Þarnæsta Indiana Jones mynd gerist á Íslandi

 

Harrison Ford kemur í næstu viku til að kanna aðstöðu. Myndin á að gerast í Þjórsárdal og á Snæfellsnesi og mun veita fjölmörgum aðilum vinnu í einhvern tíma. Líklega verður kvikmyndin gerð í tengslum við ekta fornleifauppgröft, segir dr. Bjarni F. Einarsson fornleifafræðingur í viðtali við fréttastofu Reuters. Bjarni og Harrison Ford eru góðir vinir og drykkjufélagar. Jón Gnarr leikur sjálfan sig og Hitler.

Nei, fornleifagöbb eru leiðinleg, eins og menn hafa séð í dag á mbl.is og heyrt í útvarpinu.

Ekki þykir mér þó furðulegt að einmitt fornleifar skuli valdar af tveimur fjölmiðlum til að láta Íslendinga hlaupa apríl. Ég man eftir silfursjóði nokkrum frá Víkingaöld sem fannst óáfallinn í jörðu austur á landi, og í honum gripir sem sérfræðingar á Norðurlöndum sögðu vera frá nútíma. Það er aprílgabbi líkast hvernig íslenskir "sérfræðingar" hafa reynt að leyna því. En ég skil vanda fjölmiðla við val á aprílgabbi, þegar allt í stjórnmálunum er orðið að allsherjar plattenslageríi.

Þetta gabb um Landeyjahöfn er nú heldur lélegt og Dr. Kristín er alls ekki nógu trúverðug. Ég man eftir fréttum um bein grænlenskra kvenna sem áttu að hafa fundist á Skriðuklaustri og ýmsar aðrar „sannar" sögur, sem hefðu miklu fremur sómt sér sem aprílgabb, nema hvað að þær voru sannar þangað til fornleifafræðingurinn hafði tekið sönsum.

Hér og hér getið þið hins vegar lesið um miklu áhugaverðari leik sem hin nýja stofnun í skemmtanaiðnaðinum, Fornleifastofnun Ríkisins, hefur staðið í að undanförnu. Í einhverju vorhreingerningsæði í miðju efnahagshruninu sjússaði forstöðumaður stofnunarinnar saman áætlun upp á heilar 700.000.000 kreppukrónur (þið sjáið og lesið rétt: 700 millur) í framkvæmdir við fornleifarnar að Stöng í Þjórsárdal.  Þessari lygilegu upphæð komst hún að með hjálp nokkurra sérfræðinga sem ekki fæst gefið upp hverjir séu. Kristín, og sérfræðingarnir dularfullu, hripuðu saman fjárhagsáætlun á smá pappírsbleðil, sem þeim og lögmönnum þeirra  þykir engin ástæða til að ég, sem mest hef stundað fornleifarannsóknir á Stöng í Þjórsárdal, fái nokkurn tíma að sjá. Nú er dæmið hjá Úrskurðarnefnd Upplýsingamála, sem er komin langt yfir skilafrest. Mig langar auðvitað að vita, hvort eitthvað af þessum mörgu milljónum hafi verið hugsaðar handa mér.

Fornleifar í Landeyjahöfn

Athugasemdir

[Ragnar Einarsson, 1.4.2011 kl. 15:45]

hehe, sennilega best að ignora fréttir og blogg í dag.

[Aðalbjörn Leifsson, 1.4.2011 kl. 16:18]

Mér líkar vel við "gamla Ford" og "Gitler"

[Jón Steinar Ragnarsson, 2.4.2011 kl. 11:16]

Haltu áfram að hamast í þeim.  Þetta Stangarmál er með miklum ólíkindum.  Gaman væri líka að vita hvað allur þessi hópur sérfræðinga tók fyrir að fá þessa tröllslegu tölu á servíettuna.

[Jón Steinar Ragnarsson, 2.4.2011 kl. 11:26]

Þ.e. spurning hvort sposlur til reiknimeistaranna hafi betur farið í viðhald á þessari niðurníddu þjóðargersemi. Jafnvel hvort þær hefðu nægt til að koma sæmilegu skikki á húsið. Á meðan bærinn er að skolast í burtu og grotna niður, þá er verið að puðra út peningum í administratíft rúnk í Reykjavík, sem fóðrar vasa "sérfræðinga" og étur upp budséttið fyrir raunverulegt hlutverk stofnunarinnar.

Þetta fólk vill trauðlega þurfa að fara út af kontórum sínum til að sinna embættinu.  Þetta er farsi.

Það væri gaman að kanna hvort einhver nepótismi er þarna líka. Þ.e. hvort þetta er orðið svona familíufyrirtæki eins og svo margar Íslenskar stofnanir.