LÍN blóðmjólkar aumingjana

Ég er alls óhræddur við segja fólki opinskátt af högum mínum, þótt að þessu bloggi mínu sé ekki ætlað að vera upplýsing um það sem ég er að hræra í pottinum eða hvað kemur í koppinn þegar ég stíg fram úr fletinu snemma morguns.

Nú ætla ég að gera smá undanþágu og hafa þetta ég - um mig - frá mér  - til mín blogg, í stað þess að vera macho-karl sem ber erfið örlög sín mannalega en brotnar að lokum undan því eins og lítil stúlka.

Í júní á síðasta árið missti ég atvinnuleysisbætur í Danmörku. Ég hafi í lengri tíma, on and off, verið atvinnulaus áður en það gerðist, en getað fengið ágætar atvinnuleysisbætur. Síðan ég missti bæturnar, hef ég ekki haft neinar tekjur. 0 kr. Ekkert! Ég get heldur ekki fengið neina styrki frá bæjarfélagi mínu, þar sem tekjur konu minnar sem er yfir ákveðnu marki, valda því að ég verð að lifa á hennar tekjum.

Ég er eins og "bara heimavinnandi" konurnar í gamla daga, sem "sátu" heima og urðu að sætta sig við að kerlingardræsur á vinstrivængnum kölluðu þær eldhúsmellur. Ég er hins mjög vegar stolt "eldhúsmella" og stéttvís. Því áður en konurnar fóru út atvinnumarkaðinn voru fyrirvinnunnar oftast með hærri laun en einn maki / fyrirvinna hefur í dag. Svo hart er nú í koti mínu - og margra annarra. Um 20.000 manns eru í sömu sporum og ég í velferðarparadísinni Danmörku.

Ég tók á sínum tíma gríðarleg námslán og hef eins og margir mikla námslánaskuld, sem ekki minnkar, eða hverfur eins og kúlulán krimmanna. Reglur LÍN gera ráð fyrir því að menn get sótt um undanþágu frá afborgunum. Ég sótti um daginn um slíka undanþágu eftir að ég var búinn að útvega fjögur mismunandi gögn sem staðfestu atvinnuleysi mitt, skattamál og þar að auki tekjumissinn af völdum atvinnuleysis og stöðvunar atvinnuleysisbóta. Ég fór eftir þessari leiðbeiningu sem mér barst frá starfsmanni LÍN: "Ef sótt er um vegna atvinnuleysi og ekki hægt að senda staðfestingu á atvinnuleysi erlendis frá þá er að senda staðfestingu um að þú sért á skrá en eigir ekki rétt á greiðslum, eða staðfestingu frá ráðningaskrifstofu og þá tímabil skráningar, eða umsóknir um störf ef sótt er um í gegnum netið þá senda afrit af því. Sendu einnig staðfestingu frá kontanthjælp um að þú eigir ekki rétt á greiðslum frá þeim og þá tímabil."

Ég hef uppfyllt þessa ósk um upplýsingar um atvinnuleysi, en LÍN telur enn að ég hafi tekjur þótt það komi hvergi fram á því sem ég sendi þeim af gögnum frá opinberum stofnunum og skattayfirvöldum. Ekki er laust við að LÍN gefi í skyn að atvinnuleysi mitt sé mér sjálfum að kenna. 

 

Námslánskuldarar í vanda eru rúnir meðan fjárglæfrafólki er verðlaunað

En þetta er auðvitað íslenska kerfið, þar sem kúlulánakrimmarnir sleppa við endurgreiðslur, meðan atvinnulausir menn og algjörlega tekjulausir sem ekki hafa rænt banka eru rúnir, þegar aldur, of mikil menntum (já, þið lesið rétt) og almennt atvinnuleysi, sem er þjóðhagslegt vandamál í löndum Evrópu ESB (Danmörku), veldur atvinnuleysi sumra þeirra. Vonandi er LÍN ekki að halda því fram að ég sé sjálfur valdur að að atvinnuleysi mínu og fjárhagsörðugleikum?

Mig gruna að sumt fólk á Íslandi haldi að atvinnuleysi sé meira böl á Íslandi en annars staðar í nágrannalöndunum og heldur að maður fái bara starf ef maður sæki um. Þannig er ástandið ekki einu sinni í gósenlandinu Noregi, þar sem ég sótti nýlega um stöðu.

Ég er búinn að setja mál mitt undir úrskurð stjórnar LÍN og vona að menn þar sjái, að ástandið á Íslandi er kannski betra en víða annars staðar.

LÍN ætlar þó varla að fara að þurrmjólka "ofmenntaðan" og gamlan aumingja eins og mig, meðan sleipir kúlánakrimmar sleppa við borga af lánum sínum. Hver veit? Innheimtufyrirtæki LÍN hefur líka sérhæft sig í að bjarga kúlulánakrimmum.

Oh elskurnar mínar, klukkan orðin svona margt. Nú er best að fara að undirbúa kvöldmatinn, og ég þarf líka að hengja upp tau, sem sat á hakanum meðan ég deildi þessum öngum mínum með ykkur.

Athugasemdir

[Símon (IP-tala skráð) 12.4.2013 kl. 20:44]

LÍN er frægt fyrir skíthæla, og hefur alltaf verið, amk síðan Megas samdi lagið um frú Normu og ormana. Þú mátt búast við því að stjórnin hafni máli þínu, en þá verður þú að kæra til málskotsnefndar.

Passaðu þig á því að hafa á hreinu öll gögn og samskipti. Ef þú þarft að senda gögn til þeirra, gerðu það þá helst með tölvupósti þannig að þú hafi sönnun á því að LÍN hafi fengið gögnin, dagsett. EF þetta er ekki hægt, biddu um kvittun frá LÍN.

EKKI hringja með fyrirspurnir, hafðu samband gegnum tölvupóst. Þú getur ekki sannað neitt hvað var sagt og ekki sagt í gegnum síma, og þarna er fólk sem hikar ekki við að ljúga um slíkt.

Ég segi þetta af reynslu, því ég veit að liðið þarna reynir ýmislegt vafasamt til að komast hjá því að afgreiða mál þeim í óhag, m.a. reynt að ljúga því að gögn hafi aldrei borist.

Gangi þér vel

[Theódór Norðkvist, 12.4.2013 kl. 21:18]

Kona um fimmtugt sem ég þekki og ákvað að fara í síðbúið nám, var að tala um að hún þyrfti sennilega aldrei að borga námslánin sín að fullu. Hún ætti svo lítið eftir af starfsævinni.

Ég sé reyndar ekkert um það í lögunum um LÍN að það sé hætt að rukka fólk eftir að það fer á eftirlaun, líklega geta þeir elt mann fram á grafarbakkann. Lífeyristekjur hjá flestum eru samt svo skammarlega lágar, að afborganir verða líklega ekki háar á eftirlaunaárunum. Ég á ekki langt í fimmtugt sjálfur.

Gangi þér vel í baráttunni við þessa þursa.

[Vilhjálmur Örn Vilhjálmsson, 13.4.2013 kl. 04:31]

Þakka ykkur fyrir góðar kveðjur Símon og Theódór.

Ég hef allt á hreinu í samskiptum mínu við LÍN og hef lengi haft það að reglu sem þú ræðir mér Símun. Ég hef reyndar ekki haft nein vandamál með sjóðinn fyrr en nú í atvinnuleysi mínu og tekjumissi. Ég hef afhent þau gögn sem þeir báðu um, til að sanna atvinnuleysi mitt, og veit eiginlega ekki af hverju þeir trúa því ekki að ég sé ekki með tekjur og sé algjörlega atvinnulaus og þar af leiðandi ekki borgunarmaður í augnablikinu. Þeir halda kannski að Davíð Oddsson borgi mér fyrir að blogga? Kannski verður brátt bannað að blogga og kvarta?

Ég vissi ekki betur en að lánin fyrndust þegar maður fer á eftirlaun. Ég held mig líka eiga reglur um það, því ég hef geymt 2-3 stórar möppur með öllum samskiptum mínum við LÍN gegnum árin. Eina hef ég enn í hillu, hinar með öllum skuldabréfunum og umsóknunum uppi á háalofti.