Hvert fara peningarnir?

 

 

Jørgen Poulsen heitir maður nokkur hér í Danmörku, sem hefur verið forstöðumaður Rauða Krossins hér í landi síðustu 14 árin og reyndar gegnt ýmsum öðrum stöðum um leið, t.d. verið launaður bókagagnrýnandi fyrir DR (Danmarks /Danska Ríkisútvarpið). Sem slíkur hefur hann t.d. skrifað afar lofsamlega um bók mína. Áður var hann þekktur sem fréttamaður Danska sjónvarpsins og kannski mest fyrir einstakan talsmáta með ýktum kækjum og stunum, svo að sá sem á fréttaflutning hans horfði, leit mest á Poulsen og missti af óhugnaðinum eða stríðinu sem hann var að segja frá.

Nýlega var Poulsen kosinn á danska þingið sem þingmaður nýja flokksins Ny Alliance, sem er stjórnað af Palestínumanni sem ættaður er frá Sýrlandi. Poulsen sýndi ekkert fararsnið á sér hjá Rauða Krossinum eftir kosningarnar í nóvember og var því sagt upp, því hann gerði það ekki sjálfur.  Í Danmörku er það nefnilega lenska, að menn geti ekki verið í alls kyns öðrum stöðum og krækt sér í aukabitlinga þegar þeir eru komnir á hið háa þing.

Poulsen fékk svo 750.000 danskar krónur, rúmar 9 milljónir íslenskar, í "brottfararlaun" hjá Rauða Krossinum og hefur það farið fyrir brjóstið á mörgum í Danaveldi. Skiljanlega, gæti maður leyft sér að halda, þó ég sé ekki að sjá eftir aurunum sem ég gef í bauka Rauða Krossins.

Eins og einn fjölmiðillinn greindi frá, þá var hægt að fá ýmislegt fyrir þessa peninga, t.d.

Hægt að framfleyta 5000 flóttamönnum í Sómalíu í mánuð

Hægt að gefa 750 eyðnisjúklingum í Afríku fulla lyfjameðferð

Hægt að bjarga 3170 mjög vannærðum börnum frá því að deyja

Og eins og gárungar Nyhedsavisens, blaðs í eigu Íslendinga, skrifaði.  Hægt var að kaupa 1 Audi TT Coupé með 3,2 lítra mótor og 250 hestöflum, sem fæst ekki fyrir klink í Danmörku eins og á Íslandi.

Meðan Poulsen var upptekinn í kosningarbaráttunni þáði hann laun hjá Rauða Krossinum, þótt hann gerði ekkert fyrir stofnunina á meðan. Þá gerði Poulsen það eina rétta og afsalaði sér launum meðan hann var í fríi. Jørgen Poulsen hefur nú verið tekinn í því að ljúga um starfslok sín. Hann segist hafa stungið upp á að taka sér frí frá starfi sínu áður en honum var sagt upp. Það rétta er að honum var sagt upp áður en hann kom með þá tillögu. Staða hans er auglýst laus til umsóknar í dönsku dagblöðunum í dag.

Nú er bara að sjá hvort Poulsen sýni af sér góða takta sem pólitíkus. Kannski er hann fyrst nú kominn á rétta braut í lífinu. Ég er hins vegar lítið gefinn fyrir fréttamenn í stjórnunarstörfum eða á þingi. Þetta er ofmetinn starfshópur og hana nú.

Athugasemdir

[Anna Karlsdóttir, 9.12.2007 kl. 22:59]

Mér finnst þetta ekki til hróðurs fyrir manninn. Man vel eftir honum sem fréttamanni á DR. Myndi ekki treysta honum sem stjórnmálamanni.

[Viðar Eggertsson, 10.12.2007 kl. 00:04]

Og varla er þetta heldur hrós fyrir Rauða krossinn í Danmörku. Hvernig ætli málum sé háttað þar á bæ hér á landi?

[Vilhjálmur Örn Vilhjálmsson, 10.12.2007 kl. 07:27]

Sæl Anna og Viðar, Jørgen situr fastur við sinn keip og ætlar ekki að skila aukaþóknuninni sem hann fékk.  Það var því afar fyndið í gær að sjá í dönsku blöðunum auglýsta lausa stöðu forstöðumann heimsóknarþjónustu Rauða Krossins fyrir fanga. Sú staða er ólaunuð en mjög kröfumikil ef dæma má út frá auglýsingunni. 

Ekki ætla ég að segja hvernig þessu er hagað heima, en það hefur oft verið gangrýnt hér í landi hvað yfirbyggingin sé dýr hjá hjálparstofnunum. Mig rámar líka í að slík umræða hafi farið fram á Íslandi. Það hlýtur að vera svipað á Íslandi. Menn verða að fá laun, en aukabitlingar eins og sá sem Poulsen hefur fengið nú, eru auðvitað alveg út í hött.

Hann skilar þessu vonandi ef hann er ekki búinn að setja það í fasteign.

[Vilhjálmur Örn Vilhjálmsson, 10.12.2007 kl. 09:12]

Ég fór út í búð til að kaupa eitthvað viðeigandi fyrir son minn sem er með gubbupest. Þar sá ég að Poulsen líður líka illa, búinn að fá taugaáfall - út af öllu þessu umtali um aukaskildingana hans.  Þetta stóð í skítableðlinum Ekstra Bladet, svo ég sleppti því að kaupa og lesa um taugaáfallið. Ekki myndi ég fá taugaáfall ef ég fengi 9 vel fengnar milljónir.