Hátt upp í himininn, fljúga skal ... belgurinn

 

Í fyrra voru liðin 50 ár síðan flugbelg var fyrst flogið yfir Íslandi. Fyrsta lofbelgsflugið á Íslandi fór fram 23. júní 1957.

Loftbelgir hafa ekki orðið stór dilla meðal Íslendinga.  Sennilega er mjög erfitt að fljúga loftbelg á Íslandi vegna óstöðugleika í veðri. Það er líklega ástæðan fyrir því að Ómar Ragnarsson valdi að fljúga flugvél og flýta þannig fyrir heimshitnuninni margumtöluðu.

Ég her aldrei flogið í loftbelg og mun aldrei gera það til neyddur, vegna þess að ég er lofthræddur og lafhræddur ef mér er lyft hærra en tvo metra frá jörðu. 

Þó svo að ég hafi ekki einu sinni verið fæddur árið 1957, hef ég nú samt sagt frá fyrsta ballónfluginu á Íslandi í máli og myndum. Það geri ég í febrúarheftinu af hinu ágæta tímariti Sagan Öll sem er nýútkomið að því er Illugi ritstjóri sagði mér í dag.

Allir flugáhugamenn, sem og frímerkjasafnarar og fagrar konur verða að kaupa Söguna Alla, ef þau vilja vita allt um belgflugið árið 1957. Þar er víst að finna ýmis konar annan fróðleik sem ætti að höfða til allra hinna.

Sagan Öll, í bomsurnar og út í næstu búð og kaupa, kaupa, kaupa....

Athugasemdir

[Ólafur Þórðarson, 23.2.2008 kl. 05:39]

Er mig að misminna eitthvað en kom ekki Zeppelin við á Íslandi á 4. áratug? Þá á ég ekki við hljómsveitina, heldur loftfarið stóra. Er það ekki flugbelgur eða kallast það eitthvað annað?

Svo þarftu ekki að vera flughræddur, en öll erum við með einhverjar fóbíur svo sem. Sjálfur treysti ég ekki fasteignasölum eða lögfræðingum! Nema ég þekki þá að fyrra bragði.

[Vilhjálmur Örn Vilhjálmsson, 23.2.2008 kl. 07:05]

Zeppelínar,  Zeppelín loftför eða Zeppelín loftskip hefur verið notað yfir stóru "bjúgflaugarnar" eða "SS-förin", svo stungið sé upp á nýyrðum sem tengjast einhverju sem Íslendingar éta.

Zeppelín loftskip er strangt tiltekið ekki flugbelgur. Ferlíkið er byggt yfir mikla og létta grind og hefur "utanborðsmótor".

Led Zeppelin hét svo hljómsveitin.

Ég er lofthræddur en ekki flughræddur. Lofthræðslan tengist því að vera í opnu umhverfi og mikilli hæð, en í flugvél líður mér afar vel, ef ég sit ekki við hliðina á 200 kg. manni með verstu svitalykt sem ég hef fundið, sem fer að bera sig vegna flughræðslu, eins og eitt sinn gerðist. Ég held að maðurinn hafi gert þetta til að fá þrjú sæti fyrir sig einan.