Föstudagurinn langi í lengra lagi

 

Sæl Guðrún Hálfdánardóttir,

ég var að ljúka við að lesa óhemjulanga grein þína um Níðingsverk í skjóli kirkjunnar, sem fjallar um kvikmynd sem ég vona að verði brátt sýnd í Danmörku þar sem ég bý. Sumum þykir grein þín, sem fjallar um svo margt annað en kvikmyndina, líklega eiga við á Föstudaginn langa. Ég er ekki alveg viss um það. Ef veist væri að veikleikum fylgjenda sumra annarra trúarbragða á svo mikilvægum helgidegi í þeirra trúarbrögðum, sem Föstudagurinn langi er kristnum, held ég einhver myndi láta í sér heyra. Þetta er þó ágæt samantekt, þótt sumar setningar séu úr samhengi hjá þér og setning með umsagnarlið í viðtengingarhætti sé hafin án skýringarsetningar: "Margsinn­is er þrýst á Robin­son að hætta að grafa. Nýi rit­stjór­inn sé aðkomumaður, gyðing­ur í þokka­bót og haldi að auki hvorki upp á hafna­bolta né Bost­on Red Sox."

Ég er búinn að lesa íslenska fjölmiðla of lengi til að láta setningarfræðina valda mér áhyggjum. Það gerir hins vega tilraun þín til að líkja saman glæpum í Boston og meintum glæpum á Íslandi. Þótt menn geti verið ósammála um það sem gerðist á Íslandi, þar sem m.a. liggja engar sannanir fyrir varðandi barnaníð í kaþólsku kirkjunni á Íslandi, þá finnst mér algjör óþarfi af blaðamanni að spyrða grun um það við sannaða glæpi sem lýst er í Hollywood-mynd.

 Ég var aldrei ánægður drengur í Riftúni. Myndina tók Fräulein Müller, sem ég óttaðist mjög, á Kodak Instamatic myndavélina mína.

Ég er, ólíkt blaðamönnunum í Boston, "ekki hluti af því kerfi" sem ég hef ritað um, þegar ég hef sagt frá reynslu minni af því fólki innan kaþólsku kirkjunnar sem dæmt er af fólki á götunni án sönnunargagna. Ég er ekki kristinn og allra síst kaþólikki og held hvorki með KR né Val (og þoli reyndar ekki knattspyrnu).

Ég var hins vegar barn að aldri í sumarbúðum kaþólikka á Íslandi og ég á til fjölda bréfa sem ég skrifaði þaðan og ljósmynda sem ég tók þar. Ég sá aldrei né upplifði neitt í þeim dúr sem erlendir starfsmenn kirkjunnar hafa verið ásakaðir um. Það vildi rannsóknarnefnd á vegum kirkjunnar ekki hlusta á vegna þess að Vatíkanið hefur fyrir löngu síðan ákveðið að fórna peðum, þegar slík mál koma upp. Öll önnur börn í Riftúni, nema tveir aðilar segja sömu sögu og ég. Hafðu samband við fólkið sem ekki upplifði það sem ásakendur gerðu. 

 

Börn dansa í Riftúni, sumarbúðum kaþólsku kirkjunnar í Ölfusi. Ég er þessi hrokkinhærði með stóra hausinn í köflóttu skyrtunni fremst á myndinni. Ég veit ekki til þess að börnin á þessari mynd hafi verið beitt kynferðisofsóknum af erlendum starfsmönnum kaþólsku kirkjunnar á Íslandi. En blaðamaður á Mogganum veit ef til vill meira en ég.

Nú er stefnan hjá Vatíkaninu að viðurkenna glæpinn og harma, þó að persónurnar sem liggi unnir sök séu látnar og geti ekki varið sig í réttarkerfinu. Það ógeðfellda í málinu á Íslandi var að rannsóknarnefndin hafði samband við hollensk-ættaðan biskup sem hafði gerst sekur um kynferðislega tilburði gagnvart börnum. Hann eldaði grátt silfur við séra George, og segja mér menn innan kaþólska safnaðarins á Íslandi að þeir hafi hatað hvern annan. Biskupi þótti George hafa of mikil völd sem skólastjóri. En biskupinn sem var það sem í daglegu tali á íslandi kallast nú "perri" var að séra George látnum látinn dæma prestinn.  Slík vinnubrögð við gerð skýrslu um glæpi eru forkastanleg og er því fólki sem skrifaði skýrsluna til ævarandi skammar og hneisu.  

Að mínu mati gengur þú, Gúðrún Háfdánardóttir, langt út fyrir velsæmismörk sem blaðamaður, þegar þú spyrðir saman ósannað og ódæmt mál sem tengjast kaþólsku kirkjunni á Íslandi og fullsönnuðum glæpum sem lýst er í kvikmyndinni Kastljós.

Ég  leyfi mér að benda á það sem ég hef ritað um málin á Íslandi. Ég sendi nefndinni sem rannsaka átti málið upplýsingar. Ekkert var notað, þótt að ég telji mig aðeins ábyggilegri heimildamann en þá einstaklinga sem sögðu "sögu sína" í fjölmiðlum. Fyrir hef verið ataður aur og fengið sendingar þar sem ég er m.a. á Eyjunni verið kallaður rassdrengur eða engill séra Georges og á Moggablogginu í einu tilviki vitorðsmaður hans. 

Í nöp við kaþólska  (skrifað 4.6.2009)
Mjög alvarlegar ásakanir  (skrifað 17.6.2011)
Á kaþólska kirkjan sök á því að menn eru í Vinstri-Grænum og Vantrú? (skrifað 20.6.2011)
Illmennska og múgæsing eru systur (skrifað 22.6.2011)
Af ýmis konar hysteríu (skrifað 23.6.2011)
Afsökunarbeiðnir vegna (meintra) glæpa (skrifað 29.6.2011)
Saga meints níðings og eins fórnarlamba hans (skrifað 29.6. 2011)
Feilnóta í Fréttatímanum ?  (skrifað 1.7.2011)
Vitnisburður Landakotsbarna í molum ?  (skrifað 4.7.2011)
Kaþólskir borga sig frá vandanum  (skrifað 17.3.2013)
Fórnir kaþólsku kirkjunnar  (skrifað 24.11.2013)
Nafn fórnarlambsins  (skrifað 27.11. 2013)
Hvar eru öll hin fórnarlömbin?  (skrifað 14.12. 2013)
Vitnið Gijsen var barnaníðingurinn (skrifað 12.4.2014)

 

Frá vígslu svefnskálans í Riftúni 6. júní 1964. Jóhannes Gunnarsson biskup gengur frá húsinu og séra Georg, meintur nauðgari, gekk í humátt á eftir með vígt vatn. Illugi Jökulsson þoldi ekki svipinn á sér Georg og taldi hann þess vegna líklegan til illverka - þegar Georg var látinn. Ég vil ekki tjá mig um svipinn á Illuga.

 

Að lokum, Guðrún, langar mig að minna þig enn einu sinni á, að þú líktir saman málum sem dæmt hefur verið í og máli þar sem dómstóll götunnar dæmdi látið fólk. Slík vinnubrögð eru því miður allt of algeng í stétt þinni - en enginn dæmir ykkur fyrir, jafnvel þótt þið hafið oft á röngu að standa. Því þótti mér henta, því syndlaus er ég heldur ekki, að kasta í þig nokkrum smásteinum til að minna þig á skyldur þínar - í von um að þú eigir áfram góðan dag á dauðdægri Meistara þíns.

Myndina efst tók ég í Riftúni sumarið 1969. Engin barnanna á myndinni hafa mér vitanlega ákært presta eða aðra starfsmenn kirkjunnar fyrir barnaníð.

Níðingsverk í skjóli kirkjunnar

Athugasemdir

[Jón Valur Jensson, 26.3.2016 kl. 00:54]

Ég tek, ágæti dr. Vilhjálmur, undir þitt álit hér á óréttléttanlegri samlíkingu Guðrúnar á misneytingarglæpunum í Boston og ásökunum um barnaníð séra Georgs í Riftúni. Engar sannanir virðast liggja fyrir um að málin geti nálgazt það að vera af sömu stærðargráðu.

Heiður áttu skilinn fyrir hugrekki þitt að skrifa um þessi mál eins og þú framast veizt rétt. Óháð álit þitt, sem aðila utan kaþólsku kirkjunnar og þekking þín á aðstæðum og krökkunum í Riftúni gerir þig mun marktækari en léttvægar fullyrðingar aðila, sem aldrei voru þarna, og eins aðila, sem var þarna og segir áratugum síðar frá því sem hann ímyndar sér eftir á að hafi gerzt meðan hann svaf.

Jafn-viðbjóðsleg og þessi barnagirndamál sumra presta hafa verið, m.a. í Boston og í Ástralíu, og viðbragðsleysið við þeim skammarlegt -- sbr. þennan pistil minn á þessum föstudegi hinum langa: PRESTAGLÆPIR og samantektina löngu eftir Guðrúnu á Mbl.is -- þá virðist mér þín dómgreind skarpari margra annarra, þegar þú ígrundar og ályktar um þessi mál og telur fráleitt að líkja  Boston-málum og Riftúns-málum saman.

[Jón Steinar Ragnarsson, 26.3.2016 kl. 01:26]

Fólk leggst gjarnan mjög lágt til að láta sér vaxa vængi.

Þessi kona er ekki ein um það. Blæðandi hjörtu sjálfsupphafningar er bókstaflega að kæfa alla samskipta og fjölmiðla. Krossfarar uppdiktaðs málstaðar berjast hart um hver er göðastur á landi hér.:)

[mcm outlet (IP-tala skráð) 20.5.2016 kl. 09:02]

Engin barnanna á myndinni hafa mér vitanlega ákært presta eða aðra starfsmenn kirkjunnar fyrir barnaníð.