Málæði

Svakalega er þetta neyðarlegt fuck maður. Sjáið hvað þeim leiðist og salurinn er hálftómur, kaldur og nasjónalrómantískur. Svaka lásí að sjá svona "marga" á málræktunarþinginu um mál málanna.

Flestum er líklega meira mál að kaupa kílópakka af Starbuckkaffi hjá Jóni Gerharði í Kosti, þegar hann opnar í dag. Hann opnar verslun sem vonandi mun hjálpa efnahag fólksins, og samt er hann vart talandi á ilhýra hrognamálinu. Pólverjarnir, sem fá vinnu hjá honum, munu alveg geta gert sig skiljanlega, án þess að börnum þeirra verði hótað af siðapostulum málfasisma með því að verða ekki gjaldgengir borgarar á Íslandi ef þeir læri ekki reiprennandi íslensku.

Er núna rétti tíminn að vera á antiksölu vitavonlauss tungumáls, sem aðeins gefur vandræði og óþarfa kostnað við þýðingar í tengslum við ævintýraferð gerræðisríkisstjórnarinnar inn í ESB? Ætli Kata litla í Menntó hafi haldið erindið sitt "Út í heim á íslenskum skóm" um ferðir sínar og afætuflokksins hennar til ESB? Ekki tipplar hún um á sauðskinns- eða roðskæði?

Málkjaftæðið og þjóðarrembingurinn var svo mikill hér um árið, þegar Mjólkursamsullan auglýsti ljóshærðar og háarískar stúlkur með fléttur sem þömbuðu mjólk sér til óbóta, að þegar útrásarvíkingarnir brunduðu hankípankíi og fóníballoníi yfir þjóðina, var ekkert mál fyrir þá að fullvissa Íslendinga um að þeir væru bestir hér í heimi. Allir höfðu fyrir löngu verið dáleiddir í milksjeik og 1944- rómantík. Málið er fyrir löngu búið að aðlaga sig pulsum, pissu og prins póló. Pétur og Páll geta hvort sem ekki beygt orðið bagall.

Málræktarþing í hátíðarsal HÍ

Athugasemdir

[Gullvagninn (IP-tala skráð) 14.11.2009 kl. 15:21]

Ekki talað undir rós, flottur pistill.

[Ragnhildur Kolka, 14.11.2009 kl. 18:56]

Það var sko líf og fjör hjá Jóni Ger í Kópavoginum í dag. Þarna bætist við enn ein stoppistöðin í helgarrúnti fólks. Ungir og gamlir með fullar körfur, fyrir nú utan þá sem voru þarna bara til að sýna sig og sjá aðra.

Best þótti mér að sjá marga af bloggvinum mínum standa af sér  hrekkjabrellur tölvukerfisins án þess að bregða skapi.

Kvöldsteikin á þessum bæ verður a la Sullenberger.

[Jón Steinar Ragnarsson, 14.11.2009 kl. 21:00]

Hér á blogginu er skemmtilegur hrópandi í skinnserk, sem kaupir sér engisprettur og hunáng hjá Sulla. Eiður Gvöðnasön heitir hann og er mér óborganleg dægradvöl.  Ragnhildur Kolka er raunar alltaf þar á árbakkanum að bíða eftir skírn, stynjandi upp hallelújum eftir efninu.

Ef Eiður skrifaði ekki undi nafni, þá héldi ég sennilega að hann væri glasabarn Georgs Bjarnferðarsonar og Jóns Viðars Jónssonar.

[Sigurður Þór Guðjónsson, 15.11.2009 kl. 12:33]

''Vitavonlaust tungumál''. Ætti þá að taka upp annað tungumál, tungumál vonarinnar, hvaða tungumál þá? Ensku? Esperanto? Hebresku? Stundum veit maður ekki hvað þú ert fara. En kannski ertu þá ekkert að fara. Bara að sletta úr klaufunum og sveifla halanum.

[Jakob (IP-tala skráð) 15.11.2009 kl. 23:52]

Ég vona fyrir þína hönd að þetta sé skrifað í kaldhæðni því annars er ljóst að þú átt við vandamál að stríða.

[Vilhjálmur Örn Vilhjálmsson, 16.11.2009 kl. 11:03]

Jakob, ég vona svo sannarlega fyrir þína hönd að þú eigi við vandamál að stríða, annað er ljóst að þú skrifar þetta með kaldhæðni.