Hinn dularfulli bankasveinn

 

Svein Harald Øygard man ekki hvenær hann var fyrst beðinn um að taka að sér stöðu seðlabankastjóra. Var það kannski meðan hann beið einn á hótelherbergi í Reykjavík? Það er frekar alvarlegt mál, að muna svona lítið. Getum við treyst manni í svona hárri stöðu, sem ekki man eftir því sem gerðist fyrir viku? Getum við treyst honum fyrir að snúa íslenskum mínus í plús?

Ég held að Svein Harald, sem lætur ráða sig án þess að kynna sér hvað íslensk lög segja um ráðningu útlendinga í hæstu embætti þjóðarinnar, sé í vondum málum.

Svein Harald veit vel, að í Noregi er það algjörlega ómögulegt fyrir útlendinga að setjast í embætti Sentralbankdirektørs. Af hverju telur hann það eðlilegt að taka slíkt embætti á Íslandi? Svein Harald sýnir dómgreindarleysi og ábyrgðarleysi með því að láta ráða sig án þess að lagaleg hlið ráðningarinnar sé í lagi.

Norskir fjölmiðlar hafa spurt Stefán Jóhann Stefánsson upplýsingafulltrúa Seðlabankans:

- Hvordan kom dere i kontakt med Øygard?

- Det kan jeg ikke svare på, men vi er ikke tvil om at vi har funnet rett mann.

Stefán bætti við er hann er spurður frekar: - Ja, han er rett mann på rett plass, sier Stefansson. Selv møtte han Øygard for første gang i dag.

- Vi i sentralbanken er veldig glad for å ha ham her, og jeg tror det islandske folk vil være enig med oss, sier han.

Hvernig veit Samfylkingarmaðurinn (borgarfulltrúi í leyfi) Stefán Jóhann Stefánsson það? Hvaða forsendur hefur Stefán til því að segja þetta? Síðan hann gerðist upplýsingafulltrúi Seðlabankans hefur hann aldrei svarað neinu af eða til. En nú veit hann allt um óskir þjóðarinnar. Er annars rétt að pólitíkus sé í því starfi sem Stefán er í? 

Af hverju þessi leynd kringum ráðningu Sveins Haralds? Er verið að leyna því að ákvörðunin um að ráða hann var tekin á síðustu stundu, þegar ríkisstjórnin var með buxurnar niðrum sig, á fullu að hrekja Davíð úr bankanum, án þess að hafa nokkurn annan í staðinn. Einhver hringdi svo í Stoltenberg, sem segir nú öllum sem heyra vilja að hann hafi teflt Svein Harald fram til bjargar Íslendingum.

Þjóðin verður að fá að vita hverju Svein Harald hefur verið lofað og hvað íslenskir flokksfélagar hans hafa sagt honum. Samfylkingarmaðurinn Stefán Jóhann virðist vita það. Lát heyra Stebbi! 

Vera má að Svein Harald hafi komist lítillega í kast við norsk lög. Það var ekki alvarlegt mál eins og ég hef greint frá í færslunni hér á undan. Alvarlegra er, að hann telur sér stætt á því að taka að sér stöðu seðlabankastjóra á Íslandi í trássi við lög og venjur á Íslandi.

Athugasemdir

[Kristján Sveinsson (IP-tala skráð) 2.3.2009 kl. 13:05]

Sko það er í fínasta lagi þótt Sven fra Norge muni ekki klukkan hvað einhver spurði hvort hann væri til í smájobb í nokkra mánuði úti á Íslandi. Aðalatriðið er að einhver muni eftir verkum hans þegar hann fer.

Það var nefnilega ekki þannig með DO fyrrverandi. Þegar honum var loksins ekið burt úr Seðló eins og hverri annarri fragt, ja þá mundi enginn eftir neinu sem hann hafði gert þar.  Ekki það sama að vera og gera nefnilega.

[Ragnhildur (IP-tala skráð) 2.3.2009 kl. 14:41]

Afköst Stefáns Jóhanns í starfi eru á par við titlaðan sérlegan samningamann Palestínu stjórnarinnar, Sahib Erekat. Engan rekur minni til að sá maður hafi nokkru sinni samið um eitt eða neitt. Eftir meira en 20 ára setu á titlinum virðast fréttamenn enn ekki hafa tekið eftir að embættið sé óþarft.

[Vilhjálmur Örn Vilhjálmsson, 2.3.2009 kl. 16:15]

Nú, kammerat Kristján, ég hélt að hvert einasta orð sem Davíð hefði skilið eftir sig, í og við Seðlabankann, hafi verið leikið í öllum fjölmiðlum á öldum ljósvakans, að minnsta kosti eins oft og þættir útvarps Matthildar.

Ég saknaði dulítið Tóta Eldjárns í allri rimmunni. Eldjárn hefði í það minnsta átt að fara með lofkvæði um gamlan félaga honum til aðhalds, eins og skáld gerðu fyrir konunga á söguöld. En mér er nær að halda, að Davíð hafi sagt et tu Toti, þegar hann var keyrður neðanjarðarbirgi Seðló eins og einhverjum úldnum umframbirgðum.

[Kolla (IP-tala skráð) 2.3.2009 kl. 18:00]

Úldnar umframbirgðir segirðu. Ég sem hélt að ég ætti til að vera stórorð um menn og málefni dagsins. Þetta hefði mér þó aldrei hugkvæmst. - Bæti því í hugtakabankann.  Eins og Davíð var skörulegur pólítíkus, reyndist hann algjör lydda (úldin umframafurð?) gagnvart útrásarliðinu.

[Heimir Lárusson Fjeldsted, 3.3.2009 kl. 11:30]

Fá ekki þróunarríki aðstoð frá þróaðri ríkjum?

Þróað ríki hefur auðvitað aldrei gengið svo langt að krefjast stóls seðlabankastjóra fyrr hjá hinum bágstadda.

Seðlabankastjóri með dóm á bakinu segir þú.

Forsætisráðherra með dóm á bakinu segi ég.