Murder she wrote...

 

Kona, sem var sögð dáin árið 1987, er árið 2011 talin hafa horfið ættingjum sínum og jafnvel verið myrt? Hvernig getur maður útskýrt slíkt?

Nú leitar fjölskylda, eða réttara sagt maður á Íslandi að ættmenni sínu, konu sem giftist Bandaríkjamanninum Emerson Gavin í Dómkirkjunni árið 1946. Sá sem leitar, telur nú að konan og tvö börn hennar hafi verið myrt í Bandaríkjunum. Það mun vera bróðursonur Rögnu Esther, sem reynir að hafa upp á ættingjum sínum. Hann býr á Ísafirði. Hægt er að fylgjast með leit hans að hluta til á netinu.

Þetta er auðvitað mjög merkileg frétt og fjölskyldusaga, en mest vegna þess að RÚV er með fréttina og þá er aldrei að vita hvort sagan sé sönn eða hvort rétt sé með farið.

Ragna Esther Sigurðardóttir, sem leitað er að, er í afmælisgrein um bróður hennar sjötugan árið 1987 sögð látin. Ekki er greint frá þessu í frétt RÚV, þar sem vangaveltur dóttur Bandaríkjamannsins sem kvæntist Rögnu Esther eru aðalefnið. Sú kona, Melissa Gavin, sem er dóttir mannsins úr öðru hjónabandi hans, eftir að hann var skilinn frá Rögnu Esther Sigurðardóttur, telur að faðir hennar hafi myrt Rögnu og börn hennar árið 1955.

Reyndar er Ragna einnig talin látin árið 1970, ef dæma má út frá minningargrein um föður hennar, Sigurð Pétur Klemenzson Íshólm, er lést að völdum eldsvoða á heimili sínu á Njálsgötur árið 1970, og var jarðsunginn 1. ágúst 1970. Eitthvað hefur þessi „dauði" Rögnu Sigurðardóttur farið fram hjá ættmennum hennar, sem nú íhuga að fá gerða rannsókn á hugsanlegu morði á Rögnu og börnum hennar tveimur.

Við smávægilega netleit fann ég, að sá sem leitað hefur mest af afdrifum Rögnu, hefur einnig leitað að Rögnu undir ættarnafninu Smith. Það kemur heldur ekki fram í fréttum RÚV.

Ragna Esther, sem sögð var látin árið 1987, og sem ættingjar hennar halda nú að hafi verið myrt í Bandaríkjunum á 6. tug síðustu aldar, gæti því hafa heitið Smith, eftir að hún skildi við málarann Emerson Gavin sem hún giftist í Dómkirkjunni í Reykjavík 4. Janúar 1946. Hann var hrotti hinn mesti samkvæmt skjölum og upplýsingum sem ættingjar konunnar hafa undir höndum. Það þýður þó ekki að hún hafi verið myrt af honum, eins og dóttir  Emersons Lawrence Gavin telur, og skrifar í bréfi sem birt er í sjónvarpsfrétt RÚV, en sem ekki er vitnað rétt í:

Ég googlaði meira, og í ljós kemur, að hinn meinti morðingi, Emerson L. Gavin, lést árið 2009 í Jacksonville i Florida. Hann var á einhverju tímabili eftir 1955 kvæntur Helen Janis Baker. Hann kom frá Portland í héraðinu Multnomah í Oregon og mun einnig hafa búið í Klamath. Hann kvæntist aftur í Nevada.

En ef íslensk kona og tvö börn hennar hverfa árið 1955, hvers konar íslensk fjölskylda lætur það viðgangast að leita ekki að henni og velur að skrifa hana af í afmælisgreinum um aðra ættingja? Var það fátækri, barnmargi fjölskyldu í Reykjavík um megn að hugsa um afdrif ættingja síns? Það er afar líklegt. T.d. átti fjölskyldan, faðir hennar, yfir höfði sér nauðungaruppboð árið 1955, um svipað leyti sem tengslin við Rögnu rofna. Kreppan nú er barnaleikur miðað við erfiðleika lífsins þá.

Gæti verið, að börn Rögnu Esther hafi verið komið fyrir á barnaheimili og að þau hafi verið ættleitt líkt og dóttir Emersons af öðru hjónabandi, Melissa, segist hafa heyrt árið 1955? Einnig verður maður að spyrja sig mikilvægrar spurningar: Hvað var Melissa litla Gavin eiginlega gömul, þegar hún heyrði það sem hún greindi ættingja Rögnu Esther frá árið 2010? 3ja ára? Hvernig gat hún munað eftir gerðum föður síns á þeim aldri?

Sá möguleiki er fyrir hendi, að börn Rögnu Esther Sigurðardóttur (Gavin/Smith?), sem hétu Raymond Leslie og Donita, hafi endað á barnaheimili. Þann möguleika er ekki er hægt að útiloka áður en RÚV hellir frétt yfir þjóðina með hræðilegum vangaveltum um mann sem á að hafa myrt konu sína og börnin þeirra. Það getur auðvitað verið rökréttur möguleiki, ef tekið er mið af upplýsingum um eðli mannsins, en möguleikarnir eru nú fleiri. T.d. að Ragna hafi gifst Mr. Smith.

Og af hverju töldu þeir sem skrifuðu minningargreinar um bróður og föður Rögnu, að hún væri fallin frá? Höfðu ættingjar hennar á Íslandi þetta bara á tilfinningunni eða bárust af því staðfestar fréttir, sem hafa farið fram hjá þeim ættingja sem nú leitar að föðursystur sinni og börnum hennar?

Þetta mál verður að leysa.

Athugasemdir

[Faktor, 26.4.2011 kl. 12:49]

Sæll Vilhjálmur.

Mér fannst þetta líka alveg stórfurðuleg frétt,56 árum eftir að síðast var vitað um konuna, skuli einhver fara að athuga um afdrif hennar og barnanna!

Það hlýtur að vanta eitthvað inn í söguna...

[Ragnhildur Kolka, 26.4.2011 kl. 14:59]

Við treystum á þig Vilhjálmur H. Poirot að upplýsa þetta mál. Ekki mun það gerast á RÚV. Það vantar upplýsingum um hvernig dauða konunnar var komið á framfæri og hvað stendur í opinberum bókum. Ólíklegt er að konan hafi gufað upp og hafi kalinn kvænst aftur þá hefur hann þurft að sýna dánar eða skilnaðarvottorð.  

En það er rétt hjá þér að 1955 voru erfiðir tímar á Íslandi sem víðar. Engir GSM símar og ekkert Skype aðeins langlína sem kostaði himinn og jörð að virkja. Og miðstöð sem vissi meira en gvöðalmáttugur.

[Anna (IP-tala skráð) 26.4.2011 kl. 17:42]

Af facebókar síðu um þetta mál.

Eftir að Ragna Esther flytur út til Bandaríkjanna missir hún fljótlega allt samband við fjölskylduna sína á Íslandi. Faðir hennar og bræður skrifa mörg bréf til hennar. Mörg bréfanna eru endursend aftur til Íslands. Sömuleiðis virðast bréf sem Ragna Esther sendir föður sínum og bræðrum ekki skila sér.
Varðveist hafa tvö bréf frá henni þar sem hún lýsir vonbrigðum sínum með að fá ekki fréttir að heiman og svör við þeim bréfum sem hún hafi sent.
Búseta Estherar og barna hennar er frekar óljós og hefur fjölskyldan litlar upplýsingar um hvar þau voru til húsa eftir skilnaðinn. Til eru upplýsingar um nokkur heimilisföng sem Esther gaf upp í þeim bréfum sem hún sendi.
Ljóst er að líf Estherar hefur verið hörmulegt. Emerson Lawrence, nefndur Larry hefur verið hrotti, misþyrmt henni ítrekað. Esther virðist hafa farið frá honum um tíma og dvalið í Kvennaathvarfi í Portland Oregon. Síðan fer hún til Seattle en kemur til baka aftur. Höfum ekki upplýsingar um hvar hún dvaldi eftir það. Í desember árið 1951 fær hún skilnað frá Larry og er henna dæmt forræði barnanna. Í dómsskjölum kemur fram hrottaskapur Larry´s. Hann veitti henna það mikið líkamlegt ofbeldi að það þurfti að leggja hana inn á spítala. Meðan hún var á spítalanum hafði börnunum verið komið fyrir á barnaheimili.
Samkvæmt dómsskjölum kemur fram að Larry hafi ógnað henni með byssu ef hún kærði hann. Það eru til vitni að því að hann hafi hótað henni lífláti. Esther er dæmt forræði yfir börnunum og Larry dæmdur til að greiða henni $100 á mánuði til framfærslu barnanna. Það kom síðan í ljós að hann stóð ekki við það og hún fékk líklegast aldrei greitt neitt meðlag.
Hún þurfti að leita skjóls í kvennaathvarfi árið 1947.
Eftir skilnaðinn er lítið vitað um hana, það er ekki fyrr en 1955 að Esther hefur samband við konu Larry´s no 2, þar sem hún er að biðja hana um aðstoð vegna barnanna. Þegar Larry fréttir af því hverfur hann í 2 daga og við heimkomu segir hann við konuna,” þið þurfið ekki að hafa áhyggjur af því að hún ónáði ykkur framar” . Þetta staðfesta fjölskyldumeðlimir á þeim tíma.
Larry giftist 3 sinnum eftir skilnaðinn við Esther.
2. Patsy J. Hudson. January 5th. 1952
3. Bonny LeeO’Leary June 28th. 1971
4. Helen Janis Baker. August 13th. 1977
Emerson Lawrence lést í janúar 2009.

Faðir Estherar og bræður gerðu mikið í því að reyna að hafa upp á henni. Skrifuðu á alla mögulega staði, leituðu til Íslenska sendiráðsins árið 1948. Einkaspæjari var ráðinn árið 2000 og komst hann í gömul dómsskjöl en meira var ekki vitað um afdrif hennar og barnanna hennar.
2010 er settur kraftur í leitina á ný, þá er ráðin ættfræðistofa sem staðsett er í Portland, í þeirri von að þau geti aflað upplýsinga, leitað í skjölum í stofnunum o.þ.h.
Við höfum skýrslur frá þeirri stofu þær gefa ekki miklar upplýsingar um afdrif þeirra..
Einnig hafa verið settir þræðir inn á ýmsar leitarsíður er tengjast leit að horfnu fólki.

Fjölskylda Larry’s hefur hingað til ekki viljað gefa miklar upplýsingar um Larry. Eins og komið hefur í ljós við rannsókn málsins þá var hann mikill ofbeldismaður og það er eins og fjölskyldan hafi afskrifað hann. Larry á bróður sem segist ekki hafa vitað af honum í fjölda ára.

Það er heitasta ósk ættingja Rögnu Esther að komast að afdrifum hennar og barna hennar.

Þessi texti er settur fram í þeirri von að þið sem lesið þetta deilið þessu á sem flesta aðila sem með einhverjum hætti gætu hjálpað til.

[Herdís (IP-tala skráð) 27.4.2011 kl. 17:35]

Vilhjálmur Örn Vilhálmsson nú veit ég ekki alveg hvað þér gengur til með þessum skrifum þínum á bloggi þínu.  Í fyrsta lagi þá kynnir maður sér staðreyndir áður en byrjað er að fullyrða um mál sem viðkomandi hefur greinilega ekki hundsvit á. Í frétt RÚV sem er jú sá fréttamiðill sem flestir Íslendingar treysta þá kemur fram að fjölskylda Esterar hafi ítrekað reynt að hafa upp á henni og börnum hennar. Það segir allt sem segja þarf. Þótt að þetta sé fyrst núna að koma í fréttunum þýðir það ekki að ekkert hafi verið gert í þessu máli. Don’t play stupid. Margar kynslóðir hafa nú reynt að hafa upp á Esther og börnum hennar og því algjör vitleysa að segja að nú 56 árum síðar hafi ættingjar fyrst ætlað að reyna að hafa upp á henni. Síðan finnst mér fyrir neðan allt að vera að draga fjármál fjölskyldu hennar inn í þetta mál. Hvað kemur það málinu við ég bara spyr? Ég veit frá fyrstu hendi að þetta er ekki auðvelt mál og því algjört virðingarleysi að gefa það í skyn að ættingjar hafi ekki gert neitt í því að hafa upp á henni og börnum hennar vegna þess að faðir hennar átti yfir höfði sér nauðungaruppboð. Kynnið ykkur málið áður en farið er að blogga einhverja vitleysu. Í guðanna bænum og sýnið fjölskyldu Estherar meiri virðingu en þetta.  Að sjálfsögðu er ekki hægt að segja frá svona gríðarlega flóknu máli á nokkrum mínutum í sjónvarpinu. Allir geta sagt sér það.  Svona ábyrgðarlaus skrif er ekki það sem fjölskyldan þarf á að halda. Ættir frekar að leggja fjölskyldunni lið í stað þess að efast um allt sem fram kemur.

Síðan kemur hvergi fram í frásögn Melissu að hún telji að faðir sinn hafi drepið börn Estherar. Hún óttast hins vegar að hann hafi tekið líf Estherar en það er eitthvað sem hún byggir á sinni eigin reynslu af föður sínum og þeirri bláköldu staðreynd að ekkert hefur spurst til Estherar frá því um miðja síðustu öld.

[Vilhjálmur Örn Vilhjálmsson, 27.4.2011 kl. 21:07]

Herdís, það kom svo sannarlega fram á RÚV, að einhver telur að börnin hafi verið myrt líka. Melissa Gavin gefur aðeins eitthvað í skyn, sem hún hefur verið mjög ung þegar hún heyrði það. Tilfinningar hennar í garð látins föður hennar eru ekki sönnun þess að hvarf/dauði? Rögnu Estherar sé valdið af föður Melissu Gavin. "I feel he probably killed her" er ekki það sama og að "óttast að hann hafi tekið líf Esterar".

Herdís, ég veit ekki hvað þér gengur til með skrifum þínum. Ásakanir um ábyrgðarleysi vísa ég til föðurhúsanna. Skýrðu frekar út fyrir mér af hverju þeir sem skrifuðu minningargreinar um fjölskylduna töldu Rögnu Esther af árið 1988. Hvað fékk aðstandendur ættingjanna til að afskrifa Rögnu Esther fyrir 22 árum síðan.

Ég efast ekki um neitt, ég leyfi mér einungis að upplýsa þá sem vilja lesa, að það sem fjölmiðlar hafa valið að birta í þessu máli, er ekki endilega rétt, þó ekki ætli ég að útiloka það.

Fjárhagsleg staða fjölskyldu sem saknar ástvina sinna í annarri heimsálfu er í engu verri vangavelta en orð konu sem segir að hún hafi það á tilfinningunni að faðir hennar hafi verið morðingi.

Svo máttu líka vita, Herdís, að ekki allir Íslendingar treysta RÚV, og ekki að ástæðulausu. Kynntu þér málin betur.

Þakka ég Önnu fyrir innlegg hennar, sem er málefnalegt.