Tuusula

Atburðir dagsins í Tuusula í Finnlandi slá harmi á alla viti borna menn. Maður getur aðeins spurt sjálfan sig hvað veldur svona tilgangslausu brjálæði? Af hverju þurfa sumir menn að draga aðra með sér í dauðann? Erfitt uppeldi, ástarsorg, stundarbrjálæði eða eitthvað annað? Ekkert virðist rökrétt í svona glæp.

Fjölmiðlar eru farnir að geta sér til um hvað gerðist í höfðinu á piltinum sem framdi ódæðið, og skrifa nú að hann hafi sagst taka SSRI geðlyf. Skólamorðingjar í Bandaríkjunum hafa einnig verið á þessari tegund "gleðilyfja". Íslendingar eiga reyndar Norðurlandametið í notkun þessara lyfja.

Skotvopn ættu ekki að vera á heimilum manna á þessum lyfjum.

Ef SSRI lyf, eða röng notkun þeirra, geta valdi sturlun, ætti að banna þau þegar og íslensk yfirvöld ættu að fá heimild til að samkeyra lyfjaupplýsingar við upplýsingar sínar um vopnaeign landsmanna. Íslendingar eru að mörgu leiti líkir Finnum. Höfum vaðið fyrir neðan okkur.

Athugasemdir

[Guðmundur D. Haraldsson, 7.11.2007 kl. 23:26]

Er þetta spaug, Vilhjálmur? Ég trúi varla að þér geti verið alvara...

[Vilhjálmur Örn Vilhjálmsson, 8.11.2007 kl. 08:07]

Íslendingar eru líkir Finnum, það hefur sýnt sig. 

En mér er líka fúlasta alvara með allt hitt! Bönn og boð, innan eðlilegra lýðræðislegra marka, geta komið í veg fyrir fleiri slys og jafnvel vinsæla geðsjúkdóma og -raskanir, sem ég held að séu ekki eingöngu arfgengir kvillar.

Átröskun var t.d. ekki algengur sjúkdómur á 19. öld á Íslandi. Löngun manna til að eiga riffil, þegar Bónus et. al. geta boðið ferskt kjöt og í  frystikistum, bendir eindregið til þess að menn séu enn á veiðimannastigi. Þunglyndir veiðimenn geta verið hættulegri örðum en rjúpum og gæs.

Hins vegar held ég, að samkeyrsla lyfjaskrár við byssuskrá muni ekki gefa marga kandídata, sem eru á gleðitöflum á fjöllum. Sumir fá alla gleði sína og kikk úr því að deyða aðra, stundum dýr ...... en því miður stundum menn. 

Menn með "veiðimannagen" eru oft fatalistar eins og forfeður þeirra. þeir eru flokksdýr og álíta sig vera reddara og leiðtoga flokksins. Þeir hafa ekki enn fattað að það eru konurnar, sem hafa töglin og hagldirnar og þróaðri heila en þeir. Þeir ná bara í matinn með því að nota vopn og líkamlegt vald. Þegar veiðimenn fortíðarinnar gátu ekki náð í mat, tóku þeir oft ákvarðanir fyrir allan hópinn og hugsun þeirra þunglyndustu hefur örugglega verið: "Ef ég get ekki veitt, verða allir að deyja". Ef til eru svoleiðis menn í dag, er betra að taka frá þeim vopnin, en að fylla þá af lyfjum sem kannski ekki virka.

[Elías Halldór Ágústsson, 8.11.2007 kl. 18:42]

Meðal Forn-Grikkja og Rómverja urðu ungir menn lögráða hálfþrítugir. Ég tel að það hafi verið góð ástæða til þess.