Dr. Seuss um varnir Íslands

Margir þekkja þann merka mann Dr. Seuss, Theodor Seuss Geisel (1904-1991), teiknarann og rithöfundurinn heimsfræga, sem m.a. er frægur fyrir bækur sínar um Köttinn með höttinn, Fílinn Horton og Þegar trölli stal jólunum, sem ríkissjónvarpið sýndi sem teiknimynd í ein 20 ár á aðfangadag jóla og eyðilagði jól heillar kynslóðar íslenskra barna.

Á síðari heimsstyrjöld vann Dr. Seuss  við vinstri sinnað blað í New York, PM, þar sem hann teiknaði margar ádeilur á Hitler og meðreiðarsveina hans og þá sem ekki vildu berjast gegn hryðjuverkastjórn Hitlers. Sem Bandaríkjamaður af þýsku bergi brotinn var honum mikið í mun að sýna fram á trúnað sinn við Bandaríkin. Gagnrýnin var kom niður á ýmsum og fordómar ekki fjarri. Reyndar var Dr. Seuss oft mismunað vegna þess að sumir héldu að hann væri gyðingur.

Dr. Seuss teiknaði þessa mynd af nasistahættunni á Íslandi, þar sem Uncle Sam kemur okkur til bjargar. Nú er þetta allt liðin tíð, og heimurinn orðinn miklu friðsamlegri. Vinstri menn eru farnir að hatast út í gyðinga og vilja ekki ólmir í stríð eins og hann Dr. Seuss forðum.

Athugasemdir

[Carlos Ferrer (IP-tala skráð) 1.2.2009 kl. 12:59]

Það er ódýrt að kalla það gyðingahatur, að gagnrýna stríð Ísraelshers gagnvart Gazabúum og stefnu Ísraelsstjórnar gagnvart Palestínumönnum.

Ég bendi þér á það, að loftárásir á þéttbýli, stórskotaliðsárásir á borgir, árásir á hlutlaus svæði eru og verða (stríðs)glæpir, sama hver fremur þær.

Ef það er gyðingahatur að benda á þetta, þá hefur orðið öðlast merkingu, sem er öfugsnúin og röng. Þá má alveg eins segja að allt sé leyfilegt í ást og stríði.

Líka fjöldamorð.

Svo er hinsvegar ekki. Sérhver sá sem fremur "ástríðuglæp" verðskuldar refsingu. Sama á við þá sem fremja stríðsglæpi. Gyðingar jafnt sem gojim.

[Vilhjálmur Örn Vilhjálmsson, 1.2.2009 kl. 13:42]

Sæll sr. Carlos, ég vandaði orð mín eins og ég gat; sagði að vinstri menn hötuðust út í gyðinga og vilji ekki ólmir fara í stríð. Ég tel það varlega talað. Ég er líka sjálfur lítið fyrir stríð.

[Arnór Kristjánsson (IP-tala skráð) 1.2.2009 kl. 23:27]

Ég fordæmi hernaðaraðgerðir Ísraela, þ.e. morð þeirra á saklausu fólki og geri mig þar með sekan um gyðingahatur ef ég skil þig rétt. Ég fordæmi líka árásir Hamas á saklaust fólk og hlýt þar með að hata múslima líka. Ég fordæmdi líka þá vitleysinga sem komu fram með ofbeldi og skemmdarverkum í mótmælunum um daginn. Ég hata því íslendinga líka. Ég þarf greinilega að gera eitthvað í mínum málum.

[Jón (IP-tala skráð) 2.2.2009 kl. 15:36]

Þessi Arnór er greinilega alveg að drepast úr hatri og veit varla hvern hann hatar mest. Persónulega hata ég alla þá sem hata og sérstaklega þá sem hata þá sem hata. Þeir mættu hugsa sig aðeins betur um áður en þeir birta hatur sitt á almannavettvangi.