Svecia non optima est

Æi, það er ugglaust ekki gaman að vera Anders Tegnell.

En honum sjálfum er ekki einum um að kenna. Tegnell er afsprengi af stærra, sænsku vandamáli.

Svíar hafa síðan um 1960 litið á sig sem þjóð sem leyfðist signt og heilagt að vera með dómharðan vísifingurinn á lofti gagnvart öllum þjóðum; Sér í lagi beindan gegn þeim sem alþjóðlega stefna Krata leggur í einelti í misskildum stuðningi við hryðjuverkasamtök hrjáðra þjóða sem frelsa sig með morðsveitum í skugga öfgafullrar trúar sem fótumtreður öll nútímamannréttindi.

Við sjáum líka afbrigði af þessum ofmetnaði (hybris) Svía, þegar sænskir sagnfræðingar telja að Svíar hafi bjargað gyðingum á flótta frá Danmörku. Það gerðu Svíar vitaskuld ekki, og voru í raun mótfallnir til að byrja með, eða þangað til að þeir fengu bréf frá danska sendiráðinu í Washington, sem ritað var af fyrrverandi sendifulltrúa í Reykjavík, manninum sem einnig á stóran heiður af ákvörðun Bandaríkjamanna að leggja blessun sína yfir lýðveldisstofnunina á Íslandi. 

Í því bréfi C.A.C. Bruns var lofað að Danir myndu borga fyrir dvöl gyðinga sem Svíar björguðu. Sú "skuld" var vitaskuld aldrei innheimt, en sænskir stjórnmálamenn gleymdu henni þó alls ekki. Áður en bréfið, sem aldrei hefur verið nefnt í sænskum bókum,var skrifað í Washington ætluðu Svíar sér alls ekki að hjálpa gyðingum. Þeir hjálpuðu hins vegar gjarnan Þjóðverjum með hergagna og liðsflutninga til Finnlands og Rússlands.

Sjálfsánægjustefna Svía, sem smitað hefur af á Íslandi á frekar hæfileikalausu fólki sem stundaði stutt og lítilmótlegt nám við sænska háskóla, áður en það settist í ævilangar feitar ríkisstöður á Íslandi. Þessi blindstefna Svía hefur vafalítið einnig valdið dauða Palmes. 

Að ógleymdum Volvo, sem er ekki besti bíll í heiminum (þótt góður sé), og að Ikea er nasistabúlla sem lokar á mönnum munninum með kjötbollum. 

Í dag geta Svíar heldur ekki tekið á vandamálum þeim sem fjölmargir nýnasistar þeirra eru; eða á öfgahópum þeirra sem þrífast á meðal innflytjenda í landinu.

Svíþjóð er ríki sem á erfitt með að taka á vandamálum - vegna skoðanaeinokunar og sjálfsblekkingar sem leitt hefur af sér þjóðfélag, þar sem einn maður eins og Tegnell með sænsku heilkennin getur valdið óhemjumiklum usla. Sænska lýðræðið er orðið spegilmynd þar sem besserwisserinn og einræðisherrann talar við sjálfan sig og hlustar ekki á aðra en sjálfan sig. Að vera læknir með slöngusýn bætir ekki málið í landi þar sem kjánaleg pólitísk rétthugsun tröllríður öllu.

Svíþjóð er vandamálið - ekki aðeins Tegnell.

Sænski sóttvarnalæknirinn viðurkennir mistök

Athugasemdir

[Halldór Egill Guðnason, 1.6.2020 kl. 00:03]

 Sjaldan, ef nokkurn tíma, hef ég lesið betri skilgreiningu á Svíþjóð og svíum.

 Þetta helvíti sem slengdi um axlir mér og margra annara viðbjóðnum mengjasúpunni á sínum tíma. Rétt búinn að læra að leggja saman, margfalda og draga frá í Melaskólanum upp á gamla mátann og stærðfræðin að því er virtist engin stórkostleg hindrun til seinni tíma náms og starfa. 

 Kom þá ekki þessi bévítans ´´sænska leið´´ sem tröllreið hér öllu áratugum saman og gerir enn. Svíar þetta og svíar hitt. Allt svo djöfull hipp og kúl í Svíþjóð.

 Kærar þakkir fyrir pistilinn Vilhjálmur. Grunar að við höfum sömu árum deilt í Melaskólanum, eða ertu ekki sammála því að 1960 árgangurinn sé með þeim betri? 

 Góðar stundir, með kveðju að sunnan.

[Vilhjálmur Örn Vilhjálmsson, 1.6.2020 kl. 08:19]

Sænska leiðin var leiðin til hruns á Íslandi. Skólakerfið fór illa út úr sænskum uppátækjum. En mér líkar samt við flesta Svía. Flest eru þetta vingjarnlegir Framsóknarmenn. Það er "Stokkhólmsaðallinn" og Gautaborgafíflin sem ég kann ekki við. Einnig er gott að dvelja í Svíþjóð, ef  maður er ekki of lengi í einu. 

Ég er einnig hræddur um að ég hafi ekki deilt neinu með þér í Melaskólanum. Ég var fyrst í Ísaksskóla, síðar í Æfinga og Tilraunaskóla Kennaraháskóla Íslands sem heitir víst Háteigsskóli í dag; síðar gekk ég í Hlíðaskóla og var í Ármúlaskóla í Landsprófi; þaðan var dröslast í MH og svo beint í fornleifafræðina í Árósum. Í Melaskóla hef ég aldrei setið, þó ég hafi verið tíður gestur í Vesturbænum og æft þar sund um tíma. Tæknilega séð er ég upphaflega Vesturbæingur. Ég bjó mín fyrstu æviár á Ægisíðunni, en flutti á fjórða ári í austurbæinn, nt Hvassaleitið. En  móðir mín og hennar foreldrar voru á Hringbrautinni frá 1934.

1960-árgangurinn er tvímælalaust meðal eðalárganga 20. aldar, held ég barasta, að minnsta kosti með þeim betri.

[Halldór Egill Guðnason, 1.6.2020 kl. 22:18]

 Þetta með Melaskólann verður þú að fyrirgefa mér, Vilhjálmur. Myndin af þér virtist svo kunnugleg og maður á mínum aldri á það til að rugla dulítið saman andlitum úr fortíðinni, sem virðast kunnugleg.

 Áfram bestu þakkir fyrir pistla þína, bæði hér og Fornleifsmegin.

 Góðar stundir, með kveðju að sunnan.

[FORNLEIFUR, 2.6.2020 kl. 09:44]

Ég var reyndar fáum líkur. Ég er á sama aldri og þú, svo ég þekki vel þetta rugl. Ég er oft að heilsa miklu yngri konum sem ég held að hafi verið í bekk með mér. Þá eru það í besta falli dætur þeirra. Þakka lesturinn. Sumar breytast aldrei, en þeim þorir maður ekki að heilsa.