Bloggpíslavættir Íslands

 

 

Síðan ógæfan hellti sér yfir  Ísland, hefur borið dálítið á sjúklegri sjálfsmeðaumkun, þar sem hræðilegum örlögum annarra þjóða er líkt við það óvenjulega ástand sem nú ríkir á Íslandi. Enginn hefur dáið vegna þessa ástands á Íslandi, en samt sér maður fólk lýsa því eins og heimsendir sé í nánd. Einnig er í gangi sjúkleg tilhneiging til að kenna útlendingum um ástandið. Eftir feitu árin, þar sem flestir trúðu á bankasnáðana og mátt þjóðarinnar á meðal þjóðanna, er veruleikaflóttinn farinn að grípa um sig.

Hér koma þrjú dæmi, sem ég ætla mér að skrifa um í erlendu tímariti, vegna þess að mér þykir það sem fram kemur í hæsta máta óeðlilegt. Ef þessar skoðanir eru almennar, og það veit ég ekki enn, þá  lýsa þær afar sjúkri þjóðarsál.

Farið á blogg Páls Vilhjálmssonar blaðamanns, sem skrifaði mjög góða grein, sem hann kallaði Samsærið gegn Íslandi  og lauk henni með þessum góðu orðum: „Í útrásarandrúmsloftinu kafnaði dómgreind þjóðarinnar. Samsærið er innlent, ekki útlent."

Þessi grein Páls fékk allmörg viðbrögð, en flestir virtust hafa misskilið hana. Hún kallaði t.d. á greiningu hins fjölbreytta karakters Jóns Steinars Ragnarssonar. En þegar einhverjir heita: Salomon, David, Green, Lipsky, Bear eða Stern, þá sér Jón Steinar eitur og telur slíka menn vera á bak við allt sem miður fer á Íslandi og víðar. Davíð í Seðlabankanum og gulldrengirnir í bönkunum fá greinilega syndaaflausn hjá netpáfanum Jóni Steinari gegnum hatur hans á ákveðnu fólki.

Skýringuna á Mósaiískum (gyðinglegum) vanda heimsins deilir Jón greinilega með jafnaldra mínum Gunnari Th. Gunnarssyni, leigubílsstjóra m.m. austur á Reyðarfirði, sem oft bloggar mjög skemmtilega. Í miðri sálarkreppu íslenskrar þjóðar, sýndi hann nýja hlið á sér og fann sig knúinn til að skrifa færslu sem hann kallar Gyðingar stýra 75%. Þar skrifar Gunnar þetta, en dregur reyndar í land í svörum við athugasemdir við færsluna:

"Sagt er að Gyðingar í veröldinni, sem eru um 6% mannkyns, ráði yfir 75% alls fjármagns sem er í umferð. Þegar þetta hlutfall minnkar niður fyrir 75%, þá setji þeir atburðarrás í gang til að rétta kúrsinn."

Ég get bara sagt eitt. Maður sem er leigubílstjóri á Reyðarfirði, hlýtur sjálfur að vera gyðingur. 

 

Aðrir leita á náðir gyðinganna í stað þess að trampa á þeim, og líkja ástandinu á Íslandi við verstu reynslu gyðinga. Á bloggi umhverfisefnafræðingsins Ingibjörgu Elsu Björnsdóttur, eru Íslendingar komnir í gettó og svo að segja á leið í gasklefana - og samkvæmt henni er þetta allt útlendingum að kenna, fyrst og fremst Bretum og IMF. Í grein sem Ingibjörg skrifar á (lélegri) ensku,  og sem hún kallar The latest news from the icelandic ghetto!, er notast við samlíkingu við örlög gyðinga í stað þess að hata þá eins og venjan er. En slík samlíking og relativismi er reyndar næsta stig við afneitun helfararinnar. Ætli Ingibjörg viti að Þjóðverjar ætluðu gyðingum að lifa af 184 hitaeiningum á dag?  Hvað ætli bíllinn hennar Ingibjargar gæti hafa fætt marga gyðinga í gettóum Evrópu? Ég skrifaði líka grein á ensku um daginn, en hún var ádeila á þetta hugarfar sem fram kemur í rausi réttlátu rauðliðanna Þar lét ég meistara Bob Dylan kyrja minni örmu þjóð hentuga þulu. Hlustið, lesið og skammist ykkar ef þið getið.

Þeir þrír sem hafa verpt athugasemdum sínum hjá frústreraða efnafræðingnum, eru þrír af verstu siðvöndurum íslenskra bloggheima (fyrir utan mig). Nú eru þau ekki að fárast yfir Tíbet og Palestínu, dægurverkefnum hinna réttlátu. Nú eru örlög þeirra sjálfra aðal dægradvölin.

Athugasemdir

[Aron Björn Kristinsson, 25.10.2008 kl. 21:28]

Ja mjog fyndid thegar folk reynir ad kenna "utlendingunum" um bankavesenid her. Thad sem er ad gerast herna a islandi er einfaldlega afleiding graedginnar sem hefur verid ad trollrida islenskum audjofrum.

[Gunnar Rögnvaldsson, 25.10.2008 kl. 23:57]

Breskir fjölmiðlar hafa undanfarin á æ oftar tekið í notkun hugtakið "jews of the north" um Íslendinga. Mér finnst þetta meðmæli því þá er kanski ennþá von um að við förum bráðum að kunna smávegi á peninga. En eins og enginn veit, þá er galdurinn við peninga fólginn í því að: hafa þá NÚNA !

Þakka þér greinina Vilhjálmur

Kveðjur

[Svanur Gísli Þorkelsson, 26.10.2008 kl. 17:38]

Gunnar; Hvaða breskir fjölmiðlar kalla Íslendinga  "jews of the north" ?

[Gunnar Rögnvaldsson, 26.10.2008 kl. 21:53]

Svafar

Guardian hefur t.d. nefnt þetta í grein og einnig nefnt að þetta sé í "umræðu" meðal sumra "á götunni". Það er langt síðan ég las þetta, sennilega ár eða tvö. Ég hef séð þetta í fleir breskum miðlum á netinu og í umræðu (comments) tengda fréttum af íslenskum fyrirtækjum í Bretlandi, en man ekki nöfn þeirra. Ég hef sjálfur heyrt þetta í tali manna á milli.

Ég hélt að allir vissu að þetta "heiti" væri til og stundum notað, enda er þetta alltaf notað þegar niðra og niðurlægja á fólk sem hefur með peninga að gera.

Kveðjur

[Sindri Guðjónsson, 31.10.2008 kl. 09:46]

Gyðingar eru almáttugir.

Þetta er þeim að kenna.

Ég er pakk saddur.

Borðaði 300 hitaeiningar í morgunmat.

Í íslenska gettóinu.