Jakki Kiljans Laxness

Í dag kemur út í danskri þýðingu bók Halldórs Guðmundssonar um Halldór Laxness. Ég hef aðeins komið að þeirri útgáfu. Vitanlega ekki sem bókmenntalegur ráðunautur eða neitt slíkt, heldur eins og eins konar tilfallandi Karl Lagerfeld án tagls og góðra haglda.

Í lok síðasta árs, þegar ég var að vinna verkefni fyrir Forlaget Vandkunsten, sem gefur verkið um Laxness út, spurði eigandi útgáfunnar mig hvaða lit ég tengdi Laxness og sem ég teldi henta á innbundna bókarkápu. Útgefandinn taldi sig sjá rautt þegar hann hugsaði um HKL. Það taldi ég af og frá. Ég settist makindalega niður við hugmyndaflugsborðið á þessari litlu en aflmiklu útgáfu og lét út úr mér það fyrsta sem mér datt í hug:

„Jú, Laxness var mikill tweedmaður, og gekk jafnvel í Isle of Sky-tweedi í 30 stiga hita í Hollywood, þar sem pálmarnir vaxa. Því ekki að klæða bókina í tweed?!"

Þetta þótti útgefanda og hönnuði, sem ekki var ólíkur Laxness ungum, þjóðráð. Þar sem ég taldi mig líka vita, að á Þjóðminjasafni væri til mosagrænn tweedjakki af Halldóri, var ég samstundis settur í landssímann til að athuga málið. Jakkinn á Þjóðminjasafninu er grófur og reyndist ekki nógu hentugur í prentvinnslu á kápunni. Áður en honum var formlega hafnað, var vinur minn Kristján Sveinsson sagnfræðingur búinn að fara með fótóapparat sitt upp að Gljúfrasteini og fá að taka nokkur bílæti af tweedfötum meistarans, sem þar hanga í skáp.

Þetta er efnisprufa

Þessar myndir sendi Kristján svo útgáfunni Vandkunsten og hefur ein þeirra verið sett á bókarkápu. Þetta er ef til vill ekki fyrsta bókin sem klædd er í tweed, en örugglega sú eina sem klædd hafa verið í jakka Nóbelskálds sem líklega var keyptur í Herradeild P&O. Fötin skapa manninn og mennirnir bækurnar.

Fyrir þá sem eiga hinn mikla opus Halldórs Guðmundssonar á íslensku eða öðrum tungumálum, sem þegar er búið að þýða bókina á, er hægt að kaupa dönsku þýðinguna hér í forláta tweedjakka á mjög hagstæðu verði / 399 danskar krónur fyrir 850 blaðsíður. Sniðið er einstakt. Nærklæðnaður bókarinnar er alfarið á ábyrgð höfundar, en ég tel víst að það sé föðurlandið.

Maður verður að vona að til sé nóg af gervileðri á bækur um síðari kynslóðir íslenskra höfuðskálda, því tweedið er búið.

Þeir sem vilja panta og kaupa bókina klikka hér. Bókabúðir á Íslandi sjá auðvitað sóma sinn í að hafa bókina á dönsku líka og öll bókasöfn eru skyldug til að kaupa hana.

Athugasemdir

[Jón Steinar Ragnarsson, 18.1.2010 kl. 14:18]

Það hefði ekki verið hægt að finna meira lýsandi mynd af karlinum. Flott kápa.

Ó, ég nýt þess að lesa hann Kiljan

Því ég til þess hef vitið og viljann.

En með eitt er ég óhress,

þá er mælir hann Laxness,

að hve erfitt mér reynist að skilj'ann

[Jón Steinar Ragnarsson, 18.1.2010 kl. 14:25]

Ah og eh og umm og öh

og hxvad og hxvurs hans vani.

Soh og ih og suh og duh

en allt á hærra plani.

[Vilhjálmur Örn Vilhjálmsson, 18.1.2010 kl. 14:38]

Jón þakka þér fyrir Laxness vísurnar. Hver orti?

Ég kem með mynd af kápunni í tweedi, þegar ég er búinn að fá bókina í hendur. Ljósmyndin á hlífðarkápunni (bókarsvuntunni eða hvað sem það er nú kallað) er líka hrein klassík.

[Tweedskreðarinn (IP-tala skráð) 18.1.2010 kl. 16:35]

Gott er að vita af meistaranum hlýlega klæddum í hinni köldu Kaupmannahöfn. Það er vissara að við mörlandar sjáum um svona lagað því þeir hafa reynst brögðóttir skreðararnir í Höfn þegar að því kemur að sníða klæði á fyrirmenn. Hann H.C. skrifaði um svoddan kóna svo eftirminnilega hér um árið.

Pax.

[Anna Karlsdóttir, 18.1.2010 kl. 16:39]

Flott kápa - til hamingju með góða hugmynd.

[Rauða Ljónið, 18.1.2010 kl. 20:18]

Ég les svo sjaldan hann Kiljan
því amma vildi ei skiljan.
Með hann var hún svo óhress
og vildi segja við hann bless
en samt hef ég reynt að skilja hann.

svig.

Kv Sigurjón

[Jón Steinar Ragnarsson, 19.1.2010 kl. 05:37]

Hugmyndin með tweedið er brilliant. Hlakka til að sjá árangurinn. Það er annars alveg hægt að ná fram þessum effekt svona 'digitally'.

Fyrra hnoðið er eldgömul limra frá mér, líklega nálægt 30 ára gömul. Hitt er eitthvað, sem ég setti bara saman beint í athugasemdardálkinn.  Auðvitað hefði döh átt að vera rímorðí þriðju línu, en þetta er jú hraðsuða, svo slíkt hendir.

[Jón Steinar Ragnarsson, 19.1.2010 kl. 05:41]

Auðvitað lest sú seinni með soghljóðum og sennilga væri best að setgja  och í stað og.

[Jón Steinar Ragnarsson, 19.1.2010 kl. 08:34]

Hér er önnur gömul um Vigdísi:

Hún Vigdís er kunnug þeim hnútum

sem snúa að fransmannaskútum.

Því er á hana baunað 

að hún fái það launað

í biskví og pompólabútum.

Hafði gaman af þessu sporti í dentid.

[Jón Steinar Ragnarsson, 19.1.2010 kl. 08:44]

Hér eru ýmsar varíasjónir af tweedi. Sé ekki betur en að kallinn hafi ekki bundið sig við eitthvað eitt þar. Stundum krossröndótt, herringbone, Balmoral  eða houndstooth.  Sumt er þó meira lýsandi fyrir átfittið hans en annað.

[Vilhjálmur Örn Vilhjálmsson, 19.1.2010 kl. 09:45]

Jón Steinar, Good Sport eins og Tweedklæddir segja. Þakka þér fyrir þennan tweedkatalóg. Hann er eftir að reynast nytsamur þegar einhver tekur það að sér að greina það tweed sem Laxness klæddist um ævina.

Ég spái því að nú verði mikil endurreisn í Tweedi og gætu Íslendingar líkalega boðið upp á ýmislegt þar, ef þeir nenntu því.

[Jón Steinar Ragnarsson, 19.1.2010 kl. 10:59]

Tally ho old chap., i dear say.

[Ragnhildur Kolka, 23.1.2010 kl. 17:40]

Hef lítið átt leið á bloggið undanfarið vegna próf anna, en er nú laus og mitt fyrsta verk var að líta við hjá þér, Vilhjálmur.

Tek undir með öðrum að þetta er frábær hugmynd og sýnishornið gæti ekki verið betra. Var einu sinni í breskum bókaklúbbi sem lagði upp úr því að klæða verkin í stíl við innihaldið; Kamelíufrúin bundin í emeraldgrænt satíni með blómið þrykkt í hvítt og Homerskviður í Macho striga með svörtum alexandersbekk. Maður heyrði vopnaglamrið við það eitt að handfjatla verkið.

Tvíddið mun kljúfa þá Dórana í sundur og það verður á kostnað skrásetjarans.