Danski stríðsglæpamaðurinn sem enginn mátti heyra um

 

Í byrjun árs 2005 birtist eftir mig grein í helgarblaðinu Weekendavisen í Danmörku. Greinin, sem hægt er að lesa hér, fjallaði um danskan stríðsglæpamann, Gustav Alfred Jepsen, sem enginn hafði heyrt um áður. Ástæðan fyrir þeirri þögn var að dönsk yfirvöld höfðu klórað mjög vandlega yfir málaferli gegn honum og aftöku hans árið 1947. Þessi danski borgari framdi stærsta glæp Dana í síðari Heimsstyrjöld. Dönsk yfirvöld vildu ekki að mál hans skyggði á "hetjulega" framgöngu þeirra í stríðinu. 

Þegar ég sá heimasíðu íslenskra rasista (skapari.is, sem virðist hafa verið lokað), sem mikið hefur verið skrifað um, kom danski fjöldamorðinginn upp í huga mér. Ég held að einstaklingarnir bak við þá síðu eigi bágt eins og danski stríðsglæpamaðurinn. Ég held að þessir menn gætu hæglega leikið sama hlutverk og danski SS maðurinn ef aðstæður væru fyrir hendi.

Árið 1947 var Gustav Alfred Jepsen hengdur fyrir glæpi sína. Hann var fjölskyldufaðir sem varð að ófreskju vegna þess haturs og mannfyrirlitningar sem nasisminn sáir út frá sér 

 

Ekki voru allir Danir sáttir við grein mína. Fylgismenn þeirrar söguskoðunar, að samvinna við Þriðja ríkið hafið verið vænsti kostur fyrir Dana eru margir. Fyrir utan hótunarbréf og tvö dólgsleg símtöl, skrifuðu nokkrir Danir lesendabréf í Weekendavisen og mótmæltu grein minni. Þeir töldu Gustav Alfred Jepsen hafa verið Þjóðverja, vegna þess að hann tilheyrði þýska minnihlutanum í Danmörku.  Gustav Alfred Jepsen leit hins vegar sjálfur á sig sem Dana og var danskur þegn, skráður í SS sem Dani og krafðist þess að tala dönsku við réttarhöld sín. Dönsk yfirvöld litu á hann sem eins konar Dana, lagalega séð, og héldu vörð um þögnina til hins síðasta, eins og fram kemur í grein minni. Dönsk yfirvöld mæltu með því við konu hans og son, að þau færu ekki til að kveðja hann áður en hann var hengdur.

Sumir Danir töldu árið 2005 að Þjóðverjar væru einir færir um að fremja þá glæpi sem Gustav Alfred Jepsen framdi. Ég er á annarri skoðun og tel að einstaklingarnir bak við rasistasíðuna íslensku séu á góðri leið að lenda í sömu sporum og morðhundar Heimsstyrjaldarinnar.

Lögregluyfirvöld og dómskerfið á Íslandi verða að hafa upp á þessum pörupiltum og koma þeim bak við lás og slá eða í meðferð á geðsjúkrahúsi. Þessi síða þeirra er ekkert spaug, heldur endurtekning á morðhótunum sem hafa heyrst einum of oft.

Athugasemdir

[Jón Steinar Ragnarsson, 15.11.2007 kl. 15:09]

Mér finnst vanta þarna hvað honum var gefið að sök annað en að vera í SS?  Myrti hann fólk.  Bara svona forvitinn. 

Alveg skrifa ég undir það að senda þurfi meindýraeyði á staðinn, þegar svona vitfirringar vaða uppi eins og á Skaparinn.is. Ég hélt í fyrstu að þetta væru einhverjar gelgjur í uppreisn og fannst best að þegja um þessa síðu. Síðan þegar þeir birtu hitlista og höfðu í hótunum um skemmdarverk og morð, þá stóð mér ekki á sama.

Það er nefnilega ótrúlegt hvað svona einstaklingar geta haft áhrif á ómótaða hugi og grama þunglyndissjúklinga, svo ekki sé talað um fólk á öðrum hugbreytandi efnum.  Dæmin úr trúarofstækisgeiranum sanna það.

Sá hóp í US sem lofaði Guð fyrir aids og dauða hermanna í Írak og vil drepa alla sem eru í minnihluta, eins og homma og negra og jafnvel kristna, sem ekki fylgja sannfæringu þeirra, sem byggir að mestu á því stækasta úr Mósebókum. 

Þeir vaða samt uppi í skjóli málfrelsisins og ansi skítt að það þurfi að bíða eftir morðum til að stoppa þá.  Við erum þó með klausuna um andfélagslega hegðun, sem leyfir að svona lið sé stoppað.

[Vilhjálmur Örn Vilhjálmsson, 15.11.2007 kl. 16:30]

Sæll Jón,

Þú getur lesið allt um glæpi danska SS-liðans í grein minni. Það er tenging við hana. Hann vann að minnsta kosti ekki hjá Sláturfélagi Suðurlands.

Ég tel líka öruggt að hann hafi ekki verið trúaður og vasasálfræði mín segir mér að peyjarnir sem haldið hafa úti óskapnaðinum á skapari.is séu líka lítt gefnir fyrir trú og gyðinga eins og Jesús. Þeirra trú er hatur og öfund. Þú hefur rétt fyrir þér það er hægt að misnota trú til margs. En einlæg trú er og verður alltaf hjartahrein.

[Vilhjálmur Örn Vilhjálmsson, 15.11.2007 kl. 20:19]

Sæll Þrymur, Ásgeir Guðmundsson hefur ýmislegt til málanna að leggja um sögu Ólafs og það birtist í bókinni Berlínarblús (1996). Saga fórnalamba hans í Noregi hefur hins vegar ekki verið sögð.

[Greta Björg Úlfsdóttir, 17.11.2007 kl. 01:21]

Vilhjálmur, það er ekki búið að loka skapari.is, ég var að lesa þetta sjálfshól þeirra þar rétt í þessu:

" Mikið hefur verið látið með þessa síðu í blogg heimi Íslands
sem og í fjölmiðlum - magnað hefur verið að fylgjast með þeirri
umræðu því já-kórinn er mikill og gagnrýnin umræða engin.
Yfir 40 % af þeim póstum sem berast eru jákvæðir.
Fólk er greinilega orðið mjög leitt á ástandi þjóðfélagsins.
En því miður þá er pólitísk rétthugsun svo sterk í þessu landi
að almenningur þorir ekki að tjá sig - breytum því !!!
Þessi síða er lítið skref í rétta átt.
Göngum saman til sigurs
Hvítt land er Hreint land og Fagurt."

[Greta Björg Úlfsdóttir, 20.11.2007 kl. 13:04]

Það heitir nefnilega skapari.com, en ekki .is, þar sem síðan er hýst erlendis - sem gefur eiginlega auga leið, held að enginn á Íslandi með snefil af sjálfsvirðingu myndi taka í mál að hýsa þetta ógeð.

[Vilhjálmur Örn Vilhjálmsson, 21.11.2007 kl. 08:21]

Sæl Gréta,

ég er búinn að sjá þetta aftur. Það er um mjög fáa aðila að ræða og ef lögreglan hefur fylgst með þeim sem hafa tjáð sig um öfgafullar skoðanir sínar opinberlega áður, ætti að vera auðvelt mál að finna þessa "bleiku" og náfölu ræfla.

Hér um árið, í Helgarpóstinum sáluga, tjáðu nokkrir menn sig um ágæti hins íslenska kynstofns og nauðsyn þess að hreinsa tunguna og mannfólkið. Þeir voru reyndar ekki einir um tunguhreinsunarátakið. "Skaparinn" virðist þó ekki hafa í sínu röðum neina kandídata fyrir Móðurmálsverðlaunin. Einn þessara manna, sem gekk fram á völlinn sem nasisti og kynþáttahatari, fékk boðskap sinn birtan í Morgunblaðinu þann 25. febrúar 1995, bls. 49.  Skoðið: http://www.timarit.is/?issueID=433179&pageSelected=24&lang=0 

Sá sem skrifaði þetta árið 1995 átti sér nokkra vini, m.a. rauðskeggjaðan og snoðklipptan hvítingja, sem lýsti því yfir að hann væri nýnasisti.  

Skoðið líka lesendabréf mitt sem verið er að vitna í: http://www.timarit.is/?issueID=432973&pageSelected=22&lang=0 þar sem ég skrifaði um forkastanlega klausu eftir félaga í Nýalssinnafélaginu og Ásatrúarfélaginu, sem m.a. ills dró helför gyðinga í efa. Ég er viss um að Þór, Óðinn og Helgi Pjetursson hefðu nú ekki gert það.