Femínisti eða karlrembusvín í moldviðri?

Hér er komin heldur aum skýring frá Silju Báru Ómarsdóttur á aðgerðum hennar í þágu vinkonu sinnar í prófkjöri VG : http://siljabara.eyjan.is/2010/02/syndajatning-i-moldviri.html .

Greinilegt er, að pólítbýróið og efsta sovétið í VG eru búin að viðurkenna, að kosningar hjá þeim eru hlægilegur sirkus og á skjön við allar lýðræðishefðir í siðmenntuðum ríkjum. Þessi flokkur á meira skylt við eitthvað rotið bákn í Úkraínu eða Hvíta Rússlandi. En kemur þetta á óvart?

Silja og "stjórnmálasaumaklúbbur" VG telja sig hafa allt á hreinu. Gaman er að sjá, að EKTA femínisti eins og Silja Bára hafi þótt kosningarfyrikomulagið, sem hún lýsir á bloggi sínu, eðlilegt. 

Það svínslegasta er, að Silja dregur inn í málið stúdínu, sem greinilega ekki var nógu mikill kvenskörungur til að geta klára hjá Silju MA verkefni, sem hún byrjaði á fyrir 3-4 árum. Þá lét stúdínan sig hverfa. En allt í einu hringir Silja í hana og býður henni miða í sirkus VG.

Silja dregur  meira að segja inn í málið föður konunnar, sem Silja hefur ekki séð í 3-4 ár, (því vondir karlar eru alltaf á bak við allt). Hvað er kennari við HÍ að angra fyrrverandi nemanda sinn eftir 3-4 ár með símtali úr saumaklúbbi úti í bæ, (hugsanlega án þess að kynna málstaðinn sem hún berst fyrir), og bjóða heimsendingu kjöreðla í prófkjöri VG, líkt og þeir væru Dómínó pizza? Hér blandar háskólakennari hlutunum illa saman. Háskólakennarar eiga ekki að blanda saman áhugamálum í einkalífi sínu, stjórnmálastandi og viðskiptum við fyrrverandi nemendur sína. Það kemur málinu ekkert við, að konan sem Silja hringdi í, hafi byrjað á MA verkefni fyrir 3-4 árum og að Silja hafi ekki séð hana síðan! Silja skrifar hér eins og versta gerða af karlrembusvíni.

HÍ verður að taka á máli Silju. Kennari hringir ekki í fyrrverandi nemanda sinn og býður honum heimsendingu kjörseðils. Kennari greinir ekki síðan frá námsárangri nemanda sína á bloggi á Eyjunni vegna þess að stolt kennarans hefur lent í "moldviðri". Eina moldviðrið sem hefur geisað í þessu máli hefur komið úr svínastíu VG. Siðleysi vinstri manna er mikið og þeir eiga erfiðast allra með að viðurkenna galla sína.

Athugasemdir

[Vilhjálmur Örn Vilhjálmsson, 10.2.2010 kl. 08:31]

Málsbætur Silju Báru Ómarsdóttur:

syndajátning í moldviðri

Ég játa það hér með að ég studdi Sóleyju Tómasdóttur í forvali VG í Reykjavík. Eins og ég sagði í færslu hér að neðan þá er hún vinkona mín og hún hefur komið mér ánægjulega á óvart sem stjórnmálamaður þrátt fyrir að ég hafi haft á henni mikla trú fyrir.

Síðastliðinn laugardag sat ég ásamt nokkrum öðrum stuðningsmönnum Sóleyjar og hringdi í fólk sem ég taldi líklegt til að kjósa hana. Ég hef gert þetta fyrir vini mína áður, bæði í VG og í öðrum flokkum, auk þess sem ég hef kosið í forvali og prófkjörum til að styðja fólk sem ég tel líklegt til góðra verka. Ég hef líka flutt utankjörstaðaratkvæði fyrir fólk milli landa og landshluta, allt til þess að tryggja að fólk komi skoðunum sínum og vilja á framfæri á lýðræðislegan hátt.

Forvalsreglur VG eru – eins og flestar slíkar reglur – misskýrar og þær má svo sannarlega bæta. Póstkosning með utankjörstaðaratkvæðum fer fram samhliða hefðbundinni utankjörstaðarkosningu og hægt var að koma slíkum atkvæðum til skila þar til kjörstaðir lokuðu. Þetta vissum við sem sátum þarna saman og höfðum fengið staðfest frá kjörnefnd að við mættum láta fólk fá seðla ef það kæmist ekki á kjörstað, en utankjörstaðaratkvæðaseðlar voru til á rafrænu formi. Atkvæðin væru þá fyllt út af viðkomandi, sett í umslag og lokað, og það umslag sett í annað umslag þar sem þurfti að skrifa nafn og kennitölu, sem yrði borin saman við kjörskrá og kjörsókn.

Eitt af símtölunum sem ég hringdi var í konu sem svo vill til að var í námskeiðum hjá mér fyrir 3-4 árum. Hún byrjaði að skrifa hjá mér MA ritgerð en ég hef ekki séð hana í ca ár. Við höfum rætt pólitík og ég veit að hún kýs gjarnan í forkosningum svo ég ákvað að hringja í hana og athuga hvort hún hefði komist á kjörstað. Ég sagði henni því að það væri hægt að koma til hennar kjörseðli ef hún kæmist ekki á kjörstað. Hún afþakkaði. Ég man ekki einu sinni hvort ég sagði henni að ég væri að hringja frá Sóleyju, og ég spurði hana sannarlega ekki að því hvern hún ætlaði að setja í fyrsta sætið á listanum.

Þetta tilboð er nú orðið að sögu um það að ég hafi gengið í hús og borið atkvæðaseðla á nemendur. Faðir þessa fyrrum nemanda ásakaði mig líka um að ætla að koma í veg fyrir leynilega atkvæðagreiðslu, sem ég skil ekki alveg því viðkomandi hefði auðvitað fyllt út kjörseðilinn og sett hann í tvö umslög, sem einhver (ekki ég, því ég var ekkert að skutlast) hefði farið með á kjörstað.

Ég neitaði að tjá mig við Fréttablaðið í gær þar sem úrskurður kjörnefndar var ekki kominn. Hann liggur nú fyrir (en ég hef verið á ferðalagi og ekki komist í tölvu fyrr en nú). Við, stuðningsmenn Sóleyjar og aðrir frambjóðendur sem fóru eins að, vorum að fara að reglum rétt eins og við töldum okkur vera að gera. Frambjóðandinn sem kærði þetta þekkir staðreyndir málsins. Þessi umræða er að mínu mati lítið annað en moldviðri til að draga úr því að ung kona, Sóley Tómasdóttir, alkunnur róttækur femínisti, hafi lagt miðaldra mann að velli í keppni um oddvitasætið í forvali ríkisstjórnarflokks. Slíkt á auðvitað ekki að líðast.

[Guðrún (IP-tala skráð) 10.2.2010 kl. 11:26]

Mér finnst þessi syndajátning alls ekki Silju til framdráttar og það tók nú steininn úr að lesa niðurlagið á textanum þar sem hún gerir lítið úr mótframbjóðanda Sóleyjar að því er virðist fyrir þær sakir einar að vera miðaldra og karlkyns. Hvers konar fordómar eru þetta? Hefur hún kynnt sér fyrir hvað þessi maður stendur og hver hans bakgrunnur er? Má fólk ekki lengur sækjast eftir að leiða lista ef það er komið yfir fimmtugt - er pólitík bara fyrir unga fólkið?

[Jónas S Ástráðsson, 10.2.2010 kl. 13:58]

Sóley Tómasdóttir, alkunnur róttækur femínisti, hafi lagt miðaldra mann að velli í keppni um oddvitasætið í forvali ríkisstjórnarflokks. Slíkt á auðvitað ekki að líðast.  Hnaut um þetta yfirklór hjá Silju Báru Ómarsdóttur.  Hvílíkt oflæti og kvenremba , Þegar reynslu er á glæ kastað í unggæðis hætti eða fávisku þarf að stokka upp á ný.

[Vilhjálmur Örn Vilhjálmsson, 10.2.2010 kl. 16:07]

Takk fyrir Jónas og Guðrún. Nú er Silja búin að breyta textanum. Hér verður honum ekki breytt. Stundum held ég að femínistar séu bara konu með of marga gallaða karalitninga!

[Steingrímur Helgason, 11.2.2010 kl. 01:38]

Handónýtt femýnöznublæti...

[Sigurður Þórðarson, 11.2.2010 kl. 06:22]

Fróðleg lesning.

Þorleifur er mjög geðþekkur maður og mér finnst þetta á allan hátt undarlegt.