The Holy Mackerel

Makríllinn er tvímælalaust gjöf Guðs til Íslendinga. Þessi mynd er af Kára Stefánssyni á yngri árum, þegar hann uppgötvaði þennan danska makríl í DDR í sumarbúðum barna fatlaðra kommúnistaleiðtoga frá Norðurlöndunum. Makríllinn varð besti vinur Kára í búðunum.

Eins og trúaðir og auðtrúa menn vita, hefur það tíðkast að Guðir sendi hrjáðum þjóðum gjafir af himnum, eða úr sjó.

Eins og flestir muna úr biblíusögunum, féll manna af himnum og mettaði fjöldann.  Þetta gerðist þar sem þurrt er og heitt, enda mun manna vera einhvers konar guðleg kornvara, eins og stór flasa úr gráu hári Drottins. Í löndum þar sem rignir og er kalt, fyllir guð vötnin hins vegar af fiski.  

Manna kom ekki til greina á Íslandi vegna nýlegs öskufalls (sem er verk djöfulsins og greiði hans við spillingaröflin og jarðfræðingana, sérstaklega bróður Seðlabankastjórans).

Makríllinn, Scomber scombrus, er hjálp guðanna til íslensku þjóðarinnar, því  þeir hafa hlustað á forsetann, AFS og fyndna þorskinn í ráðhúsinu í Reykjavík. Eitthvað þarf fólk að borða með 15.000 krónunum, sem gefnir voru ómögum Reykjavíkur meðan allir fara í sumarfrí. Svo er makríllinn líka orðinn þreyttur á því að vera  talinn norskur.

Allur makríllinn í ESB og Noregur hefur nú flutt búferlum til Íslands, enda hvergi betra að vera veiddur í gjörvallri veröld.

Meira get ég ekki kreist úr þessari andlegu makríltúbu minni. Njótið bara gjafa Guðs, eins lengi og þær verða veittar.

Athugasemdir

[Sigurður Þór Guðjónsson, 16.7.2010 kl. 23:12]

Þú hefðir átt að vera spámaður á dögum gamla testamentisins! 

[Helga Kristjánsdóttir, 17.7.2010 kl. 00:31]

  Makríllinn nær í æti hér,en Esb. ráðstjórn telur sig eina mega veiða hann.

[Vilhjálmur Örn Vilhjálmsson, 17.7.2010 kl. 05:15]

Sigurður Þór, ég er spámaður á dögum gamla testamentisins, einn af þeim minni, enda sá ég ekki fyrir að þú myndir loka blogginu þínu á stýrið á Mala. Hvað er að gerast? Læstir þú blogginu og ert svo búinn að tína lyklinum? Eða ertu kominn með Davíðsku og ert að flytja með Landflutningum yfir á Eyjuna? Lesendur þínir vilja svör við þessari sumarlokun. Ef ekki verður opnað verðurðu að greiða okkur 15000 kr. og 5000 á hvert barn.

Helga, Guð gefur makrílnum æti hér, svo einfalt er þetta. Þess vegna er þetta gjöf til Íslendinga.

[Sæmundur Bjarnason, 17.7.2010 kl. 06:37]

Gallinn við þig Villi er að það er erfitt fyrir óinnvígða að vita hvenær þú ert að tala í alvöru og hvenær þú ert að búa hlutina til. Ég er farinn að reikna með að allt sem þú segir sé argasti tilbúningur ef ég veit ekki fyrir víst að svo sé ekki. Annars tek ég undir þetta með Sigurð Þór, hann ætti að opna bloggið sitt aftur.

[Vilhjálmur Örn Vilhjálmsson, 17.7.2010 kl. 08:04]

Af hverju ertu svona önugur, Sæmundur? Og af hverju ertu alltaf að pæla svona mikið í bloggum annarra? Það getur ekki verið hollt.

Ég get upplýst þig, að ég lýg aldrei, en stundum, og reyndar afar sjaldan, bý ég til í gamansömum tón. Það væri ekki líft ef allt væri tekið bókstaflega. Þá hyrfi gamanið. Allt fræðilegt er hér þó pottþétt. Stjórnmál er annað mál. Það er ekki hægt að ætlast til að menn skrifi um stjórnmál án þess að búa til. Myndin er vitaskuld ekki af Kára Stefánssyni, en Makríllinn er guðs gjöf til Íslendinga.

Ótrúlegt, en SATT.

Makríllinn heitir Scomber Scombrusá latínu. En á norsku kallar hann sig venjuleg Terje eða Roald (þetta var búið til, en er þó trúlegt).

[Sæmundur Bjarnason, 17.7.2010 kl. 09:50]

Þú tekur sumt mjög hátíðlega. Til dæmis Ísrael. Hvernig á ég að vita hvað þú telur stjórnmál og hvað fræðilegt? Þó ég sé önugur þá hef ég líka gaman af að lesa skemmtilegan tilbúning. Er samt að mestu hættur að lesa skáldsögur, það fer of mikill tími í það. Það er minn háttur að pæla í bloggum annarra (reyndar fárra).

[Jón Steinar Ragnarsson, 24.7.2010 kl. 13:41]

Vildi bara senda kveðju frá Pat Condell, sem bendir á sumarreyfarann í ár.

Talandi um Guðs gjafir, þá minnir mig líka að hann hafi sent gyðingum fugla af hafi, þegar þeir voru orðnir leiðir á mannanum og kvörtuðu. Heil reiðinnar býsn, svo þeir óðu í miðja leggi í dauðum máfum. Gjöfin var þó ekki hollari en svo en að meira en þriðjungur fékk skitu og dó úr innantökum eftir að hafa góflað í sig trakteringum almættisins algóða.

Þú manst kannski eftir þessari sögu í ævintýrabókinni ykkar. Vonandi hefur höfðinginn ekki það sama í hyggju með Makrílinn, svona til að árétta að við ættum að sætta okkur við þorskhausana áfram.