Guðni sagnfræðingur

 

Guðni Th. Jóhannesson (eða er það Jóhanesson, sjá mynd) gerði hlé á 17. júní teitinni til að fara upp í Efstaleiti og fara í viðtal. Hann var enn með þjóðernissjarmaklút um hálsinn og með þjóðlegan uppblástur og/eða uppgræðslu efst á höfðinu eins og sæmir vel greindum mönnum, þótt innblástur sé betri. Hann átti þarna að segja álit sitt á hátíðarræðu fyrrverandi sjónvarpsmanns og núverandi forsætisráðherra, Sigmundar Davíðs.

Þegar Guðni Th. Jóhannesson hreppti lektorstöðu við HÍ í byrjun ársins, bjóst maður við því að skjágleði hans myndi fara minnkandi og að hann lokaði sig loks inni í fílabeinsturni sagnfræðideildar, gengi þar um ganga eins og draugur og heilsaði ekki samkennurum sínum eins og lengi var þar til siðs. En sumir verða háðir því að koma fram og geta ekki hætt.

Guðni, sem er eins og margur á sömu pólitísku hillu og hann, sérleyfishafi á sannleikann og réttlætið og aldeilis ekki með þjóðernisrembing frekar en aðrir ESB-lingar. Því taldi hann öruggt að Sigmundur Davíð hefði verið að særa upp útlendingagrýlu með því að bauna á Alþjóðagjaldeyrissjóðinn og ESB í ræðu sinni.

Ekki veit ég betur en að þeir sem eru á sama róli og Guðni í pólitíkinni séu meistarar í grýlusögum, fordómum og samsæriskenningum, og reyndi fyrri stjórn, sem Guðni var vikapiltur fyrir í fjölmiðlum, lengi að telja fólki trú um að allt færi Jólaköttinn ef við greiddum ekki öll Icesave skuldina eða gengum þegjandi og hljóðalaust inn í alsæluna og atvinnuleysið í ESB. Svo ekki sé talað um endalaust mat Guðna á persónu og gjörðum forseta Íslands sem vinstri menn hafa aldrei fyrirgefið að hafa kvænst gyðingnum frá Búkara, sem þeir vilja nú þjóðnýta og arífísera, því hún á svo mikinn pening í London (sjá þessa frétt í fréttum RÚV 16.6. 2013, þar sem eignir Dorritar voru gerðar upp Eignir metnar á tugi milljarða af Björn Malquist góðvini Ólafs Stephensens á Fréttablaðinu sem hóf pógrommið í þetta sinn).

En lektornum nýbakaða þykir kannski gríska lygakvendið Damanakin heillandi, þegar hún lýgur fyrir opnum skjöldum um makríldeiluna í Brussel, jafnvel svo illilega að Steingrími J. ráðherra fyrrverandi stjórnar þykir það einum of?  

Hvar var Guðni sagnfræðingur þegar fyrrverandi stjórn magnaði upp Grýlur með ESB til að hræða almúgann í landinu til óþarfrar hlýðni, sem hefði kostað þjóðina áratuga þrælastand og tap á auðlyndum hennar. Víst má þó telja, að Guðni er með annars konar réttlætistilfinningu og flestir Íslendingar, og þolir betur kúgun og yfirvald en við hin sem fengum nóg. Sömuleiðis er orðið alveg víst að hún er ekki áreiðanleg sagnfræðin sem hann túlkar í fréttum áróðursstöðvarinnar RÚV, ef það er þá yfirleitt sagnfræði.

En nú eru komnir aðrir tímar og kannski vert að fá aðra sagnfræðitrúða í RÚV fréttirnar til að vega upp á móti þeim rauðmálaða. RÚV verður að hætta að vera systurfjölmiðill Neues Deutschlands og Prövdu. Fólk er búið að fá nóg af litlum hvolpum sem frekar flytja fréttir frá Gaza en af þjóðmálaumræðunni.  

Guðni Th. Jóhannesson verður svo að gera upp við sig, hvort hann er sagnfræðilektor eða bara vikapiltur stjórnarandstöðunnar, annars missir hann allan trúverðugleika.

Athugasemdir

[Ásthildur Cesil Þórðardóttir, 19.6.2013 kl. 11:20]

Þeir eru nokkrir vikapiltarnir í ESB ruglinu, Eiríkur Bergmann til dæmis Þórhallur Baldursson og nokkrir fleiri, ég hef fyrir löngu hætt að trúa orði af því sem þeir segja.  Það er af gefnu tilefni vegna þess hvernig þeir hafa túlkað umræðuna um innlimunina í ESB segjandi vera sérfræðingar og prófessorar.  Einhvernveginn stækkaði ræða Sigmundar í mínum eyrum við þessi lítilmótlegu ummæli Guðna.

[Vilhjálmur Örn Vilhjálmsson, 19.6.2013 kl. 12:10]

Fyrst þú nefnir Baldur Þórhallsson, Ásthildur, (og öfugsnýrð nafni hans), þá hlustaði ég nýlega á þetta rugl http://www.youtube.com/watch?v=7rxDxXd73qw sem fór fram á Bifröst.

Ef kennslan er eins og það sem þarna heyrist, þá legg ég til háskólum verði fækkað. Er ekki grundvallaratriði að menn viti eitthvað um það sem þeir eru að kenna? Mig grunar að þessi Evróputengslafyrirlestur um 15. og 16. öld sé hluti af áróðrinum um ESB.

[Ásthildur Cesil Þórðardóttir, 19.6.2013 kl. 22:48]

Já sorrý leitt að snúa nafninu við.  En maðurinn er sá sami, og ég er sammála þér, langt skal seilst til að finna rök fyrir ESB innlimun.

[Vilhjálmur Eyþórsson, 20.6.2013 kl. 14:15]

Ég sé að Guðni er með trefil í fánalitum Rússlands, Hollands, Frakklands, Bretlands, Bandaríkjanna, El Salvador, Króatíu o.fl. o.fl.

Þar á meðal Íslands.

[Vilhjálmur Örn Vilhjálmsson, 24.6.2013 kl. 11:42]

Sæll Vilhjálmur, allt veltur það nú á bláa litnum. En í tilefni 17. júní segjum við bara að þetta hafi verið íslenski fáninn sem Guðni skartaði, enda lektorinn orðin eins og fánastöng eða helst pólitískur vindhani, sem hefur fests í einu mesta vinstra roki og harmkvælum sem menn muna eftir hér nokkrum vikum eftir að ný stjórn tók völdin