Nýjasti skrælinginn á Grænlandi

 

Ahmed Akkari var vart stiginn út úr þotunni á Grænlandi, að hann var orðinn frægasti maður þar í landi. Hann er einfaldlega búinn að skjóta öllum fyllibyttunum á grænlenska þinginu ref fyrir moskusuxarass.

Akkari er kominn til Grænlands til að kenna við barnaskólann í Narsaq/Narsap á Grænlandi. Það er lítið byggðarlag á SV-Grænlandi, á þeim slóðum sem íslenskir landnemar bjuggu fyrrum og þeir kölluðu Eystribyggð. Ekki má rugla því saman við Austurlönd.

Ahmed Akkari er frægur af endemum og það þarf ekki að undra að ekki séu allir Grænlendingar jafn hrifnir af komu hans og bæjaryfirvöld i Narsap sem réðu hann til kennslu. Sjálfur segist hann bara vera kominn til að kenna dönsku og ensku, en það er fortíð mannsins sem fær marga til að sjá rautt á Grænlandi.

Akkari kom barnungur með fjölskyldu sinni til Danmerkur frá Líbanon árið 1985. Fjölskyldan var send heim aftur þegar þar var orðið rólegt eftir borgarastyrjöldina. En það var gott að vera í Danmörku og þau komu aftur og fengu að lokum að setjast að. Akkari var yfirlýstur Dani á þeim árum sem hann sótti um ríkisfang í Danmörku. Hann sagðist ekki kunna arabísku og gæti því ekki snúið til Líbanon. Þegar hann fékk ríkisfang var það fyrsta sem hann gerði að hoppa út úr gervi sínu, og gerðist  öfgamúslími sem var reiprennandi í Kóraninum. Hann neitaði að taka í hönd skólastjórans sem afhenti honum prófskírteinið í menntó - vegna þess að hún var kona.

Frægastur hefur Akkari orði fyrir aðild sína að Múhameðs-teikningamálinu. Líklega ber enginn maður eins mikla ábyrgð á því, hvernig fór í því máli. Drengur þessi reyndist ósannsögull í meira lagi og tókst að ljúga heim múslíma fullan og koma af stað vandamáli fyrir "land sitt", sem seint verður lagfært. Líklega var það hann sem fór með mynd frá svínahrínskeppni í Frakklandi til Múslímalanda og sagði myndina vera af dönskum spaugara sem var að gera grín af múslímapresti.

Ekki er það Múhameð frændi eða teikningar af honum eða trúarofstæki Akkaris, sem stundum hefur ranglega verið nefndur imam (múslímaprestur), sem virðist valda Grænlendingum mestum vanda. Í vefblaðinu Sermitsiak segja nokkuð margir lesendur skoðun sína á Akkari. Mér sýnist nú á skrifunum, að þeir sem helst eru mótfallnir komu Akkaris til Grænlands séu STÓR-Danir, sem sitja og láta sér leiðast á Grænlandi og geta nú hatast út í eitthvað annað en Grænlendingana. Margir telja líka til ofbeldismál sem Akkari var dæmdur fyrir þegar hann var í kennaranámi. Hann reif eyra 11 ára nemanda til blóðs og sparkaði í hann liggjandi. Hvað hafði hinn 11 ára drengur gert til að verðskulda þessa sturlun Akkaris? Í leik hafði drengurinn óvart rifið slæðu af höfði systur Akkaris, sem líka var nemi í skólanum. Slíkt er ófyrirgefanlegt og í ýmsum löndum Íslams er dauðarefsing við slíku.

 

Akkari kominn til Grænlands. Spilar hann líka í 5. deild þar?

 

Á síðustu árum hafa einhverjir múslímar ofsótt Grænlendinga (utangarðsfólk) sem býr í hverfinu Gellerup í vesturhluta Árósa. Ef menn leita af fréttum af þessu, sér maður að einhvers staðar í heiminum hefur frétt þessi skolast til og menn tala um að grænlenskir múslímar séu að flæma landa sína af öðrum trúarbrögðum úr hverfinu Gellerup.

Nú er að sjá hvernig grænlenski veturinn leggst í Akkari, hvort hann berji nokkurt aðra en sjálfan sig til hita, reki alla nágranna sína í burtu með leiðindum eða reisi ígloo-moskur í nágrenni Brattahlíðar. Í versta falli nota Grænlendingar piltinn sem akkeri.

Ég tel víst, að ég sé búinn að finna ferðaskrifstofuna sem gaf Akkari hugmyndina til að fara til Grænlands. Hún heitir Akbar Reisen (sjá myndina efst). Fróðir menn segja hins vegar, að Akkari sé kominn til Grænlands til þess eins að freista þess að fá líbanska konu sína og barn til Grænlands og þannig inn í Danmörku. En ströng lög í Danmörku gera það að verkum að Akkari getur ekki fengið konu sína til Danmörku. Ef það er ástæðan, styð ég Akkari. Þessi lög eru ómannúðleg.

Og vissuð þið að fyrstu Grænlendingarnir voru Rússar! Klikkið tvisvar á hið óborganlega grín um Boas & Co. sem má skoða á Sermitsiak.gl

 

 

Athugasemdir

[Baldvin Kristjánsson, 5.9.2008 kl. 14:33]

þú hefur sérstakan húmor, ekki víst að allir fatti að þú gerir þig viljandi að fífli.

tók mig smá tíma, en sé núna að þetta er húmor.

þú gætir sjálfsagt útskýrt þetta sem þú skrifar fyrir aðstoðarskólastjóranum í Narsaq, hann talar fína íslensku. held þó hann nái ekki þessu stílbragði.

með kveðju frá suður Grænlandi

[Vilhjálmur Örn Vilhjálmsson, 5.9.2008 kl. 18:06]

Þakka þér fyrir hrósið Baldvin. Mikið er ég upp mér af því ef aðstoðarskólastjórinn í Narsaq læsi bloggið mitt.

Það verður bara að viðurkennast, að  ekki vissi ég til þess að ég hafði notað mörg stílbrögð í þessu bloggi. Var barasta að velta því fyrir mér af hverju Akkari hefði farið til Grænlands. Oft eru það desperadóar sem halda þangað eða ævintýramenn - og tek það strax fram að ég segi þar með ekkert um þig. Þú gætir allt eins verið þarna syðra vegna húðsjúkdóms.

Segi ég eitthvað ósatt um Akkari? Bið bara að heilsa honum ef þú sérð hann og vona að það sé til nóg af halalkéti. Hann deyr varla úr vosbúð. Fiskur er varla illa séður af Allah.

[Sigurður Sigurðsson, 6.9.2008 kl. 17:32]

Við Íslendingar höfum nú sent marga góða gesti þarna vestur, til dæmis einn sem kenndi hinum innfæddu að pissa á kirkjutröppur eftir umfangsmikið fyllerí. Þessa sögu heyrði ég nýlega á Grand rokk þar sem ég sat keikur innan um sjúskuðu kellingarnar sem vildu fá sér drátt fyrir svefninn.

[S.H. (IP-tala skráð) 8.9.2008 kl. 10:37]

Hade inte danskarna slängt ut fanskapet för länge sedan? Þessi híbýlaflutningur hans til Grænlands og viðbrögðin þar voru stórfréttir í sænska útvarpinu í morgun. Ekki mikil hrifning á Grænlandi að fá þennan meinta ”uppviglare” og fanatíska íslamista þangað. Þó tók , samkvæmt fréttaritara, steininn úr þegar næsta holskefla reid yfir; sem sé að maðurinn er dæmdur fyrir að hafa misþyrmt skóladreng eins og þú skýrir frá í þínum skemmtilega pistli. Hér í Svíþjóð hafa fjölmiðlar skýrt frá nýjum hótunum frá Al Qaida gegn Dönum. Það átti að afmá þá úr heimi hér. Vantar ekki alltaf dönskukennara á Íslandi ef Grænlendingar gugna á öllu saman? En ég sá að sumir Grænlendingar bjóða Akkari velkominn. Gott svo.