Spýtukarlinn í forsætisráðuneytinu

Sigmundur Davíð Gunnlaugsson, fornleifaráðherra með meiru, hefur haft nægan tíma til að sanna að greiddir hafa verið skattar af því sem hann og frúin stungu undan í Panama. Gráthlægilegt vottorð frá vafasömu endurskoðunarfyrirtæki er engin sönnun fyrir einu eða neinu. Hann getur ekki verið undrandi á þeirri vafasömu heimsfrægð sem hann hlýtur nú og skákar þar með Björk, sem auðvitað greiðir skattana sína eins og það sé hluti af eðlilegu Human Behaviour. Vafasöm er sú frægð Munda og dregur SDG íslensku þjóðina hugsanlega með sér í svaðið. Líklega er best fyrir sveininn að segja af sér, og ganga frá sínum málum í réttarsal en ekki úr pontu á Alþingi Íslendinga.

Fólk, sem ekki greiðir skattana sína, hefur nefnilega ekki eðlilegan áhuga á lýðræði. Lýðræði felst fyrst og fremst í sameiginlegri ábyrgð. Án hennar verða ekki byggðir spítalar og engir peningar koma til t.d. löggæslu. Ábyrgðarleysi SDG sýnir ekki lýðræðisvilja. Furðulegt er því að sjá að maður, sem lýsir frati á samábyrgð lýðræðisríkja, geti skipað lögreglunni í landi sínu að urra á norska blaðamenn sem vilja spyrja ráðherrann eðlilegra spurninga. SDG hefur í raun engan rétt til að leita til lögreglunnar, því hann greiðir ekki til hennar eins og aðrir þegnar þjóðfélagsins -- nema að hann geti sýnt okkur eitthvað annað en gúmmívottorðið frá endurskoðunarfyrirtæki með langan glæpaferil í fjölda landa.

Oft hef ég skrifað um undarlegt athæfi SDG fornleifaráðherra á blogginu Fornleifi (sjá t.d. hér). Maðurinn hefur í raun rústað minjamálum á Íslandi með brennuvargi sem stjórnar Þjóðminjasafninu. Því kemur mér það ekki á óvart að hann sé til vandræða annars staðar en í því sem ég þekki best. Ég tel mig vera örlítið til hægri við miðju í stjórnmálaskoðunum,en ég get ekki svarið af mér kratablóð í báðum ættum. Ég er einnig fullviss um að Sigmundur sé hvergi í stjórnmálum. Hann er þar bara fyrir sjálfan sig.

Ræða hæfi Sigmundar Davíðs

Athugasemdir

[Vilhjálmur Örn Vilhjálmsson, 5.4.2016 kl. 05:56]

Af gefnu tilefni upplýsist hér með, að kaþólskir öfgamenn, illmenni, jesúítar, sem og öfgafullir múslímahatarar og moskuhræðsluáróðursmenn fá ekki lengur að setja hér inn athugasemdir. Til er staður sem þeir geta úthellt svartagallsrausi sínu: Útvarp Saga heitir Helvítið.

Einn þeirra, sem hefur stundað rógburð um mig á Íslandi, fór hér hamförum og kenndi mér m.a. um að silfur sem breskur sérfræðingur og dönsk skýrsla dæmdu sem falsanir. Það kemur ekkert núverandi fornleifamálaráðherra við, sem ofanstæð bloggfærsla fjallar um. Einnig lá við að oblátungurinn kenndi mér um ófarir þeirrar persónu sem einnig kallar sig forsætisráðherra. Júdasi var kennt um margt af því fólki sem öfundaðist út í Gyðingdóm og sem bjó til nýjan Guð þar sem blóð gyðings er drukkið og hold hans étið. Ég tek hins vegar ekki í mál að öfgakaþólikki sé að núa silfri, sem aldrei hefur fallið á, um mínar stóru nasir. Innst inni er þessi maður bara Íslendingur, sem blandar persónutengslum inn í allar sínar skoðanir. Það er á skjön við það sem meistari hans á himnum boðaði meðan hann hafði jarðvíst allt fram til þess að hann var rígnegldur á kross af Rómverjum.