Nasistar þramma enn og aftur í Litháen

 

19 febrúar sl. greindi ég frá hinni árvissu göngu nasista og öfgamanna í Kaunas í Litháen sem fer fram með fullu leyfi yfirvalda í Litháen og undir vernd þeirra. Ég kvartaði persónulega við sendiherra Litháens á Íslandi, sem sagði mér í svari sínu að gangan hafi fyrst og fremst verið mótmæli gegn ESB. ESB andstæðingar í Litháen, sem hata Rússa, Pólverja, gyðinga og samkynhneigða, báru hins vegar borða sem hylla ráðherra litháískrar leppstjórnar nasista, sem árið 1941 undirritaði lög sem gerðu útrýmingu gyðinga mögulegar í Litháen. Samkvæmt sendiherra Litháa á Íslandi eru þeir sem mæra þann glæpamann að mótmæla gegn ESB. Ekki kaupi ég þau vafasömu rök og mótmæli þessari opinberu skýringu umboðsmanns Litháa á Íslandi.

Sl. þriðjudag, 11. mars, fóru nasistarnir enn í gönguskóna og þrömmuðu nú um götur Vilnius til að minnast fullveldisdags landsins. Nasistarnir fengu að halda ræður sínar á besta stað í borginni. Borðinn sem hyllir morðingjann Juozas Ambrazevicius-Brazaitis var aftur með í för. Lesið frásögn Prófessors Dovid Katz af uppistandinu, sem hann birti á Defending History. Ég ætti víst frekar að skrifa fyrrverandi prófessor. Litháísk yfirvöld boluðu Dovid Katz úr embætti prófessors á Jiddishdeild háskólans í Vilnius fyrir fáeinum árum. Litháar þola ekki gangrýni Katz og annarra á þeirri sögufölsun sem fer vísvitandi fram í landinu á ógeðfelldan og subbulegan hátt.

Einn þeirra stjórnmálamanna sem tók þátt í göngu nasista var Gintaras Songailas. Þann rudda hef ég hitt persónulega. Samtök sem vilja efla minningu Aage Meyer Benedictsens kríuðu peninga út úr  einhverjum ESB-sjóði sem þessi Songailas, sem er mest þekktur fyrir hatur sitt í garð samkynhneigðra, sat í. Peningarnir voru notaðir til að halda ráðstefnu til minningar Aage Meyer Benedictsen sem hvatti til sjálfstæðis Litháen um aldamótin 1900. Meyer Benedictsen var af íslensk-dönskum-gyðingaættum. Eitthvað minnkaði víst áhugi þessa litla karls, Songailas, á norrænu samstarfi  þegar hann uppgötvaði að Aage Meyer var af gyðingaættum. Á ferð til þorps, sem Benedictsen dvaldi löngum í þegar hann var í Litháen, fór þessi Songailas og annar meðlimur í litháiskum þjóðernissinnaflokki að útlista skoðunum sínum á "the little dirty country in the middle east" við erlenda gesti ráðstefnunanr. Aðrir þátttakendur lentu í orðaskaki við manngarminn og flokksfylgju hans út af þessum öfgum hans í garð Ísraels, því meirihluti þorpsbúa höfðu fyrir helförina verið gyðingar. Flestir þeirr féllu fyrir hendi Litháa.

Við síðari ráðstefnur vina Aage Meyer Benedictsens hefur Songailas sem betur fer ekki sést, en félagsskapurinn sem vill heiðra minningu hans í Litháen hefur barist í bökkum. Yfirvöld og stjórnmálamenn í Litháen styðja frekar öfgar eins og þær sem við sjáum í þessum árlegu nasistagöngum, þar sem SS-liðar, meðreiðarsveinar og böðlar meðal Litháa í síðara stríði er minnst. Fyrir utan norskan sendiherra hafa Norðurlandaþjóðirnar ekki  hreyft mótmælum. Ekki einu sinni samkynhneigður prófessor frá Íslandi, sem kenndi í Vilnius í fyrra, lét í sér heyra. Um daginn var samkynhneigð kona stungin með hnífi í kviðinn í Vilnius, þar sem hún mótmælti.

SS-manna minnst í "menningarhöfuðborg" ESB

Næstkomandi sunnudag 16. mars þramma nasistar einnig  í Lettlandi með stuðningi ríkisstjórnar Lettlands til að minnast SS-manna Letta sem Lettnesk yfirvöld líta á sem þjóðhetjur. Sú ganga er einni árlegur viðburður. Riga er Menningarborg ESB árið 2014. Riguborg heldur m.a. upp á það með göngum sem heiðra SS og morðingja gyðinga og þúsunda annarra.  ESB, sem margir örvingla Íslendingar vilja tilheyra, segir ekkert. 

Grænklæddi maðurinn sem talar í míkrófóninn á myndinni er helfarar-afneitarinn Ricardas Cekutis sem til nokkurra ára var upplýsingafulltrúi á Þjóðarmorðastofnum (Genocide center) Litháens.  Það segir eitthvað um fullveldishátíð þegar einn af aðalræðumönnunum þar er gyðingahatari og helfararafneitari. En samkvæmt Litháískum yfirvöldum á Íslandi er hann að mótmæla ESB. Gintaras Songailas er í svörtum frakka.

Hér ræðir Dr. Efraim Zuroff við Vitas Tomkus ritstjóra dagblaðsins Respublika sem ítrekað birtir svæsið gyðingahatur. Zuroff, góðvinur minn í 20 ár,  er Íslendingum vel kunnur sem sumir vinstri menn á Íslandi útúðuðu, þegar hann vildi fá Íslensk yfirvöld til að rannsaka mál Eðvalds Hinriksson. Hér er góð grein eftir Zuroff.

Lesið um öfgar ESB á

www.defendinghistory.com