Gazamaður sem ólmur vill vinna fyrir Útlendingastofnun

Einn slíkur, Nael Zared, býr um þessar mundir með syni sínum Ruslan í Hafnarfirði upp á náð íslenskra yfirvalda.

RÚV tók viðtal við þá feðga, sem birt var í sjónvarpsfréttum sl. sunnudag (Sjá einnig hér). Þótt RÚV eigi þakkir skyldar fyrir fréttina, var ekki allt rétt sem þar var sagt. En greinilega kom fram, að Nael Zared á sér þá ósk heitasta að fá varanlegt dvalarleyfi á Íslandi og stöðu flóttamanns fyrir sig og son sinn. Hann telur Íslendinga einstaklega vinveitta Palestínumönnum og Ísland afar líkt Palestínu. En þar veður Nael víst í villu, því þessi ást sumra Íslendinga á Palestínu er ekkert nema afbrigði af stefi gyðingahaturs hjá sumu fólki.

Enn fremur telur Nael Zared Palestínumenn sérstaklega hæfa til að hjálpa íslenskum yfirvöldum til að velja úr þá sauði sem ekki eru á flótta vegna stríðs, svo hægt sé að vísa þeim á brott frá Íslandi. Hann sér sjálfan sig í framtíðinni í vinnu við slíka skítavinnu fyrir Útlendingastofnun. Það þótti mér leitt að heyra. Nael hefur ekki á réttu að standa. Palestínumaður er ekki endilega dómbær á líðan annarra í svipuðum sporum, og flóttamenn eiga ekki að bjóða sig fram til að setja hindranir fyrir aðra flóttamenn. Það er hlutverk yfirvalda.

Ruslan sonur Naels upplýsir hins vegar, að hann óski sér helst af öllu sitt eigið herbergi, svo hann þurfi ekki að hokra með karli föður sínum í sömu skonsunni. Ég hélt að það væru grundvallarmannréttindi á Íslandi að börn gætu haft sitt eigið herbergi/afdrep þegar þau eru komin á ákveðin aldur. Brýtur Útlendingastofnun mannréttindi á Íslandi í leiguhúsnæði því sem stofnunin er með í Hafnarfirði? Alveg tel ég öruggt, að þeir feðgar hafi haft sitthvort herbergið í Noregi.

Tæknilega séð er Ruslan Zarev ekki Palestínumaður

Nael Zared, sem kom frá Noregi til Íslands, talar bjagaða norsku. Greinilegt þótti mér af fréttinni á RÚV að dæma, að sonur hans, sem ber hið óvenjulega "palestínska" nafn Ruslan, hefði einnig dvalið lengi í Skandinavíu, því hann talar ágæta ensku með norskum áherslum. Hann er greinilega hinn mesti greindarpiltur.

RÚV upplýsti að þeir feðgar kæmu frá Palestínu, nánar tiltekið Gaza. En svona út frá sögulegu samhengi og því sem gerst hefur á Gaza á seinni árum, þótti mér það frekar ólíklegt, enda skjátlast fréttamönnum RÚV nú fjári oft, svo varlega sé til orða tekið.

Greinilegt er að nokkuð er um liðið síðan þeir feðgar voru síðast á Gaza. Ég taldi jafnvel öruggt að sonurinn hafi aldrei verið þar, enda er þar ólíft fyrir ógnarstjórn Hamas sem beitir börnum sem skjöldum í hernaði sínum við Ísraelsríki.

Hvað er að gerast í Noregi?

En hvað fær palestínska flóttamenn sem dvalið hafa í Noregi til að leita til Íslands. Er okkar ágæta nágrannaþjóð hætt að hjálpa Palestínumönnum - nema að flýja áfram til Íslands?

Ég leyfi mér svo að veðra þá skoðun mína, sem vissulega kann að vera alröng. Ég taldi, þegar ég sá fréttina á RÚV, að frekar litlar líkur væru á því að Nael og sonur hans Ruslan væru að koma frá Palestínu með smástoppi í Noregi. Ruslan er að öllu jöfnu ekki palestínsk nafn.

Ef þeir feðgar væru báðir Palestínumenn frá Gaza, þá hefðu þeim ekki verið vísað frá Noregi, þaðan sem þeir munu vera komnir til Íslands. Hins vegar tel ég víst að þeir hafi fengið að vita, að Sýrlendingar og Erítreumenn gengu fyrir á Íslandi sem og í Noregi, og greinilega Palestínumenn líka á Íslandi. Tel ég öruggt að Nael haf því upplýst að þeir væru Palestínumenn til að fá stöðu flóttamanns sem þeir fengu annars ekki í Noregi. Ég taldi reyndar víst að Nael væri mögulega ættaður frá Gaza en gat mér til út frá útliti drengsins, að að þeir feðgar hefðu komið til Noregs frá einum af fyrri lýðveldum Sovétríkjanna og að móðir drengsins væri ekki Palestínumaður heldur frá einum af þeim lýðveldum.

Móðirin yfirgaf Ruslan ungan

Smárannsókn mín meðal kunningja í Noregi leiddi í ljós að móðir Ruslans hafði yfirgefið hann og eiginmann sinn Nael í Noregi og hélt aftur til Rússlands. Móðirin, sem ekki er Palestínuarabi, vildi eftir komuna til Noregs ekkert vita af syni sínum eða barnsföður.

Nael þjáist einnig af sykursýki. Hann var um tíma mjög veikur á spítala og sonurinn var hræddur um að missa einnig föður sinn. Hvernig líf haldið þið að Ruslan hafi átt, þó svo að margir Norðmenn hafi reynt að hjálpa þeim?

En er það svo, að íslensk yfirvöld veiti Palestínumönnum betri fyrirgreiðslu en öðrum flóttamönnum, og eiga flóttamenn sem flýja frá t.d. Kasakstan eða Téténíu betri möguleika að njóta ásjár Íslendinga, ef þeir halda því fram að þeir séu Palestínumenn í húð og hár?

Ég held að þannig sé það reyndar í pottinn búið á Íslandi. Á Íslandi, þar sem nær daglega er predikað að Gaza sé stærsta fangelsi heims, þar sem fólk sé lokað inni og geti engar bjargið sér veitt, er fólkið greinilega líka svo einfalt að trúa því að drengur sem heitir Ruslan sé kominn frá Gaza um Noreg til Íslands.

Palestínumenn á flótta eiga vissuleg ekki að hafa forgang fram yfir annað flóttafólk á Íslandi. Enginn hópur fær reyndar eins mikla aðstoð frá umheiminum og Palestínumenn. En mismuna íslensk yfirvöld og Útlendingastofnun því fólki sem leitar til Íslands og er flóttamannsáttmáli SÞ þannig að engu hafður á Íslandi?

Veitum Zared-feðgum íslenskt ríkisfang

Miðað við þá ósvífni Norðmanna að vísa Nael og syni hans úr landi, þar sem Norðmenn töldu eðlilegt að þeir sneru til Rússlands, þaðan sem þeir komu, þó svo að móðir Ruslans hefði yfirgefið hann og ekki viljað af honum heyra, þá vona ég að Íslendingar sýni meiri miskunn og leyfi þeim feðgum að dvelja til frambúðar á Íslandi.

Á Íslandi er til fólk sem óskar þess að ungir og greindir menn af palestínskum uppruna alist upp við annað en hatrið á nágrönnum sínum.

Ég vona að íslensk yfirvöld leyfi Nael og Ruslan Zared að vera á Íslandi til að sýna öllum að rödd þeirra Íslendinga sem ekki styðja hernað og ógnarstjórn Palestínumanna, sé vinveitt þessum Palestínumönnum/Rússum sem enginn vill hýsa, heldur ekki Norðmenn með sínar háu og fínu kenndir, eða Íslendingar, "bestasta" þjóðin í heimi.

Styðjum því að íslenskt ríkisfang verði gefið Nael og Ruslan Zared - drengsins vegna. Nael getur svo vonandi fengið vinnu við annað en að flokka flóttamenn í gegnum nálarauga sem hann kæmist ekki einu sinni í gegnum sjálfur, því hann flýði frá Rússlandi til Noregs.

Reyndar er nú búið að sýna fram á að Rússland sé ekki öruggt land að senda fólk aftur til frá Noregi (sjá hér). Þar með er frávísun norskra yfirvalda sem olli því að Zared feðgarnir komu til Íslands, líklega ólögleg, eða hægt verður að snúa henni ef óskað er eftir því.

Börnum sem hafnað er af foreldrum jafnt sem af þjóðríkjum ættu Íslendingar að sjá sóma sinn í að hjálpa, sérstaklega þegar þau eru þegar kominn í hinn fína Hafnarfjörð. Vona ég að Hafnfirðingar, sem sumir eru frændur mínir, geri allt sem í þeirra valdi stendur til að aðstoða feðgana sem yfirvöld í Noregi vildu ekki gefa varanlegt dvalarleyfi.

Vonast ég til þess að íslenska þjóðin krefjist þess strax að þeir feðgar geti verið áfram á Íslandi. Ruslan er án föður- og móðurlands, móðir hans fúlsar við honum og ríkasta og hamingjusamasta ríki í heimi, Noregur, vill heldur ekki af honum vita.

Sýnum nú Íslendingar, hvað í okkur býr! Bjóðum feðgum þessum að vera. Ekki vegna þess að þið styðjið hryðjuverk Palestínumanna og þurfið á gíslum að halda í þeirri andstyggð ykkar, heldur vegna manngæsku og einskis annars.