Danskur njósnari á íslensku vegabréfi

Til er upptaka af viðtali við einn helsta njósnara CIA í Danmörku, Niels Arne Frommelt (1921-2008), sem áhugamaður um sögu hefur tekið upp. Niels Arne Frommelt lýsir því yfir að hann hafi notast við íslenskt vegabréf þegar hann vann fyrir CIA utan Danmerkur. Frommelt hefur sagt frá því að hann hafi við störf sín erlendis, m.a. í Sviss og víðar, gengið fyrir að vera Íslendingur, n.t. íslenskur kaffikaupmaður, Einar Guðmundsson að nafni . Vegabréfið hafði hann fengið frá "Amerikanerne på Island", en á Íslandi hafði Frommelt aldrei verið. CIA keypti svo kaffi á uppsprengdu verði til að halda leynd yfir þessum "kaffikaupmanni" frá Íslandi, sem hafði sérstakt heimilisfang og íbúð í Kaupmannahöfn skráða á "Einar Guðmundsson". 

Heimildamaður minn tjáir mér, að þegar Íslendingar hafi haft samband við eða hitt fyrir "Einar Guðmundsson", hafi Frommelt skýrt algjöra vankunnáttu sína á Íslensku með því að hann hefði flutt ungur til Danmerkur og hefði því aldrei lært íslensku.

CIA notaði "Einar Guðmundsson" þó nokkuð í öðrum löndum en Danmörku, því hann þótti einstakur "hlerari".  Hann mun m.a. hafa hlerað í Genf og Vín, og m.a. sendinefndir Norður-Kóreu. Hann er þó mest frægur fyrir hleranir sínar á samtölum danskra kommúnista.

Þjóðsjalasafn Íslands getur ekki fundið neinn Einar Guðmundsson í Kaupmannahöfn í gögnum varðandi íslensk vegabréf frá tímabilinu 1942-1984, sem passað gæti við Frommelt.

Getur verið að CIA hafi haft aðgang að, eða stolið/falsað íslensk vegabréf fyrir njósnara sína? Íslendingar voru örugglega talin saklaus grey, sem enginn grunaði um græsku fyrr en þeir voru settir á breskan hryðjuverkalista.

Meira um þetta mál síðar.

Athugasemdir

[Hólmfríður Pétursdóttir, 3.7.2009 kl. 00:03]

Sæll Vilhjálmur, ef þú hefur lesið bloggið mitt um Dóttur njósnarans skilurðu áhuga minn á þessum málum.

Ég var að renna augum yfir PET skýrsluna, en ætla að lesa hana betur.

Ef þú verður var við frekari upplýsingar um samstarf Íslendinga og Dana þætti mér vænt um að frétta af því.

Kveðjur,

[Vilhjálmur Örn Vilhjálmsson, 3.7.2009 kl. 07:08]

Sæl Hólmfríður,

maður finnur víst ekki neitt um Ísland í skýrslum PET-Kommissionens.

Frommelt var einn helsti starfsmaður Gladio/Stay Behind samtakanna(Fimaet eða Blikkenslagerbanden)   í Danmörku.

 sjá hér

Ég hef líka gluggað í bindi 2, 5 og 6 og það er nokkuð mikið af alvarlegum villum.

Ég hef t.d. skrifað manna mest um Gestapomanninn Hans Hermannsen í bók minni Medaljens Bagside, sem hægt er að fá að láni á góðum bókasöfnum á Íslandi. Skýrsluhöfundur sem ritaði um Hans Hermannsen, og hvernig dönsk njósnateimi notast við hann eftir stríð, hefur greinilega ekki þekkt bók mína, þar sem hann gæti hafa fengið betri upplýsingar en þær skólaritgerðir sem hann vitnar í. Svo vitnar hann í skýrslu Den Parlamentariske Kommissions, án þess að athuga frumgögn, sem eru til að miklu leyti. Ef þau eru notuð, sést oft vel hve miklu var breytt áður en skýrslan var gerð. Sagnfræðingarnir sem skrifa um tímabilið 1940-50 í PET-skýrslurnar, eru einfaldlega ekki sérfræðingar í þessari sögu. Sama er víst upp á teningnum um þá sem skrifað hafa um seinni tímann. Vinur minn er að skrifa bók um það sem vantar á.

Einnig er í skýrslunum margoft greint frá tveimur lögreglumönnum Madsen og Weiss, sem njósnuðu fyrstir fyrir Ameríkana. Það gleymist að einn þeirra var í þjónustu Gestapo frá 1938 og hinn vann við það að senda kommúnista til Þýskalands í stríðinu. Í skýrslunum er því nærri haldið fram að þeir hafi verið danskir andspyrnumenn í stríðinu. Því fer fjarri og mun ég þegar ég hef betri tíma skrifa um það. BNA-menn og CIA réðu sem sagt til sín gamla nasista (sem er reyndar ekki nein ný uppgötvun). Í Danmörku réðu svo tveir fyrrverandi Gestapo-njósnarar til sín SD/Gestapo mann, sem í stríðinu hjálpaði Dönum að senda gyðinga til Þýskalands. Bæði Madsen og Weiss unnu um tíma í útlendingalögreglunni og Weiss fylgdi handteknum gyðingum til þýsku landamæranna árið 1941.

Wiedbrecht, sá sem ritaði föður þínum árið 1950, hafði einnig verið starfsmaður Fremmedafdelingen hjá Ríkislögreglustjóranum danska, og aðallega unnið með mál gyðinga, sem hann hataði á þeim árum. 

Ég hef reyndar þegar skrifað lítillega um Christian Madsen í grein sem hægt er að lesa á blogginu mínu hér til vinstri: "Ich weiss, was ich zu tun habe".  Greinin kom út í RAMBAM 15, 2006. Ég ritstýri nú RAMBAM, sem er ársrit sögufélags gyðinga í Danmörku. Á næsta ári 2010 munum við hafa stóra grein í RAMBAM um mál sem ekki var tekið á í skýrslum PET-kommissionens.

Ég gef sem sagt skýrslu danskra yfirvalda um PET (Politiets Efterretningstjenest) og dönsku leyniþjónusturnar lága einkunn.

 

Hans Hermannsen, njósnaði í Danmörku á 4. áratugnum. Gestapo-foringi í Danmörku á stríðsárunum og aðstoðarmaður danskra leyniþjónusta með milligöngu BNA eftir stríð. Þegar Hermannsen var  færður til Danmerkur eftir stríð, Lét Troels Hoff yfirmaður REA(Rigspolitiets Efterretningsafdeling), sem var forveri PET, ná í Hermannsen í sjúkrabíl til Þýskalands. Hann var falinn á spítala sem Hans Hansen. Troels Hoff var einn af þeim háttsettu embættismönnum sem bar ábyrgð á því að gyðingum og öðru flóttafólki var komið fyrir kattarnef í Danmörku í stríðinu. Samkvæmt dönskum lögum átti hann yfir sér dauðadóm. En mál hans og stríðsglæpir danskra embættismanna var ekki þekkt fyrr en bók mín Medaljens Bagside kom út

[Sigurður Þórðarson, 3.7.2009 kl. 07:56]

Mjög áhugavert.

Ég bíð spenntur eftir framhaldinu.

[Hólmfríður Pétursdóttir, 3.7.2009 kl. 16:28]

Þakka þér fyrir þetta Viljálmur.

[Vilhjálmur Örn Vilhjálmsson, 6.7.2009 kl. 13:43]

Hvað meinar þú með því, Þrymur?