Hermannaekla í Danmörku?

Ljósmynd Michael Lund

Danski Þjóðarflokkurinn, (Dansk Folkeparti), er búinn að finna sér nýtt málefni. Samvæmt nýjustu hugdettu flokksins verða Færeyingar og Grænlendingar nú að fara í danska herinn, eins og sum dönsk ungmenni. Hingað til hefur ekki verið skylda fyrir frændur okkar að bera vopn fyrir danska ríkið. Þeir mega gera það ef þeir endilaga vilja. Þessu vill Þjóðarflokkurinn breyta. Ef þessi stjórnmálaflokkur fær vilja sínum framgengt, (en hann hefur dönsku ríkistjórnina í heljartaki), verða Kaleraq og Tróndur að fara að venja sig við tilhugsunina um herskyldu og jafnvel að þeir verði sendir til Íraks til að efna til friðar.

Ég spyr: Er nú nauðsynlegt fyrir Dani að höggva skarð í æsku Færeyja og Grænlands með því að taka hana í danska herinn?

Danski Þjóðarflokkurinn virðist stundum vera flokkur brandarakarla, en oft verða “gamanmálin” hjá þeim að óþægilegum veruleika í danska þjóðfélaginu. Flokkurinn notar svona "mál", til að þrýsta á önnur mál sem þeir lifa og hrærast fyrir. En getum við ekki hugsanlega tekið frændur okkar í "íslenskan her", þegar fram líða stundir. Hvernig væri það, Björn Bjarnason? Hver veit nema að frelsisbarátta Færeyinga og Grænlendinga eigi eftir að verða blóðug, og hverjum höldum við með í þeirri baráttu?   

 

Ekki efast ég um að Inuitar og Færeyingar geti orðið góðir hermenn. BBC greindi frá því fyrir nokkrum árum að eskimóastúlka væri orðinn hermaður í Ísrael. Það er ekki heiglum hent.  

Athugasemdir

[Pétur Guðmundur Ingimarsson (IP-tala skráð) 22.1.2007 kl. 14:31]

Ég hugsa að bæði Færeyjingar og Grænlendingar muni hafa gott af smá herþjálfun, rétt eins og Íslendingar.

Svo væri vesen að höggva skarð í þeirra þjóðir, því þeir myndu líklega brytja féndur sína í spað áður en til þess kæmi. 

[Vilhjálmur Örn Vilhjálmsson, 22.1.2007 kl. 14:52]

Jössus, og ég sem hélt að herskáasti herinn í Þórshöfn og Nuuk væri Hjálpræðisherinn. Með réttum vopnum gætu Færeyingar og Grænlendingar auðvitað gengið vel. En skutull er nú til lítils gangs í Afganistan og kajak er harla staður í sandinum í Írak. En þetta gætu hugsanlega orðið lausnin á öllum vandanum í þeim löndum, ef þú hefur á réttu að standa.