856 illa undirbúin störf í biðstofu ESB

 

Í gær horfði ég á prestsoninn úr Kópavogi með væmna gleiðgosabrosið kynna 856 NÝ STÖRF FYRIR NÁMSMENN OG ATVINNULEITENDUR. Mér sýnis að þetta séu mestmegnis störf, þar sem ungmenni fá að moka sandi í eyðimörkinni. Þetta eru 856 afar illa undirbúin störf.

Í dag eru flennistórar auglýsingar í blöðum, þar sem hægt er að lesa eina setningu um hvert þessara 856 "starfa". Í innleggi í Fréttablaðinu eru stutt lýsing á hverju starfi og sagt hve marga starfsmenn sé vænst í hvert þeirra. Ekkert er sagt um tímalengd vinnunnar. Þá er upplýst, að nánari upplýsingar um störfin, tengiliði hjá hverri stofnun og fleira sé að finna á vef Vinnumálastofnunar, www.vmst.is. Þar klikkaði ég mig inn, en engar upplýsingar er þar enn að finna. Aðeins stór fyrirsögn og upplýsing um að hægt sé að byrja að sækja um stöðurnar þann. 12. maí. Engin upplýsing er þar um heildartíma ráðningar. Ég hélt að það væri ólöglegt að auglýsa tímabundin störf, án þess að gera grein fyrir lengd starfstíma og kjörum.

Þar sem þetta  "átak" er greinilega gert til að sækja atkvæði til námsmanna, sem þegar eru helstu kjósendur Samflykkingarinnar og Framboðs stuðningverkaflokks græna litarins, þá má búast við því að ýmis vandamál muni rísa við ráðningar í þessi störf, svo sem gamli góði klíkuskapurinn sem ávallt hefur tíðkast á Íslandi!. Hann hefur ekki horfið í kreppunni, nema síður sé.

Ef farið er inn á heimasíðu einnar af þeim stofnunum, sem hafa þessi "störf" í boði, þ.e. Þjóðminjasafns Íslands, er enn ekkert að finna um þau 14 störf sem þar á að vinna, tengiliðina eða neitt annað, ekki frekar en á síðu Vinnumálastofnunnar. Hvað fór eiginlega mikill undirbúningur eða hugsun í þetta átak?  

Mér sýnist að þær 14 stöður, sem Þjóðminjasafnið býður upp á, séu þess eðlis að þó nokkurn tíma þurfi til að setja "námsmennina" eða atvinnulausan menntamann inn i verkin. Sum störfin munu því skila afar litlum árangri, og því verður eytt ráðstöfunarfé, sem betur væri nýtt í fasta starfsmenn stofnananna, sem auðvitað eru að drukkna í skriffinnsku og leiðsögn fyrir námsmenn í starfsátaki ríkisstjórnarinnar.

Fyrir utan algjörlega glórulaus verkefni er hægt að sjá hvað legið hefur á hakanum á sumum stofnunum.

Mér líst best á starf það sem Þjóðskjalasafn Íslands bíður upp á: "Almenn þrif á lóð og plani. Sópa hreinsa illgresi, mála stæði, hreinsa veggjakrot. Ofl." Þetta verkefni hefur hagnýtan og estetískan tilgang eins og t.d. gjóskuhreinsun, enda lóð stofnunarinnar ein sú ljótasta á Íslandi og í verksmiðjuumhverfi Austur-Evrópu.

 

Sum verkefni vekja hreinlega undran og kátínu, eins og:"Verkefnið felist í því að búa til skrá á tölvutæku formi um gler og járngripi (ca. fjöldi gripa úr gleri og járni er 7000) sem hafa fundist við uppgröftinn á Hólum í Hjaltadal". Það er Háskólinn á Hólum sem bíður tveimur námsmönnum þann starfa. Hvað er annars búið að gera fyrir þær tugi milljóna króna sem farið hafa í fornleifarannsóknír að Hólum? Kannski fóru of margar þeirra í ráðstefnur og ferðalög? Venjulega er ógreinanlegt gler og járn skráð saman eftir þeim lögum eða svæðum sem það finnst í, og lenda þá nokkur hundruð gripa í hverjum kassa, sem svo er skráður mjög almennt. Ég hlakka til að sjá skýrslu um dreifingu glerbrota og járnarusls að Hólum í Hjaltadal. Þvílíkur akkur fyrir fornleifafræðina! Kannski verður hægt að sjá hvar biskupsbokkan brotnaði helst? 

Einnig er er stórfurðulegt verkefnið, þar sem námsmaður á að skrá kirkjugripi í gagnagrunninn SARP. Það á að gera með því að skrá þá gripi, sem þegar eru skráðir "í bókunum: Kirkjur Íslands". Gripi á að skrá af bókum!?!

Nú er bara að sjá, hvernig gengur að grafa sand í eyðimörkinni að hætti Árna Páls Árnasonar. Til hamingju með ríkisstjórnina námsmenn og atvinnuleysingjar.

Athugasemdir

[Tómas (IP-tala skráð) 8.5.2010 kl. 10:18]

"Gripi á að skrá af bókum!?!" þeim hefur greinilega ekki komið til hugar að skanna bækurnar inn og keyra textann beint inn í gagnagrunn ;-)

[Rauða Ljónið, 8.5.2010 kl. 13:02]

Get ekki sé að sandverkefni skili einu né neinnu inn.

[Finnur Bárðarson, 8.5.2010 kl. 14:07]

Auðvelt að lifa í vellystingum praktuglega í Köben og gera lítið úr því sem reynt er að gera hér.

[Vilhjálmur Örn Vilhjálmsson, 9.5.2010 kl. 07:20]

Tómas, ég vitna aðeins í það sem stóð. Frekari upplýsingar hefur Fornleifavernd Ríkisins, ef þú hefur áhuga á þessu starfi.

Sigurjón, nei þetta verður ekki þungt á vogarskálunum, en það friðar ungmennin. 856 þeirra munu kjósa "rétt" í næstu kosningum.

Finnur, hvað veist þú um vellystingar mínar í Köben, þar sem ég er atvinnuleysingi? Ég veit vel hvað það er, því það er heldur almennara og alvarlegra vandamál í ESB löndum en það hefur nokkurn tíma verið á Íslandi. Á Íslandi hafa menn nú fengið nasaþefinn af því, en þegar gengið verður í ESB (megi hærri máttaröfl varðveita okkur frá því), búist þá ekki við að vinna það sem eftir er ævinnar. Í ESB er fólk sett út af sakramentinu ef það hefur verið atvinnulaust í einhvern tíma.

Þessi vinnumiðlun íhaldsdrengsins Árna Páls og CO. er í tveimur orðum sagt:

BÖLVAÐ LÝÐSKRUM.