Vanþekking

Viðbrögð við frétt Mbl. um uppþotin í Tallinn, sem ég lýsti í færslu minni hér á undan, sýna að söguþekking ungs fólks á Ísland ristir ekki sérstaklega djúpt. Tómas Gunnarsson á Bjórá lýsir eftir meiri þekkingu á sögu Eistlands og tengir lesendur sína í http://www.estonica.org/eng/teema.html?kateg=43 til að kenna þeim söguna. Þetta er mjög óheppilegt, þar sem saga landsins er þarna mjög niðursoðin, sérstaklega styrjaldarárin. Ekki orð um þátttöku Eistlendinga í SS og þýska hernum. Og eins og skrattinn úr sauðaleggnum er sagt að Þjóðverjar hafi drepið þá gyðinga og sígauna sem ekki hafði tekist að flýja landið áður en þeir komu. En ekkert er að finna um dráp eistneskra morðsveita á gyðingum áður en Þjóðverjar hertóku landið allt. Ekkert um Eðvald Hinriksson (Evald Mikson) og félaga hans.

Þrymur Sveinsson gleymir því að Eistlendingar voru ekki bara sakleysingar. Þrymur vill reyndar alltaf sjá það besta í fólki og er það vel.  En margir Eistlendinga sættu sig ágætlega við Sovjétokið og nýttu sér það persónulega m.a. til að senda fjendur sína til Síberíu; margir þeirra voru þar á undan grimmustu bandamen nasista, böðlar sem luku ætlunarverki Þjóðverja áður en Þjóðverjar voru komnir með tána inn í landið. Grimmd eistneskra skæruliða við gyðinga var ólýsanleg. Ég hef skrifað um málið á annan hátt en þeir Tómas á Bjórá heimildamenn hans og Þrymur Sveinsson, enda tel ég að minnismerki um hermenn bandamanna, sem féllu í stærstu styrjöld okkar heimsálfu við nasismann, eigi ekki að eyðileggja eða vanvirða. Maður trampar ekki á minningu fólks. 

Öfgafullir Eistlendingar vilja meira en þetta, þeir vilja reka allt fólk af rússneskum ættum úr landi og þeir tala um fólk af rússneskum ættum, eins og talað var um gyðinga í herferðinni gegn þeim. Hvað kemur næst? Megum við búast við útskúfun annarra minnihlutahópa, Tatara og múslima (sem lengi hafa verið í Eistlandi). Þrymur og Tómas, ætti ekki bara líka að fjarlæga Alexander Nevsky Dómkirkju rússnesku rétttrúnaðarkirkjunnar í Eistlandi (sem var byggð árið 1900)? Fer hún ekki líka í taugarnar á Eistlendingum? Ummæli forseta Eistlands um mótmælendurna valda því, að ég er í vafa um að lýðræði í landinu standi undir nafni.

Nei, Eistlendingar verða að fara sætta sig við að þeir eru blanda af þjóðarbrotum. Heitasta ósk öfgafullra eistneskra þjóðernisafla er að mega teljast til Norðurlandaþjóðanna. Ég held að það sé alveg hægt og fólk af rússneskum ættum, 25 % íbúa landsins, ætti líka að vera velkomið.

Áframhaldandi óeirðir í Tallinn

Athugasemdir

[Hallgrímur Egilsson, 28.4.2007 kl. 09:47]

Þú gleymir reyndar að minnast á að einn helsti ferðamannastaðurinn í Tallinn, f.u. gamla torgið, er Rússneskur... þ.e. Kadriorg garðurinn með höllu Katrínar og heimili Péturs Mikla rússakeisara. En hann bjó í Tallinn áður (og á meðan) hann byggði Vetrargarðinn í St. Pétursborg.

[Guðmundur Auðunsson, 28.4.2007 kl. 11:14]

Bravó Vilhjálmur fyrir mjög gott innlegg. Þetta er vanvirða við her bandamanna sem frelsuðu Evrópu úr klóm nasista með blóði sínu. Svo verða eistlendingar að átta sig á því að landið er fjölþjóða með stórum rússneskum minnihluta sem flestir eru fæddir og uppaldir í landinu. Það voru líka rússar á svæðinu fyrir Sovéttímabilið, þannig að þeir hafa jafn mikinn rétt á að búa þarna og eistlendingar.