Þeir heilsuðu svona í Vatnaskógi

 

Grískur knattspyrnumaður, Herkules Handaskakis, (nei hann heitir víst Giorgos Katidis), hefur verið settur í ævilangt leikbann hjá landsliði landsins þar sem hann rétti of hressilega út handlegginn og höndina, er hann skoraði nýverið mark.

Vísir.is hefur m.a. vakið athygli á þessari frétt. Þar er athyglisvert að sjá sumar athugasemdirnar. Þar er t.d. ein frá Guðjóni Jóhannssyni sem segir: "Þetta gyðingasmjaður er orðið grátbroslegt vægast sagt."og ellefu lesendum Vísis líkar þessi orð Guðjóns.

Ekki vissi ég að gyðingar störfuðu fyrir Knattspyrnusamband Grikklands. Er ekki vandamálið, að það eru of margir gyðingahatarar á Íslandi, sem vart vita hvað þeir eiga að gera við handleggi sína þegar svona fréttir koma inn á visir.is. 

Hættulegir tímar 

Við lifum á mjög hættulegum tímum, ef menn mega ekki rétta úr handleggnum til að sýna sigurvímu sína. Við sjáum oft knattspyrnumenn sem fangaðir eru á filmu, þar sem þeir steyta hnefann eins og kommúnistar og hryðjuverkamenn. Ekki eru þeir settir í ævilangt bann.

Enginn segir neitt við fylgismenn taparaliðsins FC Brøndby. Í fyrra bauð ég syni mínum, sem þá var 9 ára, og vinum hans tveimur á leik á Brøndby Stadion. Helstu stuðningsmenn liðsins sem stóðu fyrir aftan mark sýna oft baráttukveðju í hópæsingu sem samanstendur af þremur óðfluga handaútréttingum. Þær fyrstu tvær eru með steyttum hnefa, og sú þriðja ekki ósvipuð því sem nasistar og drengir í Vatnaskógi notuðu. Eitthvað hrópa þessir stuðningsmenn líka, en það er á svo frumstæðri dönsku að mér hefur enn ekki tekist að skilja það. Ég efast um að fleiri en 5% þeirra sem sýna þessa armlyftingar hjá Brøndby séu nasistar, og líklega eru sumir bara kratar ef dæma má út frá 2 x krepptum hnefum í þessari samsettu baráttukveðju.

 

Hvað der Hollande að gera??

Er þjálfarinn nasisti líka?

Ég veit ekkert um andlegt upplag og pólitískar skoðanir Grikkjans sem var settur í ævibann. En á hann ekki að njóta vafans. Hefur hann hótað fólki, af öðrum uppruna en grískum, útrýmingu. Er hann ekki bara að reyna að sýna góða takta og þjónka við þýsku herraþjóðina í Berlín, þar sem þessi kveðja er reyndar bönnuð með lögum. Mér finnst að við eigum við að trúa því sem Giorgos skrifar á Twitter. Hann er ekki nasisti. Hann er þjóðernissinni (eins og flestir Grikkir og Íslendingar), og á því tvennu er mikill munur.

Getur ekki einhver bent Grikkjum á, að þessi "afar saklausa" kveðja var notuð í Vatnaskógi forðum er menn hylltu íslenska fánann. En hún var líka eitt fyrsta tákn í táknmáli frummannsins þegar hann var glaður eða jafnvel graður?

Athugasemdir

[Vilhjálmur Örn Vilhjálmsson, 18.3.2013 kl. 12:02]

Æi, ég er farinn að halda að Giorgos hafi bara farið úr axlarlið.

[Carlos Ferrer (IP-tala skráð) 18.3.2013 kl. 13:37]

Ýmislegt er orðið vafasamt eftir 1926-1945 eða þar um kring. Menn verða bara að lifa við það að Nasistarnir skemmdu fullkomlega eðlileg tákn eins og hakakrossinn, gæsaganginn og rómversku kveðjuna. Ég þakka mínum sæla fyrir að krossmarkið er ekki orðið ólöglegt (krossferðirnar og galdrabrennurnar) og sakna þess að mega ekki ganga í lambhúshettu sem hylur munninn á almannafæri hér ytra (stríðið gegn hryðjuverkum) þótt kalt er í veðri.

Samfélagssáttmálinn er enda ekki skrifaður í marmara heldur vínglast eins og fólkið.

[Sindri Karl Sigurðsson, 18.3.2013 kl. 18:43]

Já það var víst ákveðin upplifun að sjá yfirmenn á skipum Eimskipa mæta í júníforminu út að borða eða á pöbbinn með kaskeitið og hnappana á árunum eftir stríð.

Fánahyllingin er ekkert til að skammast sín fyrir, meiri aumingjar þeir sem skilja hana ekki, en þeir sem framkvæma hana.