Aumingja (karl)maðurinn

Karlmennskuspjall er hópur pungþungra karla í opinberu leynifélagi á Facebook. Þeir óttast mjög um hag sinn, því þeir hafa uppgötvað of seint að konur eru líka menn og að og fáeinar þeirra eru bara nokkuð klárar - þótt hægt sé að deila um allar hinar. Konan mín er t.d. klárari en ég, og þá er nú ekki mikið sagt.

Þessi hópur karla, í klípu og sálarkreppu í leynisellu á FB, hefur í mikilli leynd sagt sína skoðun á "veikara kyninu". Því kom þeim á óvart að einn í sniglavinafélaginu þeirra var hankaður í einstakri karlmennsku sinni og stóryrðum og rekinn af Háskóla í Reykjavík fyrir óvægileg orð um stúlkubörnin þar. Einhver laumukarl (kona) hafði nefnilega laumast inn á þessa harðlokuðu leynisellu spældra og önugra karla, Karlmennskuspjallið. Slík vinnubrögð sýna vitaskuld útsjónarsemi og lymskulegheit kvenna og jafnfram heimsku og afdalahátt karla í hinni endalausu baráttu kynjanna.

Nú er einn lögfræðinganna sem tókst að gera dæmda skáta úr morðingjum fenginn til að verja einn félagann í leynisamtökunum Karlmennskuspjall sem fór yfir strikið. Það sem sá reglubróðir gerði er náttúrulega miklu verra en nokkuð morð. 

Ég kenni í brjósti um karla sem telja konur vera vandamál fyrir sig. Vitaskuld er til nóg af vitavonlausum konum í mikilvægum stöðum sem karlar gegndu áður með mismunandi árangri. Málefnaleg gagnrýni á slíkar konur, sem minna á karla, á að vera leyfileg líkt og það er leyfilegt að karlar séu gagnrýndir fyrir léleg vinnubrögð. Konum leyfist hins vegar að halda sínum stöðum án þess að svara gagnrýninni, eða eru greindari en karlar því þær segja ekki neitt, svara ekki, halda kjafti. Karlar láta ávallt karlalega, en konurnar vita upp á sig skömmina, enda aldrei eins vissar í sinni sök (sakleysi) og karlar.

Ég hef alltaf haft einstaklega gaman af konum í þrívídd eða fleiri víddum, og konur með mikið í farteskinu (les heilabúinu) hafa heillað mig mest, sérstaklega ef ég skil þær ekki og þær skilja mig alls ekki.

Karlmenn skil ég hins vegar miklu verr en konur og þykja þeir flestir leiðinlegir, sjálfselskir, sjálfsuppteknir og sjálfhverfir. Takið orðið sjálf (sem fundið var upp af konu en stolið af karli) - og bætið hvaða orði sem er við - og það passar við karla.  Þeir eru með stór egó. Svo vel vill þó til að sjálfsöruggir menn með stór egó heilla flestar konur og þar með er mannkyninu við haldið, með öllum göllunum.

Ég er fyrir löngu búinn að gefast upp fyrir kvennaveldi framtíðarinnar, þar sem mikill friður mun ríkja á ströndinni í  heimshitanum. Ég fer brátt að heimta meiri virðingu af konu minni sem er útivinnandi, meðan að ég er heimavinnandi karl, kokkur, eldhúsrella, hreingerningamaður og málari svo fáeitt sé nefnt.  "Hann Vilhjálmur hélt svo fallegt heimili fyrir konuna sína" verður vonandi sagt um mig.

En ég þori bæði, get og vill - Og nú heimta ég heimshitnunarbætur.

Efst er mynd af elsta femínistanum sem sérfræðingar hafa fundið. Hún er lagin við að troða sér alls staðar inn. Myndin mun hafa verið tekin á ráðstefnu í Háskólanum í Reykjavík í vor.

Við bíðum í bragganum

A fundi borgarstjórnar Reykjavíkur 2. október 2018 var þetta ákveðið: 

Tillaga borgarfulltrúa Miðflokksins um óháða rannsókn vegna braggans í Nauthólsvík Borgarstjórn samþykkir að óháður aðili rannsaki hvers vegna framkvæmdir við endurgerð braggans í Nauthólsvík fóru langt fram úr kostnaðaráætlunum. Til grundvallar rannsókninni verði athugað hverjir höfðu umsjón með verkefninu, gáfu heimildir fyrir framúrkeyrslunni, hvort verkefnið hafi verið boðið út og hvaða verktakar unnu að verkinu. 

Meðan að við bíðum í bragganum eftir því að birt verða nöfn þeirra sem unnu í happadrætti þessu, þar sem rúmar 400 milljónir voru mjólkaðar úr sjóðum Reykjavíkur, minnist maður þess hve Þór Magnússon fyrrverandi þjóðminjavörður var alltaf svo neikvæður hvað varðar endurbætur á stríðsáraminjum hér á árum áður. Var það einfaldlega vegna ótta við fyrirsjáanlega kostnað? Ég held að hann hafi í lokin hætt að hlusta á flokkana sem sáu eftir því að Hitler heimsóttu ekki Íslands, og frekar óttast þá gæðinga sem hann sjálfur vandi á húsafriðunarspenann og sem blóðmjólkuðu hann reglulega; Átu hann jafnvel. Hver veit, kannski er einhver úr þeirra röðum enn að maka krókinn í opinbera kerfinu.

Óháð rannsókn mun vonandi veita svörin, en svona til upplýsingar frétti ég að á háskóla þeim sem kona mín vinnur á í Danmörku var heildarkostnaður við að reisa risastóra braggabyggingu til rannsókna, með öllum kostnaði, um 700.000 DKK. Það eru tæplega 12.400.000 ISK.

Eins og skipstjórar fara niður með skipum sínum standandi í brúnni, ber borgarstjórum að bera fulla ábyrgð á því sem fer úrskeiðis í rekstri borgarinnar sem þeir stýra. Furðulegt er að Dagur Barrack geti ekki sagt almenningi strax, hvernig svo stórum fjárhæðum er dreift á uppmælingaaðalinn og teiknigammana. Lögreglurannsókn á málinu kemur vitaskuld vel til greina. Þjófnaður um hábjartan dag er einmitt eitthvað fyrir lögguna.

Við bíðum öll í bröggunum, nýs og betri dags og vonum að það þurfi ekki að borga nokkur hundruð milljóna til lögfræðinga og erlendra matsfyrirtækja í braggabissness til að fá þann permanentaða í ráðhúsinu til að segja okkur skilmerkilega frá því sem gerðist.