Ófrjótt fólk

 

Eggjakast, málningarslettur, kukl og rugl, ofstopi, valdbeiting, hrottaskapur öfgar og ólæti.

Handalögmálið er greinilega heilagt litlum hópi fólks á Íslandi. Fólk þetta getur að því er virðist ekki gripið til annarra úrræða en skrílsláta.

Meðal þessa ofstopafólks eru einstaklingar sem í áraráðir hefur gert sjálft sig að fíflum með skrílslátum í stuðningi við hryðjuverkasamtök.

Mikil landhreinsun yrði, ef þetta fólk flytti til fjarlægra landa. Má ég stinga upp á Afganistan og Pakistan (ef einhverjir þar vilja taka á móti þessu ólánssama öfgafólki).

Þegar þetta fólk, sem hefur lifað í vellystingum ímyndunarþjóðfélags í boði íslenskra sjónhverfingavíkinga, vaknaði upp af værum draumi, virðist hæfileikinn til að byggja upp vera horfinn. Í staðinn er brotið niður, eyðilagt og öskrað og gólað í aumingjasakap eins og örvingluð rándýr. Málning er táknrænt blóð sem það vill úthella. Bananahýði eru táknræn reður sem skríllinn tilbiður. Mannveran er frumstæð.

Hatur þessa fólks í garð eins manns, Davíðs Oddssonar, sem alls ekki er eina ástæðan fyrir aumum örlögum íslenskrar þjóðar, er sjúklegt. Þetta fólk brýtur allar siðareglur (skin)heilagleikans, sem það er svo fullt af. Að leggja einn einstakling í einelti vegna mistaka heillar þjóðar, er versta gerð öfga og fordóma.

Reynt að fá fólk út með góðu

Athugasemdir

[Allinn (IP-tala skráð) 1.12.2008 kl. 18:53]

Mér fannst dálítið skrítið þegar rætt var við ungann mann í fréttunum á RUV hvað honum fannst sjálfsagt að vera með eitthvað sem mér skilst að sé kallað virkt lýðræði.

Í mínum huga er þetta ekkert nema óagaðir krakkar.

[Ragnar Eiríksson, 1.12.2008 kl. 19:04]

Þetta voru nú ekki mistök heillar þjóðar - alla vega neita ég allri ábyrgð, ég er bara frekar fátækur, aldraður maður og öryrki sem hef að ég held einskis notið af hinu svokallaða góðæri.     Ég fér þó frábæra þjónustu í heilbrigðiskerfinu þegar ég þurfti þess með en það var útrásinni óviðkomandi.      Ég held að svona sé ástatt um fjölmarga - þeir bara horfðu á af hliðarlínunni.     Það er svo allt annað mál að það er skemmdarverk að beita ofbeldi í þessum mótmælum og þau eiga engan veginn að beinast að Davíð.    Geir er ábyrgðarmaðurinn og gegn honum eiga mótmælin að vera!

Ragnar

[mar.blog.is, 1.12.2008 kl. 21:52]

Ég er hjartanlega ósammála eins og ég skrifaði um hér: www.mar.blog.is

[Gústi (IP-tala skráð) 2.12.2008 kl. 04:00]

Ung fólk rís upp gegn ríkjandi kerfi.

Ung fólk sem er varla komið út á vinnumarkaðinn, en hefur horft sárum augum á mæður sína og feður verða útundan í landi Davíðs.

Þetta unga fólk var varla talandi þegar Davíð tók landið þeirra.

Núna eftir tæplega 20 ár hefur Davíð og ribbalda flokkur hans strandað landinu þeirra.

Börn verkamanna og kvenna munu ekki láta fara enn verr með hræið sem rekur nú á fjöru.

Það er ekki langt að bíða þess að feður og mæður standa í fremstu línu, börn þeirra munu berja þau kjark í brjóst. Þor til að rísa upp gegn kerfi sem er sýkt.

Kerfi sem hefur haldið þeim niðri og kúgað þau.

Kerfi sem taldi þeim trú um að þau gætu engu breytt.

Ný er öldin svo sannarlega önnur.

Ung fólk í dag er ENN víðsýnt og skapandi, lífsglatt og áhyggjulaust.

Þess vegna stendur það fremst.  

Virðingarfyllst

[Vilhjálmur Örn Vilhjálmsson, 2.12.2008 kl. 06:58]

Gústi, byltingarhetjur hafa alltaf komið frá prúðbúnum heimilum heildsalans, en ekki úr hreysum verkamanna. Börn verkafólksins er að vinna. Ég held að mömmudrengir og pabbastrákar hafi verið að kasta málningunni.

[Bjarki (IP-tala skráð) 2.12.2008 kl. 13:55]

Reiða fólkið sem slettir málingu og brýst inn í opinberar byggingar er held ég afar sjaldan þeir sem misst hafa vinnuna eða tapað miklum sparnaði í fárviðri síðustu mánaða. Fremst í flokki fara hobbíanarkistar sem eru með'ann beinstífan af þórðargleði í svona ástandi. Nú gefst þeim loksins færi á að "fokking gera eitthvað" í staðinn fyrir að eiga bara greindarlegar samræður við skoðanasystkini sín á kaffihúsum. Þeim er skítsama um hagsmuni myntkörfusligaðs almennings.

[Katrín Snæhólm Baldursdóttir, 2.12.2008 kl. 15:20]

Má bjóða ykkur höfðingjar Íslands að skoða bloggið mitt og myndbandið sem þar er linkað á í athugasemd númer tvö??? Þar er hægt að sjá hvernig þessi ólæti, skrílslæti og ofbeldi fór fram og hversu frábært þetta unga fólk er í raun!!! Svo þegar þið eruð búinir að skoða myndbandið og sjá með eigin augum hversu rangt þið hafið fyrir ykkur þá er tímabært að biðjast afsökunar á misskilningi ykkar..ekki satt??

p.s ekki svo trúa öllu sem er sérklippt af fjölmiðlunum til að fá akkúurat svona skoðanir fram eins og ykkar.

[Aðalbjörn Leifsson, 2.12.2008 kl. 19:19]

Ég man eftir því þegar mótmælandi Íslands skvetti skyrinu á fína fólkið, það var "töff". Ég man líka þegar Glistrup skatta geni fékk yfir sig rauða málningu það var "töff". En þegar fólk fer að haga sér eins og "bodega racist" það er ekkert töff. Að ráðast á Davíð sem hefur ekkert gert og er orðinn sjúkur og sorgmæddur af þessu öllu er nú síðasta sort. Lengi lifi Davíð, Hallelúja.

[Sigurður Þór Guðjónsson, 4.12.2008 kl. 21:23]

Auðvitað láta kátir krakkar svona ekki fram hjá sér fara. Það hefur altaf verið svoleiðis með mótmæli. Vorum við líka svona þegar við vorum ungir Vilhjalmur og enn með náttúru? Amen!

[Vilhjálmur Örn Vilhjálmsson, 6.12.2008 kl. 09:00]

Jú, Sigurður, auðvitað var ég var svona sjálfur, sem má lesa um í færslu hér í á vinstri hliðarvæng, Ungr var ek. En ég hélt að mannskepnan hefði þróast síðan ég gekk í MH. Stimpingar unglinga er gelgja. Maður kemst í líkamlegt samband og á hærra stig, og svo eru alltaf sætar stelpur sem eru að rífa kjaft.