Hættur að blogga

 

Nú áðan náði ég loks, eftir margra ára streð og fleiri þúsund málvillur, takmarkinu: 1000.000 flettingum á Moggablogginu án nokkurra bellibragða.

Ég hafði auðvitað búist við upphringingu frá Davíð Oddssyni og ferð fyrir okkur tvo til Lundúna. Ég hef skrifað hlutfallslega minna og sjaldnar en Páll Vilhjálmsson með sína metflettingu og aldrei um landvernd og fossa eins og Ómar Ragnarsson. Nei, á Íslandi eru kjör bloggara ein þau verstu í heiminum.

Ég ætla að hætta og fara til Noregs með læknunum, og þá munu menn sjá hve mikilvægt þetta skrafl var þegar pólskir bloggarar koma í staðinn. Það er ekkert þakklæti fyrir það sem maður gerir á þessu volaða landi.