Þó þú langförull legðir sérhvert land undir fót...

Það er varla að maður hafi þurrkað bloggpennann vegna frétta af veruleikaflótta Ólafs Ragnars til Abu Dhabi, að maður verður að dýfa honum aftur í  stafrænt blek til að fárast yfir fyrirhugaðri ferð hans og fjölda hirðfífla til Indlandsí janúar, þangað sem hann fer til að taka á móti Nehru- verðlaunum fyrir frábærlega vel unnin störf. Ja, ekki fær hann lof á Íslandi, svo mikið er víst.

Ég efa þó að Ólafur Austurlandafari hafi unnið mikið og þarflegt verk fyrir hinar hungruðu sveitir Indlands. Indverjar þurfa meira ein gufu og orðin tóm. Ekki hefur hann leyst óhreina og erfðalausa úr ánauð. Ekki hefur hann bjargað andliti kvenna sem hafa verið afskræmd af sýru. Ekki hefur hann komið í veg fyrir að Indland er komið á barm borgarastyrjaldar og að yfirstéttin nærir með sér drauma um að verða herraþjóð heimsins með Kínverjum. Ekki hefur hann gert neitt sem breytir óréttlætinu og hræsninni sem ríkir nafni ímyndaðrar helgimyndar Mahatma Ghandis. Hvað hefur Ólafur forseti gert fyrir stærsta gettó heimsins, Indland? Þaðan sem þrælar eru keyptir til að byggja útópíuborgir kamelriddaranna sem forsetinn okkar heimsótti í síðustu viku í Arabí? Ólafur Ragnar getur ekki einu sinni verið eigin þjóð innan handar eða til gangs.

Er viðurkenning til Ólafs Ragnars á Indlandi virkilega þess virði, að hann þurfi að ferðast Indlands með hirð, meðan ekki eru til nægilegt fjármang til að reka spítala og dagheimili á Íslandi? Ætli einhverjum á Indlandi þætti það ekki áhugavert? Einn þriðji þeirra sér auðvitað aldrei spítala eða dagheimili og þeir eru svo þaulvanir óréttlæti, spillingu og ósiðlegu framferði heldrimanna í nafni lýðræðis að þeir deyja vegna þess. Kannski eru Óli og Össur að sækja hugmyndir á Indlandi til þess að hægt sé að byggja upp sem mest óréttlæti og ójöfnuð í vosbúðinni í nýrri verbúð ESB, þar sem menn borga leigusölum sínum Bretum og Hollendingum fyrir tilveruréttinn?

Aumingja Dorrit að eiga svona mann!

Viðbót: 

Forsetaritari fullvissar nú alla um að Indlandsferð Ólafs og Össurar muni ekki kosta íslenska skattgreiðendur svo mikið sem einn grænan eyri. Fátæklingarnir á Indlandi borga ferðina, upphald, dagpeninga allt. Lágt er lagst!

THANK YOU INDIA

for paying everything for

Ólafur Ragnar and Össur

Athugasemdir

[Ingvi Rúnar Einarsson, 30.11.2009 kl. 12:38]

Það er að sjálfsögu ánægulegt að Ólafur fái viðurkenningu í landi,þar ein mest eymd þrífst í veröld allri.Ekki fær viðurkenningu hér,í sínu heimalandi.Dragandi með sér fullfermi flugvélar,af liði úr utanríkisráðuneyti,og þeirra formann í broddi fylkingar.Þá á kostnað þjóðar,sem þarf að snúa við hverri króna áður en eytt er.

Nú liggur fyrir söfnun áskriftar um að skora á Forseta Íslands,að skrifa ekki undir,ný lög í ICESAVE-málinu.

Er för Forsetans,farin nú til að komast undan áskorunni,og færa forsetavaldinu,vald til að hafna því.

Hverjir hafa forsetavaldið?Forsætisráðherra,Jóhanna Sigurðurdóttir,forseti alþingis Ásta Ragnheiður Jóhannesdóttir og forseti Hæstaréttar.

[Vilhjálmur Örn Vilhjálmsson, 30.11.2009 kl. 15:36]

Þakka fyrir innlitið Ingvi.

Forsetaritari fullvissar nú alla um að Indlandsferð Ólafs og Össurar muni ekki kosta íslenska skattgreiðendur svo mikið sem einn grænan eyri. Fátæklingarnir á Indlandi borga ferðina, upphald, dagpeninga allt. Lágt er lagst!

[Ingvi Rúnar Einarsson, 1.12.2009 kl. 11:03]

Sæll aftur.Ég get ekki orðum bundist.Nýlega las ég grein,þar sem ung íslensk stúlka Bára Huld Sigfúsdóttir,starfaði á Indlandi,sem sjálfboðaliði við að kenna börnum,sem voru munaðarlaus og lifðu í ræsinu.

Ég spyr:,Hvert af þeim er verðugri fulltrúi Íslands,hún eða þetta lið,sem til Indlands á kostnað indverskan almúgans. 

[Vilhjálmur Örn Vilhjálmsson, 1.12.2009 kl. 16:26]

Bára Huld er dropi í hafið en Ólafur og Össur ímyndunarveik gufa!