Dagbók Debóru

 

 

Dagbókarbrot ungrar stúlku, Debóru, hafa nú verið birt. Enginn veit hver Debóra var, en hún var enn á lífi í gettóinu í Varsjá í janúar árið 1943. Þá hafði flestum föngum í gettóinu verið smalað í dauðann í útrýmingarbúðum.

Dagbókarbrotin fundust í rústum Varsjár árið 1945 og voru geymd í áratugi af annarri stúlku sem komst lífs af. Dagbókin var ekkert annað en brenndar og samanlímdar tætlur, sem varla var hægt að lesa stafkrók í. Árið 1998 var dagbókin afhent United States Holocaust Memorial Museum í Washington til varðveislu. Forvörður við safnið í Washington uppgötvaði, þegar hún var að leysa í sundur brenndar og samanlímdar síður með vatni, að hægt var að lesa textann að einhverju leyti þegar blaðsíðurnar voru blautar. Hún tók því myndir af vatnsósa blaðsíðunum og kom þeim til þýðenda.

Hér hægt að lesa textann á ensku. Hér og hér eru blaðafréttir um dagbókina.

Eigið það við ykkur sjálf, ykkur sem finnst þessi dagbókarbrot eitthvað sem þið þurfið að líkja saman við "ástandið" á Gaza. Mikið eigið þið þá bágt.

 

Athugasemdir

[Jón Valur Jensson, 26.2.2008 kl. 13:46]

Þakka þér, Vilhjálmur, fyrir að miðla þessum minningabrotum til okkar; ég er byrjaður að fara í gegnum þau, og svo sannarlega er þetta hrikalegt að lesa um svona eftir á – níðangurslegt framferði þeirra nazistanna og eymd varnarlauss fólksins. Vonandi verður hægt að finna út, hver Debóra þessi var, þarna eru þó nöfn ættingja o.fl. við að miða. Þú heldur okkur upplýstum, ef ég þekki þig rétt. – Með góðri kveðju,

[Greta Björg Úlfsdóttir, 26.2.2008 kl. 14:09]

Þakka þér fyrir þetta, Vilhjálmur, ég ætla að fara í að lesa þetta núna á eftir.

Sjálfsagt er ekki rétt af fólki að draga beinar samlíkingar af helförinn og ástandinu á Gaza, þó rétt sé að í báðum tilvikum er um að ræða mannlega þjáningu. Alltaf er það stór spurning hvort hægt sé, eða rétt, að leggja mælistiku á hana, og þá einnig álitamál hver sú mælistika eigi að vera (?). 

[Vilhjálmur Örn Vilhjálmsson, 26.2.2008 kl. 14:19]

Greta, hvað eru eldflaugar Hamas langar? Gætum við notað þær sem mælistiku?

Ég man ekki eftir eldflaugum gyðinga í gettóunum. Því miður.

Hverjir vildu útrýma gyðingum árið 1943 og hverjir vilja gera þá nú? Er það betri mælistika? 

Ég sé akkúrat ekki neitt sem getur réttlætt að tala um gasalegt ástand og sjálfskaparvíti öfgamanna á Gaza og hörmungar gyðinga í sömu andránni.

[Greta Björg Úlfsdóttir, 26.2.2008 kl. 14:50]

Ég held nefnilega að það sé engin sanngjörn mælistika til, því ofbeldi er aldrei sanngjarnt, í hvaða mynd sem það sýnir andlit sitt.

En fyrir mér að sjá er það staðreynd að alltaf eru það saklausir borgarar, sem gera ekki aðrar kröfur til lífsins en að fá að lifa því í friði og spekt, sem verða fórnarlömb öfgamanna, hvort sem flokkur þeirra heitir Nationalsozialistische Deutsche Arbeiterpartei eða Harakat al-Muqawama al-Islamiyya (Hamas), eða eitthvað annað.