Ísland best í heimi hér

Hið frumstæða miðaldamorðveldi Sádi-Arabía hefur um langt árabil staðið fremst meðal þjóða sem virða mannréttindi að vettugi. Sádi og leppríki þeirra leggjast á eitt að stunda endalausa gangrýni á Ísraelsríki, en gera ekkert til að bæta algjört mannréttindaleysi í heimalöndum sínum. Þrátt fyrir lýðræði og full mannréttindi í Ísraelríki er Mannréttindaráð SÞ notað í hlægilegar sirkusæfingar gegn Ísraelríki, sem stöðugt fær á sig ákúrur frá öfgaríkjum í ráðinu fyrir að verja sig árásum frá nágrönnum sem ætla sér að útrýma Ísrael og sem um leið fótumtroða mannréttindi á eigin íbúum.

Því er svo fagurt og uppbyggjandi að sjá að örlitla Ísland, þessa hreinu og tæru grjóttúndru - sem telur sig hafa sérleyfi frá hærri máttarvöldum til einhvers stórhlutverks á meðal þjóðanna og sem ímyndar sér að þar búi fallegustu konurnar og sterkustu bjánarnir o.s.fr., fari fyrir flokki stórþjóða sem eru búnar að fá nóg af mannréttindabrotum hryðjuverkaríkisins Sádi-Arabíu - og það jafnvel þó Íslendingar telji sig allt of góða og merkilega til að andmæla aðförum að Ísraelríki - aðförum og níðingshætti sem stjórnað er af hatursríkjum, sem ala á syndahafursmenningu þar sem andstæðingum er líkt við dýr á frumstæðan hátt.

En er ekki unaðslegt að heyra Guðlaug Þór segja þetta: +

„Mann­rétt­indi eru horn­steinn ut­an­rík­is­stefnu Íslands og við tök­um al­var­lega þá ábyrgð að vera kjör­inn full­trúi í mann­rétt­indaráði Sam­einuðu þjóðanna".

Það er hins vegar hræðilegt að sjá að ríkisstjórnin sem hann Gulli situr í er ekki samstíga í allri manngæskunni og kvenréttindabaráttunni. Um leið og Guðlaugur og ofborgaðir pótintátar utanríkisþjónustunnar fara í at við morðveldið Sádi-Arabíu, hagar annar ráðherra í ríkisstjórninni sér eins og óður Sveðjusádi. Hrjáðri, Sýrlenskættaðri konu, fórnarlambi brjálæðinga með miðaldakalífatsdrauma er vísað á hrottalegan hátt frá Íslandi, þar sem hún var rétt að finna sér grundvöll í lífinu, um leið og litlasta land í heimi montar sig af því að vera fyrir þjóðum sem storka Sádum í Öryggisráði SÞ. Þvílíkt rugl.

Skítlegheit og tvískinnungur núverandi ríkisstjórnar er klassískt, íslenskt rugl, sem einkennt hefur stjórnmál síðan 1944. Það lið sem við kjósum inn á Alþingi þarf einfaldlega að hafa betra siðgæði, eins og greinilega hefur komið fram síðan 2008. Það þarf einnig hærri greindarvísitölu en sá hópur sem nú þiggur laun fyrir að eyða tekjum fólksins í landinu. Gæðaeftirlit með Alþingismönnum verður að herða. Munið það i næstu kosningum! Krefjist gæðastimpils í stað fólks sem rænir ykkur og hlær svo að ykkur bak við tjöldin.

Morð og pyntingar í sömu setningu

Athugasemdir

[Gunnar Heiðarsson, 21.3.2019 kl. 11:24]

Góður að vanda Vilhjálmur

[Jón Steinar Ragnarsson, 21.3.2019 kl. 17:44]

Mér hefur skilist að máli þessarar konu snúist fyrst og fremst um Dyflinarsáttmálann. Hún hefur þegar hlotið hæli í Grikklandi og það er ekkert sem bendir til að Grikkland sé hættulegt land. Reyndar er það flokkað sem öruggt land.

Málið er að fólk getur ekki fengið hæli í tveim löndum eða notað lönd sem stökkpalla til landa sem ella hefðu ekki samþykkt hæli.

Eftir því sem ég kemst næst er vilji til að greiða úr málum konunnar með að krækja fram hjá Dyflinarreglugerðinni og gefa henni kost á landvist á öðrum forsendum.

Hún hefur allavega ekki verið rekin úr landi og verður líklega ekki eftir mínum skilningi. Andköf og hneykskan hafa allavega þagnað skyndilega varðandi þessa konu eftir að þetta kom fram.

Ég deili annars sýn þinni á sádana. Þeir njota þó undarlegrar friðhelgi stórveldanna í skjóli auðs síns og Gulli litli bergmálar jú bara það sem ameríkanar biðja hann um.

[Halldór Egill Guðnason, 22.3.2019 kl. 01:48]

Tek undir hvert orð síðuhafa.

Góðar stundir, með kveðju að sunnan.

[Hörður (IP-tala skráð) 23.3.2019 kl. 01:07]

góður

[Þorsteinn Siglaugsson, 23.3.2019 kl. 10:31]

Ef konan er komin með hæli á Grikklandi, hefur hún þá ekki ferðafrelsi til að koma hingað og dvelja hér eins og aðrir Evrópumenn? Eða er það einhver misskilningur?