Sýnum stuðning þeim sem frelsa vilja Íran

 

Hvar er íslenska ríkisstjórnin nú? Þegar Palestínumenn öskra og krefjast útrýmingar Ísraelsríkis, eru margir Íslendingar tilbúnir með alls kyns aðstoð. Peninga, gervilimi, sjálfsblekkingu og jafnvel hreinræktað gyðingahatur.

En þegar ein elsta menningarþjóð í Asíu, Íranar, þurfa á hjálp heimsins að halda, er forsætisráðherrann okkar víðs fjarri að skála við kollega sína á Norðurlöndum í Arnarhreiðri nasistaskálds austur á Héraði. Þeir munu víst styðja okkur inn í Fata Morgana morgunlandsins (ESB). En styður Jóhanna baráttu frelsisafla í Íran? Eða í það minnsta réttindi samkynhneigða þar í landi?

Þegar stríðið geisaði á Gaza um áramótin voru bloggarar og fréttamiðlar á Íslandi oft meira uppteknir af því en naflaskoðuninni í sambandi við hrun íslenska efnahagsundursins .

Nú, þegar íbúar eins kúgaðasta land heimsins eru hugsanlega að kasta af sér okinu, heyrist vart í Íslendingum. Þeir eru skriðnir inn í naflann á sér til að leita að kuski.  Ekki einu sinni heilög Birgitta, þingmaðurinn sem grætur Þjórsá fyrir Tíbet og er tilbúinn að deyja fyrir Palestínumenn.  Nei, hún er að reyna skilja Icesave og bjóða landsmönnum í ókeypis Tíbetbíó.

Egill Helgason, maðurinn á bak við Joly Co la la, og margt, margt fleira, sem er svo stór að alltaf sést í hann á bak við allt það sem hann stendur á bak við (og það er ekki lítið), hefur ekki úthellt galli um Amadinejad eins og hann hellir jafnan sýru og eitri í skál Ísraelsmanna.

Styðjum þau öfl í Íran, sem vilja losna undan vitleysingnum, sem Íslensk yfirvöld, eitt fárra ríkja í Evrópu ákvæðu að heiðra á ráðstefnu SÞ um mannréttindi í Genf í apríl sl.

Frjálsara Íran þýðir aukinn heimsfrið og öryggi.

Ekki tel ég  víst, að Mirhossein Mousavi sé það sem menn leggja líf sitt að veði fyrir í Íran þessa dagana. Mig grunar að ungt fólk í Íran sé að andmæla því afbrigðilega Íslam sem eyðilagt hefur hið merkilega og gamla ríki, Íran.

Athugasemdir

[Sigurður Þór Guðjónsson, 16.6.2009 kl. 20:34]

Eins og ég hef áður sagt: Amadinejad er töffari! En eflaust líka skíthæll. Kannski á þessi stuðningur eftir að koma. Ég sé ekki í anda marga Íslendinga sem eru á móti betrumbótum í Íran.

[Sigurður Þór Guðjónsson, 18.6.2009 kl. 12:35]

En nú er biðlund mín þrotin. Afhverju í ósköpunum segja ekki íslensk stjórnvöld eitthvað?