að klína brjálaða Norðmanninum Breivik á mig (og meint samtök sem þú sérð í mér). En með því staðfestir þú það sem ég sagði í færslu um daginn, að glæpur hins sjúka Norðmanns yrði misnotaður til að svína menn til ef þeir hafa aðrar skoðanir en hinir frelsuðu á vinstri vængnum. Að þú ert fljótur að sjá samsæri, sést gjörla á því að þú talar um mig sem þið. En ég er alveg einn, án nokkurra "vopna" nema huga míns, skoðana og penna sem ég vona að mér sé frjálst að nota, þó svo að vinir þínir telji ástæðu til að hefta þær með því að telja að ég hafi brotið lög. Stuðningur við hryðjuverkamenn, með því að kenna fórnarlambinu um hryðjuverkin er reyndar glæpur á Íslandi

Þú getur, Elías, lesið um mig á bloggi mínu og hvað ég stend fyrir og hvaðan ég er uppruninn, og það er eins langt frá öfgum Noregs og þeim sem þú styður sem hugsast getur. Þú þarft ekki að þakka mér "kynninguna", en þetta sem þú boðar eru auðvitað ekki mainstream skoðanir og skýrir það áhuga minn. En kannski vinnur þú eftir mottóinu "vond auglýsing er betri en engin auglýsing".

Það sem þú boðar, og segist vera og styður mjög öfgafullt í ræðu og riti, varðar örugglega við lög í Þýskalandi, sem að mínu mati er frjálst, og lýðræðislegt ríki. Líklegast stafar þér meiri hætta af vörðum laganna í Þýskalandi en einhverjum undarlegum mönnum sem þér finnst standa fyrir utan þá staði sem þú mætir á þar í landi. En farðu nú vinsamlegast ekki að tengja þá við mig í nýrri samsæriskenningu. Ég á bara vini í Þýskalandi sem eru gyðingar eða sagnfræðingar, og þá sjaldan að ég fer til landsins er það til að fara á klassíska tónleika í Berlín.

Það er dæmalaust að sjá hvernig samsærishausar í Liverpool sem komu með athugasemdir eftir fyrirlestur þinn þar, sem þú slóst reyndar marga varnagla í, urðu eftir erindi þitt að tjá sig um hatur sitt á BNA, Ísraelsríki og öðru sem er tísku að hata, og sýndu hvaða offorsi þeir fara með í samsærisrugli sínu um 9/11. Jafnvel þú virtist ekki geta svarað þeim eða jánkað ruglinu í þeim.

Jón Karl, (gott væri að fá fullt nafn þitt), það að sýna dæmi um skoðanir Elíasar Davíðssonar, sem eru aðgengilegar öllum á netinu, eru ekki persónulegar árásir, nema að þú teljir skoðanir hans hættulegar honum sjálfum.

Ég ger hvergi gefið í skyn að Elías sé fégráðugur. Þú lest á milli línanna, eða ert mjög illa læs, en það virðist vera mesti vandi samsæriskenningarsmiða. Ég lýsi fyrstu kynnum mínum af manni sem ég er að segja frá, sem hefur skoðanir sem eru vægast sagt óvenjulegar, og sem mér þykja öfgakenndar og hótum við mig persónulega og lýðræðið í heiminum. Frásögn af opinberum tékka til tónskálds árið 1976 og 77 er ekki frásögn um græðgi. Hvernig í ósköpunum getur þú tengt hlutina saman á þennan hátt? 

Aðrar minningar hef ég reyndar um Elías á Íslandi. Ég man t.d. eftir honum í Sundlaug Vesturbæjar, þar sem hann rauf friðsemd heitu pottanna og reifst við menn um alþjóðmálefni. Þegar einhver andmælti honum og stóð uppi í orðflaumi hans um Ísrael og hin vondu Bandaríki varð hann eitt sinn sótillur og fór upp úr með fúkyrðum.

Jón Karl, ef Pelstínuríki verður stofnað, er, eins og nú er fyrir löngu orðið ljóst, ekki hægt að kalla sjálfan sig gyðing um leið og maður kallar sig Palestínumann í slíku ríki. Palestína hefur aldrei verið til sem ríki! Eliahu ben David Kahn fæddist "stateless", án ríkisfangs, foreldrum sem líklegast voru ausgeburgert í Þýskalandi, á yfirráðasvæði Breta, sem settu aðfluttum gyðingum og gyðingum á flótta mjög ströng skilyrði sett af Bretum og öðrum þjóðum, sem ég þekki greinilega betur en "Palestínumaðurinn" Elías Davíðsson. T.d. gat gyðingur, sem hafði fengið breskt Palestine vegabréf (British Mandate for Palestine Passport), sem hafði fengið leyfi Breta til að setjast að í yfirráðasvæði Breta, (British Mandate), ekki fengið að snúa aftur til svæðisins eftir 1939, ef hann ferðaðist til annars lands í Evrópu en Englands. Foreldrar Eliahus voru ekki með ríkisborgararétt, hvorki sem Bretar né sem "Palestínumenn", þó svo að þau hafi haft þessi vegabréf þegar hann fæddist árið 1941. Þetta voru eingöngu vegabréf til að ferðast með. Menn með þessi vegabréf urðu við komuna til Englands að tilkynna komu sína hjá yfirvöldum og í öðrum löndum töldust gyðingar með þessi vegabréf oftast ríkisfangslausir og á ábyrgð Breta. Svo, Jón Karl, Elías hefur sagt þér ósatt um "Palestínskan" uppruna sinn.

Í Ísraelsríki, sem þú (Jón Karl) kallar rasistískt, búa Palestínuarabar, gyðingar og aðrar þjóðir hlið við hlið. Á Gaza vilja menn drepa alla gyðinga hvar sem þá er að finna, og á Vesturbakkanum vilja menn ekki að gyðingar búi þar og meirihlutinn á svæðum Palestínuaraba vill taka það land sem nú heitir Ísrael og útiloka tilvist gyðinga þar. Ef stofnað verður Palestínuríki í fyrsta sinn í sögunni verður ekki mögulegt að lifa þar sem  gyðingur? Gyðingur sem kallar sig Palestínumann er þess vegna líka alvarleg mótsögn. Enginn þvingar mann til að vera gyðing, öfugt við það sem við sjáum í ríkjum múslíma, þar sem menn eru myrtir fyrir það að vera ekki múslímar, eða ef þeir hverfa frá trúnni. Og þegar menn segjast í ofanálag vera gyðingahatarar (sem er algengasta þýðingin á anti-Semite) og Palestínumenn (eins og ED gerir), þá er málið mjög einfalt. Elías hatar greinilega uppruna sinn og vill ekki vera Gyðingur, þ.e. Ísraelsmaður. Hvort hann aðhyllist enn gyðingdóm og vilji vera gyðingur (með litlum bókstaf), kemur mér ekki við, en gyðingar eru þó reyndar í dag ekki velkomnir á Vesturbakkanum eða á Gaza, og væri hætt við því að þeir myndu ekki sætta sig við gyðing sem, kallaði sig Palestínumann og gyðingahatara.

Mér sýnist á öllu, að rök Elíasar fyrir palestínskum uppruna sínum, og staðhæfingar hans fyrir því að vera Palestínumaður séu vægast sagt nokkuð loðnar, líkt og skoðanir hans á hryðjuverkunum 11. september 2001. Elías er bara dálítið öðruvísi maður með dálítið öðruvísi skoðanir, sem er viss um að allt sé öðruvísi en honum er sagt, sem ferðast um á íslensku vegabréfi og sem flestum Palestínumönnum er alveg sama um, nema að þeir getið notað hann.

[Halldór Carlsson (IP-tala skráð) 20.8.2011 kl. 03:14]

ert þú Palestínuhatari?

getur þú ekki skilið að á þessum 2000 árum sem þið voruð í burtu varð til önnur þjóð.

á hún ekki að vera þjóð þó hún sé það (voða óvinsælt orð á Íslandi í dag)

finnst þér það rangt að Palestína sé þjóð?

[Vilhjálmur Örn Vilhjálmsson, 20.8.2011 kl. 09:59]

Halldór Carlsson, ég er alls ekki Palestínuhatari. Ég þoli hins vegar ekki öfgar þeirra sem styðja hryðjuverkadýrkun hinna ýmsu herfylkinga Palestínuaraba. Hugtakið Palestínuþjóð varð reyndar ekki til fyrr en eftir að Ísraelsríki var stofnað.

Mér finnst ekki rangt að Palestína verði ríki. En ef ríkið ætlar sér að herja á og eyða nágrannaríkinu Ísrael, eða taka land frá Ísrael, þá tel ég alrangar forsendur vera fyrir ríkinu Palestínu. 

Lausn verður að finnast, og lausnina er (að mínu mati) fyrst og fremst að finna í Jórdaníu, Líbanon og þess vegna á á Sýrlandi. Nóg er landið, en ekki í Ísrael. Ríkin verða að geta hvarfast í sátt og samlyndi á hluta Vesturbakkans. Ef Palestínuþjóð í Palestínuríki þolir ekki gyðinga á landi sínu, þá vilja Palestínumenn auðvitað ekki hafa neitt Ísrael, og það er nú aðalvandinn og ekki það að gyðingar vilji ekki Palestínuríki.