Fórnarlömb kvótans?

 

Teikning af kumli sem fannst nýlega í Gausel í Noregi, sem er heldur ekki alveg niður við sjó. Sjá http://www.gausel.no/ 

 

Þetta er merkur fundur, sem óska kollegum mínum til hamingju með.

Í viðtali við heimamenn og forneifafræðing í Ríkissjónvarpinu í gær, veltu menn því fyrir sér af hverju sjö metra bátur væri þarna inni í landi.  Það er í raun ekkert furðulegt. Þeir, sem þarna eru heygðir, voru landnámsmenn, eða nánustu afkomendur þeirra. Þeir komu væntanlega frá svæðum þar sem bátskuml voru ríkjandi greftrunarsiður. Þetta voru sjómenn, annars hefðu þeir ekki getað siglt til Íslands.

Þeir heygðu hafa hugsanlega tapað í kapphlaupinu um aðgang að strandlengjunni. Verið fórnarlömb kvótakerfis Landnámsaldar. Þeir hafa fengið bátinn sinn og það sem áður var með í gröfina. En alveg eins gæti verið að þeir hafi verið með bú á Litlu-Núpum í Aðaldal og haft annað við ströndina og stundað róðra. Svo hefur gamall bátur og aflóga verið notaður í kumlið. Hann hefur verið borinn eða fluttur á hlunnum síðasta spottann frá Æðarfossum.

Ábúendur inn til dala á landnámsöld hafa væntanlega haf tök á því að róa á miðin. Fiskbein sjávarfiska hafa fundist á Granastöðum, og Hofstöðum, sem liggja langt frá sjó, og hvalbein hafa meira að segja fundist í elstu mannvistarlögunum á Stöng í Þjórsársdal, sem ég hef rannsakað.

Merkilegur fundur, en mikið finnst mér ljót og eðjuleg uppgraftaraðferðin, sem ég sá í sjónvarpinu. Hefði ekki mátt bíða með svo merkan fund til betri veðurskilyrða? Þetta er ekki björgunaruppgröfur. Sýnistaka og önnur fín vinna fer forgörðum við svona aðstæður.

Bátkuml finnst í Aðaldal

Athugasemdir

[Guðjón Sigþór Jensson, 31.8.2007 kl. 18:50]

Gaman að frumlegum kenningum. Á þessum tíma hefur vart verið komin á sú rányrkja sem við kynntumst síðar. Til þess skorti tæki að ganga  á stofnana.

Fram undir aldamótin 1900 var mikið fiskirí upp undir fjöru víðast hvar t.d. í Faxaflóa. Hvalir óðu víða uppi uns gengið var mjög nærri þeim undir aldamótin 1900 og sumum tegundum nærri útrýmt sökum þess hve auðvelt var að veiða þá t.d. sléttbakinn.

Mosi - alias 

[Sigurður Þór Guðjónsson, 31.8.2007 kl. 19:29]

Hvað skyldu annars jarðfræðingar segja um breytingu á strandlínu á þessum slóðum síðustu þúsund ár?

[Sigurður Þórðarson, 1.9.2007 kl. 07:23]

Gamlir annálar fyrr á öldum greina frá fiskileysisárum.  Gaman væri að heyra skýringar hins gagnfróða Guðjóns Jenssonar á því. 

[Vilhjálmur Örn Vilhjálmsson, 2.9.2007 kl. 09:26]

Fer brátt sjálfur og kynni mér afleiðingar kvótans. Gref mig í jörð um tíma og kannski rekst ég á sannleikann í holunni, sem ég segi frá við tækifæri. Hlusta nú á BB King og nenni ekki að blogga neitt.