Var Shakespeare kona eða trans?

Þessi  frétt þykir mér heldur betur merkileg. Ekki alls fyrir löngu var sérfræðingur nokkur búinn að lýsa því yfir að hann gæti alveg sýnt fram á hvernig William Shakespeare leit út (hér að ofan). Mér þykir harla ólíklegt að hann hafi litið út eins og sérfræðingurinn heldur fram, ef "hann" var kona, og jafnvel kona af ítölskum gyðingaættum eins og annar klókur karl heldur nú fram. Það gerir nefnilega frístundashakespeareistinn John Hudson, sem telur meira en víst að Shakespeare hafi verið Amelia Bassano Lanier (eða Lanyer). Sjá æviatriði hennar hér. Hér getið þið svo séð stutt viðtal við Hudson.

Og fleiri upplýsingar frá hinum veltalandi John Hudson eru að finna á YouTube:

Hudson leggur mikla áherslu á að "Shakespeare" hafi haft miklu meiri þekkingu á tónlist en einhver strákur frá Stratford-upon-Avon, sem ekki var komin af tónllistamönnum og sem ekkert hafði verið skólaður í þeirri list. Hvernig stóð líka á því að sveitstrákur kunni bara fullt af ítölsku þegar hann birtist allt í einu í Lundúnum, spyr Hudson? Það er ekki nema vona að Hudson spyrji. Ég spila á píanó og lærði ítölsku í MH, tvo áfanga, og ekki varð ég neinn Shakespeare.  

Ég hlusta með mikilli athygli á John Hudson og hlakka til að stytturnar af Shakespeare verði fjarlægðar og stytta af konu, dökkri yfirlitum, komi í staðinn.

Eins og fróðir menn vita, hafa margar tilgátur verið á lofti um uppruna Shakespeares, líkt og með uppruna Kólumbusar. Einhvers staðar las ég um mann sem heldur því fram að hann hefði verið Kínverji og annars staðar er því haldið fram að hann hafi verið Indverji, Þjóðverji, Hollendingur o.s.fr. Mér þykir afar vænt um tilgátuna um að hann hafi verið arabi og hafi upphaflega heitið Sheik Yer Beer eða Sheikh Ispire. Það skýrir auðvitað allt, þar sem því er gjarnan haldið stíft fram að við höfum allan okkar fróðleik frá aröbum.

Bull og vitleysa, Shakespeare var auðvitað Íslendingur. Vilhjálmur kallaður Skagaspíra (Skagespear = Shakespeare), langur sláni sem stakk af með ensku skipi, þegar honum var ljóst að menn verða ekki spámenn í eigin landi, og vegna þess að ekki var til nógur pappír í landinu. Menn geta ekki bara pissað Miðsumarsnæturdraum í snjóinn. Punktum basta, það þarf ekki fleiri sannana við.

Athugasemdir

[Árni Gunnarsson, 28.5.2008 kl. 14:35]

Ekki veit ég til að nein staðfesting hafi fundist um persónuna bak við þetta magnaða skáld.

Tilgáta þín um uppruna af Skipaskaga þykir mér allrar athygli verð og legg til að við höldum til streitu öllu tiltæku því til stuðnings.

Það væri verðugt innlegg í bresku skálda-og leiklistarímyndina.

[Vilhjálmur Örn Vilhjálmsson, 28.5.2008 kl. 17:39]

Hérna áðan kom ágætur bloggari, Árni Matthíasson, með athugasemd sem mér varð á að hafna í stað þess að birta, eða ég hélt mig hafa birt hana, en hef hafnað henni. Ég fór svo að búa til mat og þegar því var lokið, sá ég að athugasemd Árna var einfaldlega farin.

Honum fannst ég ískyggilega líkur myndinni sem fylir færslunni og spurði hvort ég væri nokkuð ítölsk kona.

Við því er auðvitað aðeins eitt svar. SI si!

[Aðalbjörn Leifsson, 29.5.2008 kl. 10:14]

Það þyrfti þá að benda Ítölskum konum á að þær eru huggulegri án skeggs!

[Helga (IP-tala skráð) 29.5.2008 kl. 12:33]

Um kyn eða kynheigð Shakespeare veit ég auðvitað ekki. En það skyldi þó aldrei vera að þetta góða skáld hafi verið kona!  En hvað segirðu um þær kenningar að Shakespeare (hann eða hún) hafi verið barn Elisabetar I? Sjá m.a. rit Paul Streitz.