Líkþráir Íslendingar

  

Einu sinni þegar ástandið var jafnvel verra en það er nú á Íslandi, var holdsveikin landlæg. Þegar franski náttúrufræðingurinn og ferðalangurinn Joseph Paul Gaimard ferðaðist um þetta volæðis land árið 1835 varð á vegi hans ólánssamt, líkþrátt fólk. Listamaður í för með Gaimard hinum franska, Eugene Robert, teiknaði þessa og aðra holdsveika Íslendinga, sem gætu verið ættingjar einhverra okkar. Ekki var það fyrr en 1898 að Holdsveikraspítalinn í Laugarnesi, sem lengi var stærsta timburhús á Íslandi, var byggður og ástandið fór að breytast til batnaðar, svo og með bættu hreinlæti landsmanna. 

Minnumst þessa tíma nú, þegar allt er í klessu og allir að missa vitið vegna afglapa drengjanna í fínu fötunum.

 

Athugasemdir

[Kristján Sveinsson (IP-tala skráð) 16.11.2008 kl. 23:13]

Gamli minn.

Eftir daglegt loftrýmiseftirlit mitt og samtal við greiningardeildir föllnu bankanna, miðil, spákonu og einn framliðinn landbúnaðarráðunaut hef ég komist að því að það hefur einhver skrökvað því að þér að þetta séu líkþráir Íslendingar frá 19. öld. 

Þeir eru bara þráir og líta svona út alltaf þegar þeir þráast við. Þetta eru þrábrigði nefnilega, sem koma í staðinn fyrir svipbrigði hjá Íslendingum. Sá efsti er að þráast við að segja af sér embætti. Næstur þráast við að borga skuldir. Þarnæstur þráast við að safna skuldum. Sá neðsti er hins vegar greinlega sauðþrár eða haldinn sauðþrá — það er ekki alltaf auðvelt að greina á milli.

[Vilhjálmur Örn Vilhjálmsson, 17.11.2008 kl. 08:24]

Meistari Kristján, ekki ætla ég að útiloka að þessi hypóþesa þín sé röng. En ef litið er á myndirnar hér fyrir neðan, held ég að greining Dr. Gaimards hafi verið algjörlega út í hött. Maðurinn með Bowlerhattinn hafði útþrá og er forfaðir Sigurðar Einarssonar, eins og sést á augnsvipnum og gírugu brosinu. Sá neðri er bara með unglingabólur, sem honum hefur ekki tekist að kreista út fyrir framan spegilinn í Bessastaðaskóla. Magister Grímur Thomsen hefur brugðist þessum manni og ekki getað útvegað honum Adonis salva frá Kaupmannahöfn áður en frönsku artistarnir náðu honum á vondum húðdegi heima á bæ foreldra hans í Kjósinni.

[Vilhjálmur Örn Vilhjálmsson, 6.12.2008 kl. 09:16]

Að betur athuguðu máli, hafði Grímur Thomsen auðvitað ekkert með þennan pilt að gera. Sá sem ekki útvegaði honum Adonis Salve var Sveinbjörn Egilsson. Hann hafði einnig reynt að þröngva þessum manni, Halldóri, í bindindi eins og hann gerði síðar við aðra í Lærða skólanum. Halldóri þessum mun hafa batnað af bólunum, og stóð síðar á bak við pereatið í Reykjavík. Sjaldan þakkar kálfur ofeldið.