Settur í bann af Agli Helgasyni

Eins og tryggir lesendur þessa bloggs hafa líklega tekið eftir, hef ég undanfarið verið í öngum mínum yfir því að geta ekki gert stakar athugasemdir við skoðanir annarra Íslendinga á Eyjan.is.

Ég hef skrifað og spurt forsvarsmenn þar, hverju sæti og hvort þeir geti ekki látið mig vita, hvaða boðorð ég hafi brotið til að vera settur út af sakramentinu á svo voðalegan hátt.

Þegar menn gerast of svæsnir rasistar á Moggablogginu eiga þeir á hættu að haft sé samband við þá og þeir beðnir um að fjarlægja ósómann. Mogginn vill vitanlega ekki eiga málaferli á hættu fyrir að birta illmæli og hatur fólks sem nota bloggsvæði blaðsins. Ég hef aldrei lent í slíku. En Mogginn sýnir þó þá kurteisi að hafa samband við fólk. Eyjan.is fjarlægir fólk.

En ég, sem stakk upp á mosku áður en íslenskir múslímar fóru að verða trúaðir, og sem veð upp að hálsi í minnihlutum í rannsóknum mínum, nema kannski helst þeim sem Íslendingar dýrka mest, suður á Gaza, og er þar að auki blíður í garð homma sem ekki hakka fyrir Wikileaks og hata Rússa eins og í tísku er, hef ekkert verið með neinar ósæmilega skoðanir á Eyjunni, nema að síður sé. Ég er líklega meira pólitískt kórréttur en Egill Helgason, sem eitt sinn hélt því fram að sígaunabörn sem væru rauðhærð eins og hann hefði örugglega verið rænt af vondum sígaunum í Finnlandi.

 

Censurstelle Egill Helgason

Nú er hins vegar komið í ljós, að það er Egill Helgason í allri sinni dýrð, sem bannað hefur athugasemdir mínar á vefmiðlinum Eyjunni. Ég er kominn á bannlista Eyjunnar. Egill greindi frá honum á smettiskruddu Guðmunar Magnússonar blaðamanns á Morgunblaðinu.

Klikkið og stækkið

Með þessu sýnir Egill mér hinn mesta sóma. Hvað hefur valdið því að hann fór að leika eitthvað Stasíkikvendi gagnvart mér veit ég ekki, en líklega hefur honum ekki líkað almennt við skrif mín. t.d. um föður "stjúpu" sinnar Sigrúnar Davíðsdóttur, bankastjórann sem aldrei lauk lokaprófi í hagfræði frá þeim þýsku háskólum sem hann marséraði á, þó svo að háttvirt Alþingi upplýsi að hann hafi verið fullgilt fjármálaséní með próf frá Hitler-Þýskalandi. Nei, fjandakornið, ekki hefur það verið ástæðan, enda man ég ekki eftir því að hafa skrifað neitt slíkt á Eyjunni, og það sýnir yfirlitið á Facebook heldur ekki.

Egill hefur nú sjálfur verið verið ötull við að skíta mig og aðra út og til (hér), en ég hef ekki lokað á hann enn. Mér finnst gaman að láta fræga menn gera sig að fíflum. Ég kippi mér ekki upp við svínaríið i honum Agli, en hann þolir greinilega ekki að ég gefi einstaka stikkpillu á Eyjunni.

En nú vitum við það, Eyjan er með bannlista al la Guardian. Ætli hann sé ekki öllu heldur líkari bannlista Neues Deutschlands eða annarra flokksmálgagna í DDR-inu sem ganga að mínu mati aftur á blessaðri Eyjunni.

Athugasemdir

[Jack Daniel's, 6.11.2014 kl. 18:10]

Velkominn í hóp okkar útskúfuðu.
Ég er einnig í banni á Eyjunni/Pressunni sem og DV.

Ætli Egill stjórni því líka?

Kv, Jack.

[Vilhjálmur Örn Vilhjálmsson, 6.11.2014 kl. 18:23]

 Sagt er í sumum hornum, að Egill sé Guð...

[Vilhjálmur Örn Vilhjálmsson, 6.11.2014 kl. 18:30]

... en Pressan er bönnuð öllum, svo það er ekkert að marka.

[Heimir Lárusson Fjeldsted, 6.11.2014 kl. 20:41]

Egill er yfir aðra hafinn.

[Helga Kristjánsdóttir, 6.11.2014 kl. 21:32]

 Þið fenguð þó að kíkja inn í dýrðina. 

[HK (IP-tala skráð) 6.11.2014 kl. 21:53]

Síðuhaldari bannar líka fólk á sinni síðu og kastar því grjóti úr glerhúsi

[Örn Johnson ´43 (IP-tala skráð) 6.11.2014 kl. 22:54]

Ég er líka útskúfaður af þessum besservisser RUV. Hann þolir ekki eitt orð í gagnrýni sem bara lýsir smásál.

[Vilhjálmur Örn Vilhjálmsson, 7.11.2014 kl. 05:35]

HK, hver ert þú? Ef menn geta ekki komið fram undir nafni eins og þú, eða eru með persónulegan óhróður eða hatursáróður, þá geta þeir verið heima hjá sér. Ég hef komið fram undir nafni á Eyjunni og ekki verið með persónulegan óhróður. Mín "sök" er að Egill Helgason hefur ákveðið að ég sé "dóni" vegna þess að ég hef dregið sannindi hans í efa og sýnt fram á staðreyndir sem ekki henta Agli og fólki sem lifir í þeim fordómum sem hann lifir í.

Er nema von að allir séu svo ánægðir á málgagni Samfylkingarinnar. Það er ein versta Hallelúja-samkunda á Íslandi. "Takk Egill", "Voða ertu klár, Egill", "Gott Illugi, þú ert séní" o. s. fr. eru frasar sem þar sjást daglega.

[Vilhjálmur Örn Vilhjálmsson, 7.11.2014 kl. 07:11]

Hann er reyndar líka af trúboðaættum han Egill.

[FORNLEIFUR, 13.11.2014 kl. 11:56]

Nú er líka búið að láta banna facebók Fornleifs Fornleifssonar sem var FB fyrir bloggið Fornleifur, www.fornleifur.blog.is.