Nífalt Húrra

Danir höfðu miklar áhyggjur af Íslendingum í Seinna stríði og margar gróusögur bárust til Danmerkur um trúnað Íslendinga við konungssambandið. Það var mjög erfitt fyrir danska erindreka á Íslandi og í örðum löndum utan áhrifa Þriðja ríkisins, að gera sér fulla grein fyrir því hverjir vildu hraða sambandsslitunum og hverjir vildu bíða til loka stríðsins. Einstaka glöggir menn í utanríkisþjónustu Dana, sem voru Íslandsvinir í raun, vissu hins vegar mætavel að skoðanir Íslendinga voru eins margar og Íslendingar sjálfir og að þær gátu breyst eftir hentugleika.

Oft birtust í dönskum dagblöðum skrítnar greinar, sem stundum hefur verið erfitt fyrir mig að rekja til heimahúsanna. Oft grunar mann að fjölmiðlar eða danskir sendifulltrúar í löndum, sem ekki voru undir hæl nasismans, hafi uppdiktað sögur, líkt og söguna um Kristján konung sem reið um götur Kaupmannahafnar með gyðingastjörnu til að sýna dönskum gyðingum stuðning sinn haustið 1943. Um uppruna þeirrar sögu hef ég skrifað lærða grein eftir að ég fyrstur manna uppgötvaði hvernig sagan og margar aðrar slíkar höfðu verið búnar til af  Dönum í Bandaríkjunum, Dönum sem gagngert unnu við það að bæta og fegra ímynd Dana þar í landi og meðal Bandamannalandanna.

Í ágúst 1941 barst frétt frá Íslandi í danska blaðinu Aftenbladet, (sem ekki er lengur til), sem líklega hefur gert danska konungssinna glaða og hamingjusama. Ég hef ekki fundið fréttinni stoð í íslenskum fjölmiðlum og þæði því hjálp lesenda minna, ef þeir vissu eitthvað meira um það sem hér er greint frá:

Fréttin gekk út á það að á Íslandi væri öflug leynihreyfing konungssinna sem kallaði sig "Nífalt" sem vísaði til hyllingarinnar "Ni gange Hurra / Nífalt Húrra", sem menn heilsuðu jafnan konungi sínum með á mannamótum. Íslendingar hrópuðu þetta í kór þegar konungar þeirra komu í heimsókn. Hreyfing þessi átti að hafa verið starfandi um land allt og meðlimir hennar munu ólmir hafa flaggað danska fánanum og oft haft það fyrir sið að koma fyrir 9 litlum dönskum pappírsfánum umhverfis hús sín á tyllidögum. Meðlimir hreyfingarinnar munu einnig hafa heilsað með leynilegu fingramerki. Vísifingur var beygður inn að þumli svo myndaðist eins konar 9. Þessir "Nífeldingar" áttu líka að vera hinir örgustu andstæðingar breska og bandaríska setuliðsins. Greinir Aftenbladet frá því að hermenn á Íslandi hefðu oft lent í því að Íslendingar hefðu málað töluna 9 á klæði þeirra án þess að dátarnir uppgötvuðu það.

Ef einhver lesenda minna hefur verið í þessari hreyfingu, hefur átt föður móður eða aðra ættingja í henni, jafnvel óvini, þá þætti mér fengur af því að frétta meira. Þið finnið netfang mitt til vinstri undir portrettinu.

Enn eru til royalistar á Íslandi

Athugasemdir

[Jón Valur Jensson, 17.12.2007 kl. 02:31]

Þessi saga af Íslandi hljómar mjög yndislega – fyrir utan andstöðu þessa hóps við brezka og bandaríska setulið. Væri gaman, ef þér tækist að grafa upp frekar heimildir um þetta.

[Vilhjálmur Örn Vilhjálmsson, 17.12.2007 kl. 07:12]

Sæll Jón Valur, ég hef reynt að grafa á ýmsum stöðum og man ekki eftir að hafa heyrt um þessa hreyfingu. Kannski hefur þetta verið hópur manna á Akureyri? Að menn máluðu 9 á yfirhafnir dáta þykir mér ólíklegt.