Er hann í helvíti nú?

 

 

Látinn er í hárri elli franskur tækifærisinni og fjöldamorðingi, Maurice Papon, á 97. aldursári.  Í Annarri Heimsstyrjöld skrifaði hann undir skjöl sem embættismaður í Vichy-stjórn franskra fasista. Honum tókst að koma 1500 gyðingum fyrir kattarnef. Vel af sér vikið fyrir sannkristinn heiðursmann.

Fyrir klókindi tókst honum að sleppa við afleiðingu misjörða sinna þangað til 1998, er hann var dæmdur í 10 ára fangelsi  (sem þætti vel sloppið í sumum löndum, ef maður á líf 1500 manns á samviskunni).  Papon reis til mets og mannvirðinga og var til dæmis ráðherra í ríkisstjórn Valery Giscard-D'Estaings. Giscard-D'Estaing sá greinilega ekkert athugvert við að hafa morðinga í sínum röðum. - Og svo eru Frakkar að tala um Bandaríkjamenn!

Nú varpa ég spurningu til þeirra sem vita allt um verri staðinn. Er Papon þar nú?

 

Athugasemdir

[Sigurður Þór Guðjónsson, 18.2.2007 kl. 15:57]

Vissi Giscard-D´Estaing að ráðherra sinn væri  morðingi?

[Vilhjálmur Örn Vilhjálmsson, 18.2.2007 kl. 17:07]

Þegar maður að nafni Michel Bergès uppgötvaði syndir Papons gaf han gyðingnum Michel Slitinsky upplýsingarnar, því Slitinsky hafði sloppið úr einni af rassíunum gegn þeim gyðingum sem Papon framseldi. Faðir Slitinskys var myrtur í Auschwitz.

Slitinsky fór með upplýsingarnar til dagblaðs í Frakklandi, og það var í miðri kosningabaráttunni milli Giscard-D'Estaings og Mitterands. Ekki man ég nú eftir því að Giscard-D'Estaing hafi vikið Papon úr embætti við þessar fréttir, og hafa menn oft verið reknir fyrir minni sakir. En Valéry Giscard-D'Estaing tapaði embættinu og er líklega enn ekki búinn að fyrirgefa þeim sem láku fréttum um Papon í blöðin.

Mitterand, sem líka var tækifærissinni í stríðinu, neitaði árið 1992 að biðjast afökunar fyrir hönd forvera sinna á liðveislu Vichy-stjórnarinnar við nasista. Það var fyrst Chirac sem mannaði sig í það í janúar 1998. Sama ár var Papon loks dæmdur.

Það tók sem sagt nær 17 ár fyrir Ffrakka að átta sig á meðsekt sinni.

Hvað ætli Morgunblaði hafi skrifað um Papon árið 1982?

[Sigurður Þór Guðjónsson, 18.2.2007 kl. 20:16]

Veistu annars nokkuð um heimildir (helst í bókarformi) um Erich Koch, einhvern þann ógeðslegasta af öllum ógeðslegum, sem dó 1986 níræður í pólsku fangelsi, fyrrverandi Gauleiter í A-Prússlandi og Reich Kommisar í Úkraínu? Ég hef einkennilega mikinn áhuga á gömlum illmennnum þó mér hrylli líka við þeim. Hvernig verða svona kallar þegar þeir fá Alzheimer og eru með stóra bleyju? Þá er eins gott að þeir lendi í góðum höndum sem nenna að skipta á þeim.   

[Vilhjálmur Örn Vilhjálmsson, 18.2.2007 kl. 21:31]

Það furðulega er, að utan á eru þessir menn alveg eðlilegir, en innan í er sálin samviskulaus vegna fyrri gerða. En börnin þeirra elskuðu þá sem góða feður og konurnar unnu þeim sem góðum eiginmönnum. Fórnarlömin þeirra gátu hins vegar ekki gefið okkur mat sitt. 

Reyndu að panta þessa nýju bók: 

Ralf Meindl, Ostpreußens Gauleiter. Erich Koch – eine politische Biographie. Osnabrück (Fibre Verlag) angekündigt für Januar 2007 (Dissertation an der Universität Freiburg, Veröffentlichungen des DHI Warschau, Bd. 18)

Einnig gæti bókin Stiftelsen (2003/2005) efter Danann Torben Jørgensen verið áhugaverð lesning fyrir þig.