Nýtt flugfélag - VÖV air

Ágætu Íslendingar!

Ég leyfi mér að kynna hér stofnun nýs flugfélags sem (f)lýgur um allan heim, hvert á land sem er og með nóg rými fyrir höfuð, herðar, hné og rass, hné og rass. Flug félagsins er algjörlega vistvænt.

VÖV air er framsækið og háfleygt flugfélag sem notar 100% hreina orku, hugarorku. Hugarorka skapar hugarflug;(einnig er notast við örlítið danskt kartöflumjöl).

Flugfélag unga fólksins

Á tímum heimshitnunar og græðgi vex úr grasi ung kynslóð sem krefst þess að hún fái heiminn í sínar hendur í heilu lagi og betri en við skiljum við hann. Þessi kynslóð leggur áherslu á að lögð séu gjöld á þotueldsneyti eins og allt annað eldsneyti. Unga fólkið sem mótmælir of- og misnotkun auðlinda heimsins hefur talað. Hún vill ekki taka bílpróf eða fara í 5+ utanlandsferðir á ári líkt og foreldrar þeirra (eigingjarna og sjálfselska kynslóðin). Unga kynslóðin krefst hugarflugs. Það fær hún ódýrt hjá VöV air.

Hugarflug fer oftast fram á nóttunni, en þó geta menn einnig látið hugann fljúga með VÖV air á daginn, þegar það situr í strætisvagninum á leið til vinnu. Góð bók er ávallt góður félagi í flugferðum með VÖV air. En ein teskeið af kartöfluméli í glas af kranavatni fyrir svefninn eykur hugarflug. Kartöflumjöl er vistvænt flugeldsneyti. Það eykur upplifelsið í draumaferðum VÖV.

Meðan verið er að gera smálagfæringar á WOW vélunum, sem við fengum fyrir slikk, svo á þeim standi VÖV, er verið að búa til verðskrá. 97% skyndihækkanir á fargjöldum Icelandair, aðalsamkeppnisaðila VÖV air, verða skammvinnar ef Flugdólgsfélagið Icelandair vill vera samkeppnishæft. Icelandair mun vart geta hamlað gegn lágu verðlagi VÖV air.

Matur um borð

Vinir mínir í ferðaiðnaðinu hafa spurt mig, hvaða matur verður í boði í flugvélun VÖV. Því er auðsvarað. Fólk tekur bara kvöldmatinn sinn með sér heiman frá sér og skilar úrgöngum af sér eftir ferðina. 

Mikið hefur þegar verið spurt um flugfreyjustörf hjá VÖV air. Atvinnulausum flugfreyjum er bent á að gera það sama og farþegar VÖV. Þær eiga að láta sig dreyma og muna að taka ekki of stóran skammt af kartöfluméli. Það er þó nóg pláss á milli sætaraðanna ef þær tækju upp á því að leggja sig út í draumaferðum VÖV air. Allt flug er Judy free flug. Vitaskuld leiðinlegt fyrir Judy, en svona er það bara einu sinni. 

Aðeins einn flugmaður starfar hjá VöV Air. Hann er spænskur og heitir Don Emmanuel Delasonar.

Ég lofa ykkur svo myndum af innréttingum í íbúð minni, t.d. af sófaborðinu og útsýninu úr klósettglugganum. Ég er ekki með krana úr gulli, en alla úr platínum.

Flugfreyjur, taka ber fram: Ég er á föstu með með gömlu módeli, og henni verður ekki svo auðveldlega skipt út um sinn, enda væri það algjörlega andstætt stefnu VÖV air um endurnotkun auðlinda og 0-losun.

Flug VÖV eru Flugdólgalaus. Flug framtíðarinnr.

Flug unga fólksins

Útlendingum er ekki vísað úr landi með VÖV air.

Flugfélagið VÖV - Hugarflug - Engin losun eða losaraháttur

LÁTIÐ YKKUR DREYMA eða lesið góða bók.

FEEL THE VÖV FACTOR

Athugasemdir

[Vilhjálmur Örn Vilhjálmsson, 29.3.2019 kl. 09:49]

Við fljúgum með sendiherrana heim

VÖV-air

[Halldór Egill Guðnason, 30.3.2019 kl. 03:43]

"Gosh" ég er kominn á loft!

 Góðar stundir, með kveðju að sunnan.

[Vilhjálmur Örn Vilhjálmsson, 30.3.2019 kl. 04:39]

Góða ferð!