Forsetaþankar

Öllum er heimilt að koma með innlegg í umræðuna um hver gæti tekið við keflinu af Ólafi Ragnari Grímssyni. Nú virðist samt sem enginn vilji í þetta embætti og mönnum er hálfilla við að einhver sé að stinga upp á þeim.

Eiður Guðnason ætlar ekki að bjóða sig fram, enda er það alls endis ótækt að forseti sé signt og heilagt að leiðrétta stafsetningavillur og málfar þjóðarinnar. Stungið hefur verið upp á fangaverði. Er það ekki illkvittni?

Ég sá landsfrægan bloggara fara fögrum orðum um Sigurð Líndal sem kræsilegt forsetaefni. Æi, er hann ekki of gamall karlinn, og ekki er það honum til framdráttar, að alþekkt er að hann gaf mönnum alltaf lægstu einkunn ef þeir vitnuðuð ekki í hann í munnlegum prófum í lögfræði. Kannski var bloggarinn sem stakk upp á Sigga bara viljandi að reyna að útiloka Líndal með því að stinga upp á honum. Það er ekki sama hvaðan áskorun kemur. Kannski væri hægt að leita eftir áliti Sigurðar á þessu eins og öllu öðru. Kannski væri hægt að skipa nefnd.

Erfðaprinsa viljum vér ekki lengur hafa í þessu landi. Þórarinn Eldjárn er sonur Kristjáns heitins forseta. Hann er og verður ávallt forsetasonur - á Möve hjóli. Listunum væri gerður mikill grikkur ef hann þyrfti að fara að berjast við alþýðuna í landinu, þegar búið er að svíkja hana inn í ESB. En lítum á björtu hliðarnar: Ljóð hans gætu orðið að útflutningsvöru ef hann yrði kosinn. Einverjir telja að Þórarinn eigi allan stuðning Davíðs Oddssonar vísan. Getur nokkur verið í vafa um það? Rím og ljóðstafir hafa alltaf verið sterkasta hlið Davíðs, sem sjálfur er ekki á þeim buxunum að fara í forsetaframboð. Það kallar maður raunsæi.

Margar konur vilja örugglega fá konu á Bessastaði. Séð hef ég einhverja stinga upp á Jóhönnu Sigurðardóttur.  Líklega var það samfylkingin sem vill losna við kerlinguna. Er hún ekki í æviráðningu? Frekar vil ég Jónínu sem forseta og Jóhönnu sem forsetafrú. Það yrði helvíti flott.  

Sigrúnu Davíðs sá ég einnig hafna upp til skýjanna á bloggi Drésa Jóns almannatengslamanns. Þótt Sigrún sé örugglega hin vænsta kona, þá sé ég hana ekki fyrir mér á Bessastöðum. Forseti, sem átti pabba sem var í íslenska nasistaflokknum  og lauk námi í Þýskalandi nasismans, (eða gerði hann það nokkru sinni?) gæti orðið of áhugaverð í útlöndum. Syndir feðranna eiga auðvitað ekki að hafa áhrif, en ekki er nú beinlínis hægt að segja að þær hafi verið spennitreyja fyrir börn Davíðs Ólafssonar frekar en börn annarra nasistadindla á Íslandi. Einhvern tíma var frambjóðandi sem átti danska konu, og var það talið honum til lasts. Pabbi, sem var aðdáandi Hitlers og bankastjóri, getur vart verið miklu betri en dönsk kerling.

Jón Gnarr er alvegaágæt uppástunga - ef menn vilja afnema forsetaembættið fyrir fullt og allt. Með Gnarr á Bessó stæðu Íslendinga vissulega miklu betur að vígi þegar geimverur koma og taka jörðina. Engir taka okkur nefnilega alvarlega nema grænir smokkfiskar á fljúgandi diskum, sem vilja inn í ESB um leið og Samfylkingin. En stendur Gnarr sig ekki bara vel sem borgarstjóri? Hann er að minnsta kosti búinn að skjóta Margareth Thatcher ref fyrir rass í niðurskurði. Maður fær það sem maður kýs eins og þeir sögðu í Múmindalnum áður en hann lagðist í eyði. Maður spyr ekki að því, ef hann fer að láta flúra skjaldamerki lýðveldisins á þann handlegginn sem enn er heill og hægt að nota.

Ég stakk sjálfur nýlega, og ófullur, upp á Halldóri Guðmundssyni bókamessumanni og hann fékk reyndar orðu frá Ólafi um áramótin. Hann hefur skrifað löglega um Hans Konunglegheit Laxness. Nærri guðunum getur maður ekki komist án leyfis. Það útilokar eðlilega Hannes Hólmstein Gissurarson, þótt hann hafi helvíti góð sambönd.

Guðmundur Magnússon og Egill Helgason, http://silfuregils.eyjan.is/2012/01/03/forsetakosningar-og-fjarmal/#comments telja það fráleitt annað en að taka tilkynninguna frá Ólafi alvarlega. Þeir koma sjálfir ekki til greina sem forsetar nema mögulegt væri fyrir þá tvo að sitja saman á forsetastól bekk. Þeir eru eru sammála um að Ólafur Ragnar hefði ekki ráð á því að bjóða sig fram, þar sem engir fjármálamenn séu lengur á bak við hann eins og Jón Ásgeir var hér um árið. Guðmundi og Agli hlýtur samt að vera það í fersku minni að árið 2008 lækkaði líka gengi sumra blaðamanna á Íslandi sem höfðu verið on the take. Núverandi ríkisstjórn er reyndar líka ýtrasta afleiðing af voðaverkum Jóns Ásgeirs og félaga í aurnum. Hugsanlega þarf ekki að fullvissa þjóðina með loftpeningum eins og gert var fyrir 2008. Kannski vill fólkið halda í Ólaf Ragnar alveg fram í hans örgustu elliglöp. Svo á Ólafur líka bestustu konu á Íslandi sem enginn slær út.

Æi, það eru engir á sviðinu, og ég segi bara eins og hinn skríllinn: Páll Óskar eða Mugisson.  Kannski getur einhver illa gerður hlutur orðið að forseta. Árni Matthíasson skrifaði í dag í Moggann um samkennd með hlutum. Ég vissi ekki að hægt væri að hafa samkennd með hlutum. En ef það er hægt væri kannski tilvalið að gera kerti að forseta á Íslandi eða þriggja barna einstæða móður sem er búin að vera atvinnulaus síðan 2008. Það væri nú ekta samkennd ef hún er yfirleitt til á Íslandi.

Athugasemdir

[Sigurður Þór Guðjónsson, 4.1.2012 kl. 19:38]

En hvað með Össur Skarphéðinsson sem forseta? (Illkvittið djók!!). 

[Vilhjálmur Örn Vilhjálmsson, 4.1.2012 kl. 19:48]

Slys eða katastrófa kemur fyrst upp í huga mér. Hann yrði hins vegar ágætur kóngur, en við völdum á sínum tíma lýðræði.

[hilmar jónsson, 4.1.2012 kl. 19:50]

Spara og leggja þetta skemmda embætti niður.

[Vilhjálmur Örn Vilhjálmsson, 4.1.2012 kl. 22:10]

Hilmar, er það ekki óþarfi. Við erum ekki enn búinn að gefa öll völd í hendur ESB og furstanna í Brussell.

[Gústaf Níelsson, 4.1.2012 kl. 23:55]

Er ekki rétt að þú drekkir þig fullan, Vilhjálmur?

[Vilhjálmur Eyþórsson, 5.1.2012 kl. 00:45]

Guðni Ágútsson er minn maður. Það vantar mann á Bessastöðum, sem kann að kyssa kýr. 

[Einar Guðjónsson, 5.1.2012 kl. 01:07]

Þarf ekki einhvern eða einhverja með bein í nefinu til að standa upp í hárinu á hinu innræktaða þjófþingi og stjórnarráðselítunni ? Eða lækni ? dettur sjálfum helst í hug Sigurður G. Guðjónsson eða núverandi Sóttvarnarlæknir ?

[Vilhjálmur Örn Vilhjálmsson, 5.1.2012 kl. 07:17]

Gústaf Níelsson, þú kemur ekki með athugasemd heldur skítkast. Nei, ég drekk mig aldrei fullan og get víst talist nærri því bindindismaður nema á Coke Zero og súkkulaði. En það lýsir nú frekar skítnum karakter hjá þér að vera með svona lúalegar aðdróttanir. Ég gæti á sama hátt spurt, hvort þú sért ekki á einhverjum sterkum töflum, því þú er greinilega haldinn einhverri vanlíðan.

Þakka fyrir athugasemdir frá ykkur hinum. Haldið bara áfram að koma með tillögur. Sóttvarnalæknir og kúasmali er ekkert verri kostir en svo margt annað. Það þorir líklegast enginn í þetta embætti nema maður sem drekkur sig fullan.

[Sveinn Úlfarsson (IP-tala skráð) 5.1.2012 kl. 09:05]

Væri ekki smart að fá Jón Sigurðsson þ.e sverðið og skjöldinn aftur í forsetann, bara núna væri hann meira að segja kjörinn og allt. Við getum fengið Ladda eða Pálma Gests til að leika hann í nokkur ár.

[Vilhjálmur Örn Vilhjálmsson, 5.1.2012 kl. 11:26]

Leikarar og stjórnmálamenn, það eru vissulega skyldar greinar, Sveinn. Kannski ekki galið að fá velleikin Jón í þetta góða embætti.