Björgunarafrek ársins

 

Mikið hlýnaði kattarlausum kattakarli eins og mér hér í morgunsárið, þegar ég horfði á útrunnar RÚV-fréttir gærdagsins. Þær voru enn vel ætar og sérstaklega vegna björgunar persneska innflytjandakattarins Hnoðra á Urðarstíg, sem skyggði alveg á þau 17.000 störf sem Little Iceland ætlar að skapa á næstu árum.

Þarna sameinaðist íslenskur mannkærleikur og annáluð vinsemd Íslendinga við alla þá sem erlendir eru og í nauð staddir. Að sjá bráðalækna, slökkviliðsmenn og löggur bogra yfir Hnoðra var á við 4-5 þætti af Bráðamóttökunni. Tár kreistist út úr þurrum hvörmum. Óttar Sveinsson mun örugglega skrifa bók um þetta afrek.

Þeir sem stóðu að björgun Hnoðra á Urðarstíg hafa svo sannarlega gert sig sigurstranglega í keppninni um björgunarverðlaun ársins 2013. Ef þetta hefði gerst fyrir, segjum 20 árum, þá hefði brunaliðið bara hent kettinum í öskutunnuna.

Ég óska Hnoðra góðs bata í batnandi heimi og foreldrum hans alls hins besta í að koma húsinu í lag. Það er algjör perla.

Nú vona ég að Mali, bloggköttur Sigurðar Þórs veðurskálds, hafi horft á fréttir. Harðlyndi hans gegn smærri dýrum gæti læknast við að sjá svona góðmennsku við lítil dýr.

Athugasemdir

[Sigurður Þór Guðjónsson, 11.10.2013 kl. 15:59]

Mali the malicious er allur að mykjast og mjálmar að hann ætli bara að veiða litlar mýs en ekki litla fuglshnoðra héðan í frá. Og svo flugur og hvers kyns smápöddur. Óværu af öllu tagi. 

[FORNLEIFUR, 11.10.2013 kl. 16:06]

Hvað með gott þurrfóður með músa eða kjúklingabragði, eða bara gamaldags þunnildi? Guðrún Símonar gaf köttum sínum rækjur og saxbauta.