Pepsi finnst á Ströndum

Ég er mikill áhugamaður um gosdrykki og skrifaði einu sinni pistil hér á blogginu mínu um hinn góða drykk Sinalco. Margir deildu nostalgíunni með mér. Minningarnar gusu upp, hressandi, bætandi og kætandi. Ekki var laust við að Sinalcodrykkjumenn hefðu bæði hraustlegra útlit og væru betur tenntir en þeir sem eru forfallnir kókistar.

Hér sjáið þið mynd af Pepsiflösku frá stríðsárunum, sem framleidd var af Sanitas. Nánar tiltekið er flaskan frá 1943, því 1944 var farið að nota amerískar flöskur. Líklega er flaskan úr Ingólfsfirði á Ströndum ein elsta Pepsiflaska sem til er á Íslandi. Ég tel að flaskan, sem ég fann í Ingólfsfirði á Ströndum, sé þjóðardýrgripur. 

Dropinn af Pepsi var dýr árið 1943. Í Nóvember 1943 tilkynnti verðlagsstjórinn að hámarksverð á flösku af Pepsi-Cola bæri að vera í hæsta lagi 1 króna.  Þá var krónan á svipuðu róli og danska krónan.  Ein dönsk króna árið 1943 er sama og 19,51 kr. í dag , það er að segja 456 íslenskar á núgengi (19.5.2009).

Nútímaauglýsingin kom til landsins með Pepsi-Cola. Menn höfðu aldrei séð neitt slíkt áður: Þjóðviljinn greinir frá þessu 28. júní 1944. 

Pepsi-Cola
Bæjarbúar hafa veitt eftirtekt nýstárlegu fyrirbrigði á Lækjartorgi. Í klukkuturninn er komin heljarstór mynd af flösku, svo stór að sæmilega sjónskýr maður sér hana allvel alla leið ofan af Arnarhóli. Þetta er auglýsing fyrir Pepsi-Cola, sem er fyrirmyndar svaladrykkur amerískur, ekki ósvipaður Coca-Cola.... En ekki verður sagt að þessi stóra auglýsing sé nein bæjarprýði — og frekar óþjóðleg, þótt hún væri fest upp á hátíð lýðveldisins.
Ó. Þ.

Þess má geta að ekki var einn einasti dropi í Pepsi í flöskunni þegar ég fann hana fyrir réttum 20 árum. Það gerði nú ekki mikið til, því ég hef aldrei verið neinn áhugamaður um Pepsi, þetta ropvatn sem varð til í Norður-Karólínu árið 1898 

Samkvæmt tímatalsfræði Pepsi vörumerkisins, varð Pepsi merkið á flöskunni frá Ingólfsfirði til árið 1906. Haldið er fram að merkið hafi breyst árið 1940. En auglýsingar í Bandaríkjunum frá 5. áratugnum bera nákvæmlega sama merkið og var á fyrstu flöskunum á Íslandi.  

Ef einhver hefur fundið tappann af flöskunni frá Ingólfsfirði á Ströndum, mega þeir hafa samband. Myndin af léttklæddu konunum er víst ekki frá síldarplaninu á Ingólfsfirði.

Athugasemdir

[Lissy (IP-tala skráð) 19.5.2009 kl. 17:08]

Kúl!

[dr.gunni (IP-tala skráð) 19.5.2009 kl. 20:11]

Ég þakka þennan Pepsí-fróðleik. Það er alltaf gaman að lesa um gos. Vilji fólk eitthvað svipað bendi ég á að á neytendahorninu á Vísi er komin heljarhali um Mix og fleiri drykki:

http://blogg.visir.is/drgunni/?p=403

Einnig bendi ég á gosdrykkjasíðu undirritaðs:

http://www.this.is/drgunni/gos.html

[Magga H (IP-tala skráð) 20.5.2009 kl. 00:19]

Flottur gripur ! Ég er líka  rosalega veik fyrir gömlum gosflöskum ..þessi er algjört gull !

[Guðjón Ólafsson, 20.5.2009 kl. 08:03]

Sæll

Hver leyfði þer að hirða dót úr Verksmiðjunni á Eyri við Ingólfsfjörð ??????????

ég er þaðan og öll mannvirki þar eru í eigu minnar fjölskyldu  nú skalt þú senda þessa dýrmætu flösku aftur í réttra eiganda .

Kv

Guðjón Ólafsson

[ÞJÓÐARSÁLIN, 20.5.2009 kl. 09:31]

Maður kann varla við að leita á Eyri við Ingólfsfjörð. Það er búið að merkja svo vandlega að ákveðnir hlutir séu í einkaeigu og ekki ætlast til að óviðkomandi séu þar.

[Kristjan Sverrisson (IP-tala skráð) 20.5.2009 kl. 09:51]

takk f skemmtilega færslu. Athugasemd þín um Sinalco vakti upp hjá mér skemmtilega minningu. Fyrir nokkrum árum var ég á ferð um suðurhluta Serbíu og Montenegro. Við áðum við bensínstöð í einhverju smáþorpi og vildum kaupa okkur svaladrykk og viti menn.... Blasti ekki við okkur Sinalco í gömlu Sinalco flöskunum. Hafði ekki séð þetta síðan á Íslandi fyrir aldarfjórðung eða svo. Keyptum að sjálfsögðu flösku og drukkum. Bragðið alveg einsog forðum heima. Nostalgían steyptist yfir mann. Kom í ljós að þarna er Sinalco ennþá framleitt. En nokkuð langt að sækja fyrir áhugamenn. kveðja. Kristján Sverrisson, Danmörku.

[Vilhjálmur Örn Vilhjálmsson, 20.5.2009 kl. 13:20]

Þakka ykkur öllum fyrir athugasemdirnar. Dr. Gunni og Dr. Villi eru greinilega með lík áhugamál.

Kollega minn Margrét H fann gull um daginn - Ekta gull á Þingvöllum. Við óskum henni öll til hamingju með það! Þetta er nú bara flaska sem ég rakst á.

Guðjón Ólafsson, hvar lestu að ég hafi tekið flöskuna á Eyri? Það væri nær að taka dálítið til í verksmiðjunni sem er í svakalegri niðurníðslu. Kannski hefur verið Pepsi verksmiðja en ekki síldarævintýri á Eyri? Kannski er þar fullt af þjóðardýrgripum.

Þjóðarsálin má vita, að ekki sá ég nein skilti um einkaeign og bann við veru minni þar fyrir 20 árum.

Kristján, ég hef heyrt um Sinalco á Balkan og í Túnis!

[Ragnheiður Arna Magnúsdóttir (IP-tala skráð) 20.5.2009 kl. 15:00]

Keypti síðast Sinalco í Sviss 2005......og er hann enn í framleiðslu þar...... Já ég veit, Svisslendingar eru svaka gammeldags.......þeir framleiða meiri að segja einhverskonar mysugos í glerflöskum......sem er reyndar mjög vinsæll drykkur í suður Sviss.