Þeir urðu sakborgningar í nótt

Þessi frétt Mbl.is greinir ekki frá neinum "sakborningum". Takið eftir orðinu: SAKBORNINGUM sem ég nota. Í gær var í sumum fjölmiðlum talað um, og haft eftir Grími Grímssyni, að

"mennirnir væru grunaðir um að hafa upplýsingar um hvarf Birnu Brjánsdóttur, en að hann vildi ekki staðfesta hvor þeir væru grunaðir um saknæmt athæfi."

En í nótt, þegar ég hafði samband við fréttamann RÚV varðandi skilgreiningar hans í frétt sem hann breytti eftir að ég gerði athugasemd við hana, voru þrímenningarnir frá Grænlandi sem leiddir voru frá borði, orðnir sakborningar. Fréttamaður Útvarpsins tjáði mér þetta - sjá einnig tölvupóstskipti okkar hér. Fréttamaðurinn skrifaði þetta:

"Ég þarf ekki að spyrja Stöð 2, ég talaði við Grím áðan. Hann tók af allan vafa.

Fyrirsögnin er breytt vegna þess að fréttin uppfærðist. Ég bætti inn setningu eftir ábendinguna frá þér áðan - þó hún væri endurtekning á efni sem kom fram fyrr í fréttinni.

En þú getur alveg verið viss. Það leikur enginn vafi á að mennirnir eru grunaðir.

Sakborningar er orðið sem Grímur notaði í viðtali við mig."

Grímur Grímsson lögreglumaður staðfesti þannig við RÚV í nótt fyrir kl. 03.00 að Grænlendingarnir sem færðir voru í land í járnum væru sakborningar, en það kallaði hann þá ekki í gær. Eitthvað hlýtur að hafa komið í ljós við yfirheyrslur?? um borð á skipinu á leið til hafnar eða strax við komuna til Reykjavíkur.

Vona ég svo að Grímur Grímsson, hafi farið að lögum við yfirheyrslur á sakborningunum og virt réttindi mannanna sem sakborninga t.d. rétt þeirra til að  fá upplýsingar um kæruefni samanber 1. mgr. 32. gr. oml. (lög um meðferð opinberra mála) og 3. mgr. 6. gr. mannréttindasáttmála Evrópu, sem lögfestur var á Íslandi með lögum nr. 62/1994.  Vonandi verður réttur þessa sakborninga til að neita að svara spurningum sem varða refsiverða hegðun sem þeim er gefið að sök, samkvæmt 3. mgr. 32. gr. oml. virtur. 

Á Íslandi ríkja enn ágæt lög fyrir sakborninga, þó svo að sagan sýni okkur að lögreglan sé ekki alltaf með þau á hreinu. Í nótt var vitaskuld farið að ofangreindum lögum. Ég býst ekki við öðru.

Rannsókn í skipinu lokið

Athugasemdir

[Vilhjálmur Örn Vilhjálmsson, 19.1.2017 kl. 09:10]

Grímur staðfesti þetta svona til öryggis í morgun á Vísi.is i morgun http://www.visir.is/yfirheyrslum-lokid-hvarf-birnu-rannsakad-sem-sakamal/article/2017170118590 : „Ég held að það sé óhætt að segja það því ég hef verið að reyna að víkja mér undan því að svara því hvort þetta sé sakamál eða ekki. Það er það náttúrlega, það er verið að rannsaka hvort að hvarf Birnu [Brjánsdóttur] hafi borið að með saknæmum hætti,“ sagði Grímur í viðtali við Morgunútvarp Rásar 2 í morgun.

[Margret S (IP-tala skráð) 19.1.2017 kl. 14:40]

"Sakborgningar" Skrítin fyrirsögnin þín.

[Guðmundur Ásgeirsson, 19.1.2017 kl. 14:52]

Lög um meðferð opinberra mála voru leyst af hólmi með:

88/2008: Lög um meðferð sakamála

[Vilhjálmur Örn Vilhjálmsson, 19.1.2017 kl. 17:45]

Ekkert breyttist við það, Guðmundur.

[Vilhjálmur Örn Vilhjálmsson, 19.1.2017 kl. 17:54]

Margret S. Lestu vinsamlegast greinina, þá skilur þú vonandi fyrirsögnina. En lögreglan telur nú að mennirnir séu sekir og fundu líka mikið magn af hassi frá Danmörku (eða Íslandi) um borð á skipinu. Mennirnir hljóta því að vera sekir, þó þeir segist ekki vera það. Þannig var það t.d. í Geirfinns og Guðmundarmálum. Það er fyrir þessu hefð á Íslandi. Útlendingar geta vitaskuld verið sekir, en mér sárnar persónulega að það séu Grænlendingar. Nú látum ég lögguna vinna sína vinnu með sínum aðferðum.

[Guðmundur Ásgeirsson, 19.1.2017 kl. 20:32]

Vilhjálmur.

Ýmislegt breyttist gildistöku nýju laganna um meðferð sakamála, en þau réttindi sakbornings sem þú vísar til eru þó að mestu leyti sama efnis, jafnvel meiri en áður.

[Guðjón E. Hreinberg, 21.1.2017 kl. 02:41]

Takk fyrir þetta.